1 Ny'ogbe nwo, Abija kw'ode nnwa kw'Jẹroboam okwu ọmmẹ-ẹ. 2 Jẹroboam oben kwanọng kwẹ bẹ, "Zọhng bhona ifor k'ose kw'nna kọ matin bẹ́, ade kwanọng kw'Jẹroboam. Íkk'asa minna, china z'Shilo, za ch'Ahija kw'ode ọgbaak-ettem ch'Ibinọkpaabyi orukọ. Kẹ wọ wa ọgbaak-m bẹ́, kaam wọ im'nde ọvaarnọng kw'anọng mba. 3 Tọka abrẹd-duk ijobh, ọmaana ayokpa, ọttara akọhnsi k'egbomma, atima akebh-ẹ za. Kẹ m'otek-ọ odik kw'im'oyin ọmaana odikkobh nwo." 4 Minna kw'kwanọng kw'Jẹroboam osi k'ose kw'obenẹ, obina ochina z'ọsọhm kw'Ahija z'Shilọ. Wa ny'ogbe nwo, Ahija kk'achen ọkpa okurọ ch'ikk'ọtama.

5 Okenaka, Ọvaar Ibinọkpaabyi kk'Ahija okkikken otek bẹ́, "Kwanọng kw'Jẹroboam okwuma bẹ́, ọbọbh-ọ odik kw'ọmaan nnwa kwẹ kw'ọmm-ẹ ọmma. Ó̱de ókwu, m'apọhn-ẹ minna minna bẹ́. Ch'kwanọng nwo m'opyirẹ, m'osi k'ose kw'ina kẹ matin."

6 Ch'Ahija ọbhaang ntọkọ sẹ ny'ọmma, oben-ẹ bẹ́, "Kwanọng kw'Jẹroboam, dim ka ọsọhm. Osempira ad-asi mach'ina kọ ode? Manang-m ẹkkaabhatama bẹ́, nchen-ọ. 7 Zọhng, ad-agbaak Jẹroboam bẹ́, odik kw'Ọvaar Ibinọkpaabyi kw'Israẹl ọgbaakẹ ode bẹ́, "Wa kaam nrọhbh-ọ ny'ikpakaana s'anọng, mbira nsọ-ọ bẹ́, abaabha anọng paam p'Israẹl. 8 Kaam ntọk ẹvaar z'ntaak s'Devid nnang-ọ. Okenaka, kọ mach'Devid kw'ode ọtọhmnọng kwaam, kade. Kẹ okpobh asana paam, obir otima ettem chẹ maphyir otor-m, od-osi idik s'itor-otor jẹ-jẹ.

9 Kọ kk'mpyibha asa s'iyọhng s'anọng maphyir p'nkk'eden acha, abaabha. Kọ kk'nnam akpa abọr-m, abira asi ettem ebhem-m, okurọ bẹ́, atim m̀gbáká asi aka, ọmaana akpata akpobha.

10 Ofona nya, kaam m'ntọhm itama ikpẹkẹ ẹnọmma ch'Jẹroboam. Kaam m'mbira mfhọ ojinọngnwa kpenamkpen kw'Jẹroboam kw'ode okpongannam, zaa wura ode obira, obir ode ọmmaana. Kaam m'ndimẹ ẹnọmma ch'Jẹroboam mach'ọnọng ọkwọmọ ẹbọr maa, ẹsa maphyir. 11 Mfa m'ichi anọng p'Jẹroboam p'ape z'ebhondim. Ọnọhn m'obir ochi anọng pẹ p'ape z'ẹgba. Odik kw'Ọvaar Ibinọkpaabyi ikk'ọgbaaka wọ ma."

12 Ṉ́nòde kọ, bina bhana. K'ose kw'abarẹ ẹtọkọ chọ ny'ebhondim, ojinọngnwa nwo m'ope. 13 Anọng p'Israẹl maphyir m'abhom-ẹ, mabira anọhng-ẹ. Kẹ-kẹ wọ kw'mm'anọhnga mawuriji ny'ẹnọmma ch'Jẹroboam, okurọ bẹ kẹ-kẹ wọ kw'Ọvaar Ibinọkpaabyi kw'ode Ibinọkpaabyi kw'Israẹl, ọdaam ettem ọmaana.

14 "Ọvaar Ibinọkpaabyi m'ozeng mmo ọrọhbha ọnọng kw'im'ode ovaarnọng kw'Israẹl kw'im'odimẹ ẹnọmma ch'Jẹroboam. 15 Ọvaar Ibinọkpaabyi m'ọnang anọng p'Israẹl irem maa, makerẹ ozizaarẹ kw'asi kw'ọd-ọdang-ọdanga. Kẹ m'obik anọng p'Israẹl m'izek ọkkọkka nja s'iwa ọnang ab'ttatta pabẹ. M'obir osi bẹ maraamẹ maa, makpan ọraanga kw'Eupharetes, okurọ ch'masi ọka f'Ashẹra, mawọhkọ ettem ebhem Ọvaar Ibinọkpaabyi. 16 Ọvaar Ibinọkpaabyi m'ọkpa nnam ọbọra anọng p'Israẹl okurọ mpyibha s'Jẹroboam ikk'ọsa, ọttara s'ọwọhkọ anọng p'Israẹl masi."

17 Nya o, kwanọng kw'Jẹroboam obina ọkpa nnam z'Tirza. K'ose kw'ọbarẹ ẹtọkọ ny'ẹsọhmma chẹ, ojinọngnwa nwo kwẹ, ope. 18 Anọng p'Israẹl maphyir mabhom-ẹ, mabira atọk-ẹ anọhnga k'ose kw'Ọvaar Ibinọkpaabyi ikk'Ahija kw'ode ọgbaak-ettem ch'Ibinọkpaabyi otima ọgbaak.

19 Idik njoza s'iyinẹ k'ogbe kw'Jẹroboam ọbaabh, ọmaana mgbong s'orim, wa makkẹrẹ z'anwẹr p'avaar p'Israẹl. 20 Wa Jẹroboam ọbaabh k'icho ẹrọbh okwuma ifa, pira nope okebha ab'otte z'izek. Wa Nadab kw'ode ojinọngnwa kwẹ, okwu ọtọka eninga chẹ mach'ọvaarnọng.

21 Wa Rẹhoboam kw'ode nnwa kw'Sọlọmọn ode ọvaarnọng kw'Juda. Wa ode icho arọbh afa okwuma mawanẹ ch'ọtọm ẹbaabha. Ọbaabha k'icho ichi kkamfa ny'Jẹrusalẹm kw'ode ebhondim ch'Ọvaar Ibinọkpaabyi ikk'oteka ny'mfonamma s'Israẹl maphyir bẹ́, maninga akpobha eche chẹ. Ọkka kw'Rẹhoboam okpen Naama, ofona Ammọn.

22 Wa anọng p'Juda asi itama z'Ọvaar Ibinọkpaabyi k'ititika. Ofona ny'mpyibha njo s'masi, Ibinọkpaabyi ọdọk-ẹ ọyọhnga ose kw'uwa ọdọk-ẹ ọmaana ab'ttatta pabẹ. 23 Wa mattim ọja-byi f'ọyaankpa, mabira attima ata p'mm'akpobha, mafu nchi s'ọka f'Ashẹra k'ogbeso kpenamkpen, ọmaana k'echi kpenamkpen ch'eyen ofokodo. 24 Wa mayen aka-pa p'azaza p'ejinọng ny'ẹkọma ndo. Anọng mbo mabira asi idik maphyir s'ibọk-ọbọkọ, s'ide mach'njo s'iwọhkọ Ọvaar Ibinọkpaabyi okwubh nkọma s'iwa ining nya, pira anọng p'Israẹl apyirẹ.

25 Ny'icho ttong ichen s'Rẹhoboam ọbaabh Juda, ọvaar Shishak kw'Ijip, orima Jẹrusalẹm ábẹ̀. 26 Wa Shishak ọcha oyena kw'Ọsọhm kw'Ọvaar Ibinọkpaabyi, ọmaana oyena kw'ọvaardimpa, otima ofona. Obir ọtọka ọttọhk kpenamkpen, ozeng k'agbongtergba p'gol p'uwa Sọlọmọn ikk'ọsa. 27 Nya o, Rẹhoboam otima bronz osi agbongtergba, otima otera mboza. Ọtọka okebh ọnang asonọng p'ad-akkerẹ ebhumma ch'ọvaardimpa. 28 Ogbe kpenamkpen kw'ọvaarnọng ochin z'Ọsọhm kw'Ọvaar Ibinọkpaabyi, akker-ibyi m'atima agbongtergba mbo. Mácher nya, matọka ad-arik z'idongọ s'akker-ibyi.

29 Idik njoza s'imaan ẹbaabha ch'Rẹhoboam, ọttara ekpo maphyir py'osi, makkẹrẹ z'anwẹr p'avaar p'Juda. 30 Wa Rẹhoboam ọmaana Jẹroboam marim ayok ábẹ̀ k'ogbe kpenamkpen. 31 Wa Rẹhoboam okwu ope, manọhng-ẹ z'ebhondim ch'Devid, okebha ab'otte z'izek. Wa ọkka kwẹ okpen Naama, kw'ofon Ammọn. Abija kw'uwa ode ojinọngnwa kw'Rẹhoboam, okwu ọtọka ẹvaarninga ch'otte.