1 Avaarnọng 5

Nttọhna s’Ọsọhm kw’Ibinọkpaabyi osisi

1 Wa ọvaar Hiram kw’Taya, kw’ozeng iyok ọmaana Devid, ọbhaang bẹ́, nkk’Sọlọmọn ayaana bẹ́, otima ẹvaar ch’otte Devid. Minna kw’ọtọhm atọhmnọng banẹ pẹ z’Sọlọmọn bẹ́, mazim-ẹ. 2 Sọlọmọn ọbhaang ezima ndo nya o, ọtọhm ẹkkaabha ochena Hiram, oben bẹ́:

3 "Kọ azong ma bẹ́, wa Devid kw’ode atte kwaam, obenẹ bẹ́, osi Ọsọhm kw’otim eche ch’Ọvaar Ibinọkpaabyi, kw’ode Ibinọkpaabyi kwẹ. Okenaka, kokpo osi okurọ ch’iwa awawunanọng pẹ matim mgbong akọbh-ẹ ọkọbha. Wa ọsọhm nwo kosi maa, opyirẹ ny’ogbe kw’Ọvaar Ibinọkpaabyi okem awawunanọng mbo pẹ maphyir. 4 Ma ch’nning ma, Ọvaar Ibinọkpaabyi, kw’ode Ibinọkpaabyi kwaam kk’aam ẹmẹm ọnanga k’ibyi kpenamkpen. Ọdọk ọwawunanọng kinyen, itama kaam kibir ikebha. 5 Nya wọ osi o, nkamẹ bẹ́, nsi Ọsọhm kw’im’otima eche ch’Ọvaar Ibinọkpaabyi, kw’ode Ibinọkpaabyi kwaam, k’ose kw’uwa Ọvaar Ibinọkpaabyi obenẹ Devid kw’ode atte kwaam bẹ́, ‘Nnwa kwọ kw’im’ọtọka eninga chọ, kẹ wọ im’osi Ọsọhm kw’Ibinọkpaabyi kw’mm’aninga akpobha eche chaam.’

6 "Ofona nya, ke ẹfa bẹ́, màkkọhbh nchi s’sida z’Lebanọn anang-m. Kaam m’ntọhm atọhmnọng paam, makwu ator atọhmnọng pọ masi ọtọhm. M’mbira nnang-ọ akpuka p’ọtọhm k’ose kw’aphyikẹ. Kọ azong za bẹ́, mina m’anọng koyen p’akpo nchi ojijẹ mach’anọng p’Sidon."

7 Hiram ọbhaang ẹkkaabha ch’Sọlọmọn nya o, ettem ẹdaam-ẹ maa, oben bẹ́, "Tte ẹtọhnga ede ch’Ọvaar Ibinọkpaabyi menda, ch’ọnang Devid nnwa kw’oyen ezonga bẹ́, ọbaabha ẹkọma katam nda."

8 Minna kw’Hiram ọnang Sọlọmọn ẹpọhna, oben bẹ́:

"Kaam kk’ẹkkaabha chọ mmaanga. Kaam kk’ifor nda bẹ́, nsi okpenamkpen f’arorọ. M’nnang-ọ nchi njo s’sida ọmaana s’junipa ọnang.

9 Ajinọng paam màtima jẹ abina z’Lebanọn asaka z’Ọraanga kwiden. Nya kw’im’ntọhn jẹ, k’ose kw’mm’ayaar ny’asi atima achina k’ibyi kpenamkpen s’arorọ bẹ́, masok. Nya wọ kw’m’nchaarẹ jẹ k’ose kw’im’atọka atima afona. F’im’asi anang kaam ode bẹ́, anang ẹsọhmmọr chaam ọchattọhk f’mm’achi."

10 Minna kw’Hiram ọnang Sọlọmọn nchi njo maphyir s’sida ọmaana s’junipa k’ose kw’ororọ. 11 Sọlọmọn ọnang ẹsọhmmọr ch’Hiram awit p’ade azaangva nnọhna arọbh afa okwuma ijobh, ọmaana ana-chang nnọhna arọbh afa okwuma ijobh p’oliv kw’nkk’amyaana. Wa Sọlọmọn ọd-ọnang Hiram ekpo mbya k’icho k’icho. 12 Minna kw’Ọvaar Ibinọkpaabyi ọnang Sọlọmọn ezonga k’ose kw’ikk’ocheka ọnang-ẹ. Kẹ Hiram ọmaana Sọlọmọn makwu aruk k’ẹmẹm. Ofona nya, madim k’ẹttọhna.

13 Ọvaar Sọlọmọn ozeng ny’Israẹl maphyir, ọ̀gwà anọng nnọhna arọbh attaan okwuma ichi k’ẹfa bẹ́, masi itọhm. 14 Ọtọhm bẹ z’Lebanọn. Wa k’ophe kpenamkpen, ọd-ọtọhm ẹkaan ch’atọhmnọng nnọhna ẹrọbh okwuma nchen z’Lebanọn. Mm’aninga ophe mawanẹ z’Lebanọn, maninga aphe afa z’obhon kwabẹ. Adoniram wọ uwa od-okkerẹ atọhmnọng mbo p’magwa k’ẹfa. 15 Wa Sọlọmọn obira oyena anọng nnọhna ochenọnttaan okwuma ichi p’ad-atọhka ekpo, ọmaana anọng nnọhna arọbh ijobh p’ad-aphaakẹ ata z’ẹkọma ch’agbe, 16 ọttara anọng nnọhna ochenọnttaan okwuma ẹrọbh okwuma achen p’ad-akkerẹ ọtọhm. 17 Ọvaarnọng ọnang ẹfa bẹ́, atọhmnọng mbo maphaakẹ atakpa piden p’ajibh-ojibh, mfha matima aphaakẹ izek s’Ọsọhm kw’Ibinọkpaabyi. 18 Amengkkanọng p’Sọlọmọn, ọmaana p’Hiram, ọmaana atọhmnọng p’abin z’Gẹbal, magbaka mbọhk makpaara nchi ọmaana ata mbo k’eden ch’mm’atima asi Ọsọhm kw’Ibinọkpaabyi.