1 Wa ọvaar Sọlọmọn oyen panọng k'ọsaabh p'adaak-ẹ p'afon nkọma ọdọk-ọdọk. Ó̱de ágbaarẹ ominanwa kw'Phero abharẹ, wa ọtọk panọng z'ẹkọma ch'Moab, ọmaana ch'Amọn, ọmaana ch'Edom, ọmaana ch'Sidon ọttara ch'Het. 2 Wa panọng mbo afon nkọma njo s'iwa Ọvaar Ibinọkpaabyi ọtọr anọng p'Israẹl itọhng bẹ́, "Kwuna bọnga ọmaana anọng p'afon ma, maning ayok k'ọbada atọk o, okurọ bẹ́, k'odik ọkkọkka, mm'abhakẹ bọnga nttem ọbhakẹ, masi bọnga makpobha aka pabẹ." Nya kw'uwa nnater ado Sọlọmọn adaak-ọdaak. 3 Wa ọtọk panọng ẹnọhna okwuma arọbh ichi p'afon k'ivaar-taak, obira osi iyok ọmaana panọng arọbh ichi. Panọng mbo pẹ, matim-ẹ attena eden. 4 K'ogbe kw'Sọlọmọn kk'ọtama, panọng pẹ abhak-ẹ ettem, nokpobha aka. Wa ọdọk ettem chẹ maphyir k'Ọvaar Ibinọkpaabyi kw'ode Ibinọkpaabyi kwẹ koyik, k'ose kw'uwa Devid kw'ode otte, okpobh-ẹ. 5 Wa kẹ nokpobh Ashtọrẹt, kw'ode ọka f'kwanọng f'anọng p'Sidọn, ọmaana Molẹk kw'ode ọka f'ọbọk-ọbọkọ f'anọng p'Amọn. 6 Ofona nya o, Sọlọmọn osi itama z'Ọvaar Ibinọkpaabyi k'ititika. Ọdọk Ọvaar Ibinọkpaabyi kokpobh ọmaana ettem chẹ maphyir, k'ose kw'uwa Devid kw'ode otte, okpobh-ẹ.

7 K'egbe ch'ening z'ẹbhaakẹ ch'ewuchen ed-eyin z'Jẹrusalẹm, nya kw'Sọlọmọn osi ija-byi s'ọyaankpa s'mm'ad-akpobha Kẹmọsh, kw'ode ọka f'ọbọk-ọbọkọ f'anọng p'Moab. Obira osi ibyise njo s'mm'ad-akpobha Molẹk, kw'ode ọka f'ọbọk-ọbọkọ f'anọng p'Amọn. 8 Minna kw'uwa osi obyi mvo ọnang panọng mbo pẹ maphyir p'afon nkọma ọdọk-ọdọk, mfha mad-akwọmọ insẹns, mabira afọhnọ nja anang aka pabẹ.

9 Wa Ọvaar Ibinọkpaabyi okwu ọdọk-ẹ ọmaana Sọlọmọn, okurọ bẹ́, kk'ettem chẹ ọrọhbha z'Ọvaar Ibinọkpaabyi, kw'ode Ibinọkpaabyi kw'Israẹl kw'ikk'oyina okebh-ẹ igbedim ifa. 10 Chibhẹ ch'iwa ikk'Sọlọmọn eden ọkpa k'ekpo ọdọk-ọdọk okpukpobha, Sọlọmọn odik kw'Ọvaar Ibinọkpaabyi kokpobh. 11 Nya o, Ọvaar Ibinọkpaabyi oben Sọlọmọn bẹ́, "Ch'ode minna wọ nnode osisi kwọ, bẹ́, abhum echekẹ chaam ọttara asana p'nnang-ọ okpukpobha, eden za kede ch'ina ọvaarbhon nwo mìnkebh nnang ọnọng wanẹ kw'oning izek-izek kwọ. 12 Okenaka, m'nzenga Devid kw'ode atte kwọ ábubẹ̀, mkpa nnam mbọra odik nwo m'ogbe kw'ikọ aning akpen. Kaam m'nkebh wẹ k'ogbe kw'nnwa kwọ m'ọbaabha. 13 Zaa ode yen, ọvaarbhon nwo k'ibungọ mìnkebh. Kaam m'nzenga Devid kw'ode ọtọhmnọng kwaam, ọmaana Jẹrusalẹm kw'kk'nteka ábubẹ̀, nnang-ẹ ofonamma mawanẹ."

14 Minna kw'Ọvaar Ibinọkpaabyi ọtọhmọ Hadad kw'ofon z'ivaartaak s'Edom bẹ́, oninga k'iwawuna ọmaana Sọlọmọn. 15 Wa k'ogbe wanẹ, ch'Devid od-orima anọng p'Edom ábẹ̀, Joab kw'ode oso kw'asoja kk'ọta za bẹ́, ọd-ọnọhnga ayok p'nkk'apa. Minna kw'okporiza, ọfhọ ajinọng p'ẹkọma ch'Edom maphyir. 16 Joab ọmaana anọng p'Israẹl maphyir maninga nya k'aphe achadanẹ. Maninga nya maa, mafhọ ajinọng p'Edom maphyir. 17 Okenaka, Hadad kw'uwa otim ode odikkobh, ọrọbh ozeng z'Ijip, kẹ ọmaana atọhmnọng banẹ p'nkk'ọtọhm asa amaana otte kwẹ. 18 Mabina z'Midiyan machina z'Paran. Minna kw'matọk anọng banẹ ny'Paran p'matim azeng z'Ijip, makebh Phero kw'ode ọvaarnọng kw'Ijip. Phero ọnang Hadad ọsọhm ọmaana izek, ọttara ọchattọhk.

19 Wa ettem ẹdaamẹ Phero ẹmaana Hadad maa, ọtọka ọgbaanọkka kw'ọvaarkwanọng kwẹ kw'ode Tahpẹnẹs, ọnang Hadad k'ọba. 20 Ọgbaanọkka nwo kw'Tahpẹnẹs, ọmmaan ojinọngnwa kw'okpen Gẹnubat ọnang Hadad. Tahpẹnẹs ọrọk Gẹnubat ny'ọvaarter. Wa Gẹnubat orukọ nya ọmaana iva p'Phero.

21 Ch'iwa Hadad otim oning z'Ijip, ọbhaanga bẹ́, Devid kk'ọpa okebh ab'otte z'izek, ọttara bẹ́, Joab kw'ode oso kw'asoja kk'ọpa ọdọk, minna kw'Hadad oben Phero bẹ́, "Tte mbhana, mkpa nnam z'ẹkọma chaam."

22 Phero ọbọbh-ẹ bẹ́, "Mbọng vọ owor-ọ ma, f'azeng ábẹ̀ aben bẹ́, m'akpa nnam z'ẹkọma chọ?" Hadad ọpọhn-ẹ bẹ́, "Ọttọhk kaam koworọ. Okenaka, tte-m ọbọhk nzọhng!"

23 Ibinọkpaabyi obira ọphyẹ iwawuna ọdọk-ọdọk ọnang Sọlọmọn. Wa notim Rezon kw'ode nnwa kw'Eliyada, kw'uwa ọrọbh-ọrọbh z'Hadadẹza kw'ode otte kw'oruk-ẹ ábẹ̀, obira ode ọvaarnọng kw'Zoba. 24 K'ogbe kw'Devid okem asoja p'Zoba, Rezon otobha ẹkaan ch'akkikkaama, kẹ ode bẹ oso. Mabina ad-aruk z'Damaskus, mabira asẹ-ẹ ẹvaar za. 25 Wa Rezon ode ọwawunanọng kw'Israẹl ny'ogbe kw'Sọlọmọn orukọ akpen. Hadad obira oke anọng p'Israẹl ẹkọhr. Minna kw'Rezon ọbaabh z'Aram, ttara k'iwawuna s'osokọ anọng p'Israẹl.

26 Wa Jẹroboam kw'ode ojinọngnwa kw'Nẹbat obhonọ, obira oke ọvaarnọng ẹkọhr. Wa kẹ obira ode odukwa wanẹ kw'Sọlọmọn kw'ofon z'Zereda, z'ẹkọma ch'Ephraim. Wa ọkka kwẹ ode opokwa kw'okpen Zẹruya.

27 Ọttọhk f'uwa Jẹroboam ozeng ábẹ̀ oke ọvaarnọng ẹkọhr ode bẹ́, wa Sọlọmọn osi abhukakpa, obira ọkpa áphaangẹ̀ p'etumọ ch'ebhondim ch'Devid kw'ode otte kwẹ. 28 Wa Jẹroboam ode ojinọng kw'ọgbọhk-ọgbọhkọ. Ch'Sọlọmọn oze ose kw'ojinọngnwa nwo ọgbọhkọ ọtọhm, ọsẹ-ẹ oso kw'atọhmnọng maphyir p'nkọma s'Josẹf.

29 Ny'ogbe nwo, wa Jẹroboam obin z'Jẹrusalẹm bẹ́, oyin k'iyaan. Ahija kw'ode ọgbaak-ettem ch'Ibinọkpaabyi kw'ofon Shilọ, ọfọra ọnọhma-baba ọbhakwẹ otima okebh-ẹ z'eden. Wa mazeng bẹ anọng afa bẹ-bẹ, mabina z'obhon. 30 Ahija ọbọka ọnọhma-baba ọbhakwẹ nwo kw'ọfọr, ọyaakẹ k'mkpa ijobh kkamfa. 31 Pira nobenẹ Jẹroboam bẹ́, "Kọ tọka mkpa ijobh, kirẹ Ọvaar Ibinọkpaabyi kw'ode Ibinọkpaabyi kw'Israẹl obenẹ bẹ́, ‘Kirẹ e, kaam m'nkebh ọvaarbhon nwo ny'Sọlọmọn k'mbọhk, ntọka mfonamma ijobh, nnang kọ. 32 Okenaka, kaam m'nzenga Devid kw'ode ọtọhmnọng kwaam ábubẹ̀, ọmaana ebhondim ch'Jẹrusalẹm ch'kk'nteka m'mfonamma s'Israẹl maphyir, nnang-ẹ ofonamma mawanẹ. 33 Kaam m'nsi minna okurọ bẹ́, bẹ nkk'nnam akpa abọr-m, matera akpobha Ashtọrẹt kw'ode ọpanọngka f'anọng p'Sidọn, ọmaana Kẹmọsh kw'ode ọka f'anọng p'Moab, ọttara Molek kw'ode ọka f'anọng p'Amọn. M'nden saam katorọ. M'ọttọhk f'otor-otor kabira asi k'kaam k'ititika. Bẹ nkabir asi k'ose kw'uwa Devid kw'obhonọ Sọlọmọn okpobh asana ọmaana apaanga paam. 34 Okenaka, kaam ọvaarbhon nwo k'ibungọ mìntọka z'Sọlọmọn k'ọbọhk. Kaam kk'ẹ ọbaabh nsa k'akpen pẹ maphyir, okurọ Devid kw'ode ọtọhmnọng kwaam kw'ikk'nteka, kw'obira okpobha idik saam ọmaana asana paam. 35 Kaam m'ntọka ọvaarbhon nwo z'mbọhk s'ojinọngnwa kwẹ, nnang kọ mfonamma ijobh. 36 Kaam m'nnang ojinọngnwa kwẹ ofonamma mawanẹ, ọfha ẹnọmma ch'Devid kw'ode ọtọhmnọng kwaam echina ororo ẹbaabha Jẹrusalẹm, kw'ode ebhondim ch'ikk'nteka bẹ́, anọng aninga akpobh-m. 37 Ṉ́nòde kọ, kaam m'nnang-ọ ẹvaar ch'm'abaabha obyi maphyir f'ọdaak-ọ z'ettem. Kọ m'ade ọvaarnọng kw'Israẹl. 38 Ó̱de asi ọttọhk kpenamkpen f'mben-ọ, ator ẹtọkọ chaam, abira asi idik s'itor-otor k'kaam k'ititika, abira asok asana paam, ọmaana apaanga paam, k'ose kw'uwa Devid kw'ode ọtọhmnọng kwaam, osi, kaam m'nninga mmaan-ọ, nsi ivaartaak sọ ikpen, mach'iwa nsi s'Devid. Kaam m'mbira nnang-ọ Israẹl. 39 Kaam m'nsaka iva p'iva p'Devid eninga okurọ odik nwa. Okenaka, ttattampe mòde.’ "

40 Sọlọmọn okonga bẹ́, ọfhọ Jẹroboam, okenaka, Jẹroboam ọrọbh ozeng z'Ijip, okebha ọvaar Shishak za. Za kw'uwa oning maa, Sọlọmọn ope.

41 Ṉ́nòde idik njoza s'Sọlọmọn osi maphyir k'ogbe kw'ọbaabh, ttara ezonga ch'iwa ọd-ọkọhka, makkẹrẹ z'nnwẹr kw'idik s'Sọlọmọn. 42 Wa Sọlọmọn oning ny'Jẹrusalẹm, ọbaabha Israẹl maphyir k'icho arọbh afa. 43 Sọlọmọn ope, otor ab'otte. Manọhng-ẹ z'ebhondim ch'Devid kw'ode otte. Rẹhoboam kw'ode ojinọngnwa kwẹ, okwu otima ẹvaar ch'otte.