1 Wa Ọvaar Ibinọkpaabyi otim Jehu kw'ode nnwa kw'Hanani ọgbaak odik kw'ọmaan Baasha bẹ́, 2 "Wa ngwọhng-ọ z'ididọhbh, nsọ-ọ ọbaabh kw'anọng p'Israẹl. Okenaka, kọ ator nden s'Jẹroboam. Ofona nya, awọhkọ Israẹl p'ade anọng paam, masi epyibha, mabir asi ettem ebhem-m. 3 Nya o, kaam kk'ifor nda s'm'ndimẹ Baasha, ọmaana ẹnọmma chẹ, k'ose kw'nsi ẹnọmma ch'Jẹroboam kw'ode nnwa kw'Nẹbat. 4 Mffa m'ichi aforbukọ p'anọng p'Baasha p'ape ny'ebhondim, ọnọhn f'ẹrọng m'ochi aforbukọ p'anọng p'ape z'ẹgba.

5 Idik njoza s'iyinẹ k'ogbe kw'Baasha ọbaabh, ọmaana idik s'osi, ọttara mgbong s'iwa okem, makkẹrẹ z'anwẹr p'avaar p'Israẹl. 6 Baasha o, okwu ope, manọhng-ẹ z'Tirza, okebha ab'otte z'izek. Ẹla kw'ode ojinọngnwa kwẹ, okwu ọtọka ẹvaarninga ch'otte.

7 Ọvaar Ibinọkpaabyi obir otima Jehu kw'ode ọgbaak-ettem ch'Ibinọkpaabyi, obir ode nnwa kw'Hanani, ọgbaak odik ọnang Baasha ọmaana ẹnọmma chẹ okurọ itama maphyir s'ikk'ọsa z'Ọvaar Ibinọkpaabyi k'ititika. Adiktama mbo p'uwa Baasha osi mach'ẹnọmma ch'Jẹroboam, epyibh Ibinọkpaabyi ettem, okurọ ch'odimẹ ẹnọmma ch'Jẹroboam.

8 Ny'icho ttong ẹrọbh okwuma ichadanẹ s'Asa ode ọvaarnọng kw'Juda, nya kw'Ẹla, kw'ode nnwa kw'Baasha, otim ẹvaar ch'Israẹl. Oninga ny'Tirza ọbaabha Israẹl k'icho ifa.

9 Zimri kw'uwa ode osonọng wanẹ kw'od-okkerẹ ẹbhaakẹ danẹ ch'ijaar s'egbong, ochi Ẹla ikwu. Ny'ogbe nwo, Ẹla kk'atuk ọdọhbha z'ọsọhm kw'Arza kw'ode okker-itọhm s'odimpa kw'Tirza. 10 Ny'icho ttong ẹrọbh okwuma ichenọmfa s'Asa ọbaabh Juda, nya wọ kw'Zimri odimẹ z'ọsọhm kw'Arza, ọfhọ Ẹla, ọtọka ẹvaar chẹ otima.

11 K'ose kw'Zimri ọtọm ẹbaabha nya, ọfhọ ẹnọmma ch'Baasha maphyir. Ojinọngnwa mawanẹ kw'oyobh-oyobh kode. Ọtọma z'anọng p'Baasha, ọfhọ bẹ maa, ozeng z'ayok-odikkobh pẹ. 12 Minna kw'Zimri ozeng ọfhọ anọng p'Baasha mapyhir, k'ose kw'uwa Jehu kw'ode ọgbaak-ettem ch'Ibinọkpaabyi ikk'odik ọgbaaka kw'ọmaan Baasha. 13 Ofon k'mpyibha s'Baasha, ọmaana Ẹla kw'ode nnwa kwẹ masi, ọmaana s'mabir awọhkọ anọng p'Israẹl masi, ttara z'aka-tama p'Israẹl akpobh, pira ettem ebhem Ọvaar Ibinọkpaabyi, kw'ode Ibinọkpaabyi kw'Israẹl.

14 Idik njoza maphyir s'iyinẹ k'ogbe kw'Ẹla ọbaabh, ọmaana idik s'osi, makkẹrẹ z'anwẹr p'avaar p'Israẹl.

15 Ny'icho ttong ẹrọbh okwuma ichenọmfa s'Asa ọbaabh Juda, nya kw'Zimri oning ny'Tirza, ọbaabha Israẹl k'iwu ichenọmfa. Ny'ogbe nwo, ode ch'asoja mabhingẹ anyọma Gibetọn kw'ode obhon wanẹ kw'ẹkọma ch'Philistiya. 16 K'ogbe kw'anọng p'Israẹl p'aning z'ibhinga-byi mabhaang bẹ́, Zimri kk'ọvaarnọng ikwu ọcha, obir ọfhẹ-ẹ, ny'ewu ndo madan-danẹ, masi Omri kw'ode osonọng kw'Asoja ẹvaar bẹ́, ọbaabha Israẹl. 17 Nya o, Omri ọmaana anọng p'Israẹl p'aning amaan-ẹ, matọr ifor z'Gibeton, mad-ayima egbong z'Tirza. 18 K'ogbe kw'Zimri oze bẹ́, nkk'ebhondim chẹ abọka, obina odim z'ẹtaanga kw'ifa-byi s'odimpa kwẹ, oke ekpon okporọ ifor sẹ za, ope. 19 Wa ode minna okurọ mpyibha, ọmaana itama s'ikk'ọsa z'Ọvaar Ibinọkpaabyi k'ititika, obir otor nden s'Jẹroboam k'mpyibhase s'iwa osi, obir otima anọng p'Israẹl masi.

20 Idik njoza maphyir s'iyinẹ k'ogbe kw'Zimri ọbaabh, ọmaana ikwu s'ochi, makkẹrẹ z'anwẹr p'avaar p'Israẹl.

21 Wa anọng p'Israẹl akwu abhaangẹ k'nkwurọ mfa. Ekwurọ danẹ ebe ẹmaana Tibni kw'ode nnwa kw'ọvaar Ginat bẹ́, otima ẹvaar. Ekwurọ ndoza ebe ẹmaana Omri. 22 K'okponganamgbe, ekwurọ ch'ebe ẹmaana Omri, ẹgaangẹ ẹyọhnga ekwurọ ch'Tibni kw'ode nnwa kw'Ginat. Ofona nya, Tibni ope. Omri okwu otima ẹvaar.

23 Ny'icho ttong ẹrọbh okwuma ijobh kawanẹ s'Asa ọbaabh Juda, nya kw'Omri otim ẹvaar ch'Israẹl. Wa ọbaabh k'icho ijobh kkamfa. Otima icho ichadanẹ oninga z'Tirza. 24 Omri odebh egbe ch'Samariya z'Shema k'ọbọhk, k'atalen afa p'silva. Osi ebhondim ny'egbe ndo, okpe chẹ bẹ́, Samariya, ọfha otima ojima Shẹma kw'uwa oyen egbe ndo.

25 Okenaka, wa Omri osi itama z'ititika s'Ọvaar Ibinọkpaabyi s'iyọhng s'anọng p'echeden asi. 26 Omri otor ntọkọ s'Jẹroboam kw'ode nnwa kw'Nẹbat. Wa osi mpyibhase njo s'Jẹroboam otim anọng p'Israẹl osi, mabira akpobha aka-tama p'awọhkọ ettem ebhem Ọvaar Ibinọkpaabyi kw'ode Ibinọkpaabyi kw'Israẹl.

27 Idik njoza maphyir s'iyinẹ k'ogbe kw'Omri ọbaabh, idik s'osi ọmaana ẹfa chẹ, makkẹrẹ z'anwẹr p'avaar p'Israẹl. 28 Wa Omri ope, manọhng-ẹ z'Samariya. Ahab kw'ode ojinọngnwa kwẹ ọtọka ẹvaarninga ch'otte.

29 Ny'icho ttong ẹrọbh okwuma ichi kkanttaan s'Asa ọbaabh Juda, nya kw'Ahab kw'ode nnwa kw'Omri otim ẹvaar ch'Israẹl. Wa Ahab oning z'Samariya ọbaabha Israẹl k'icho ẹrọbh okwuma ifa. 30 Wa Ahab kw'ode nnwa kw'Omri osi itama z'Ọvaar Ibinọkpaabyi k'ititika, s'iyọhng s'anọng p'achẹ-ẹ eden k'ẹbaabha. 31 Wa kọkpọk bẹ́, kẹ oze mpyibhase s'Jẹroboam mach'ipyibh-opyibh, wa obir ochina ororo, ọtọka Jẹzẹbẹl kw'ode ominanwa kw'ọvaar Ẹthbaal kw'Sidọn k'ọbada, obir okpobha Baal ọttara. 32 Wa Ahab ottim ija-byi z'ọsọhm kw'Baal kw'osi z'Samariya. 33 Obir osi ọka f'Ashẹra, ọmaana idik s'iyọhng nya s'ibhemẹ Ọvaar Ibinọkpaabyi, kw'ode Ibinọkpaabyi kw'Israẹl, ettem. Wa osisi kwẹ ọyọhng kw'anọng p'achẹ-ẹ eden k'ẹbaabha.

34 Ny'ogbe kw'Ahab ọbaabh, nya kw'Hiyẹl kw'ofon Bẹtẹl ọtọm obhon kw'Jẹriko odido. K'ogbe kw'ọphaakẹ izek, nya kw'uwa Hiram kw'ode ochedennwa kwẹ ope. K'ogbe kw'oke ebhumma ch'obhon nwo, nya kw'Segub kw'ode okpongannam kwẹ ope, otor k'ọgbaakadik kw'uwa Ọvaar Ibinọkpaabyi ikk'Joshua kw'ode nnwa kw'Nun otima ọgbaak.