1 Wa ọgbaakadik kw'Ọvaar Ibinọkpaabyi otim ọgbaak-ettem ch'Ibinọkpaabyi obina z'Juda ozeng z'Bẹtẹl, od-okebha Jẹroboam ch'obe ny'ija-byi bẹ́, ọnang ẹnanga. 2 Ọgbaakadik kw'Ọvaar Ibinọkpaabyi otim-ẹ ọkwọhrọ ija-byi njo ẹmọng bẹ́, "Ija-byi! Ija-byi! Bhaanga odik kw'Ọvaar Ibinọkpaabyi obenẹ bẹ́, ‘Kwuna ojinọngnwa kw'okpen Josaya m'ọmmaana ny'ọsọhm kw'Devid. Afọhn-ẹja p'mad-anang nnanga s'ija-byi s'ọyaankpa bọ p'm'otima ọfọhnọ ẹja m'ija-byi nja. Akọbhọ p'ayokinọng bọ p'mm'abira akwọm-ọ ny'ifor.’ " 3 Ny'ewu ndo madan-danẹ, ọgbaak-ettem ch'Ibinọkpaabyi osi ẹkọhka danẹ ọnang bẹ, oben bẹ́, "Ma wọ ode ẹkọhka ch'Ọvaar Ibinọkpaabyi obenẹ, ija-byi njo m'bhaaka, ititọhng s'inan nya, inyaanẹ."

4 K'ogbe kw'ọvaar Jẹroboam ọbhaang ẹmọng ndo ch'ọgbaak-ettem ch'Ibinọkpaabyi ọkwọhrọ ija-byi s'Bẹtẹl, Jẹroboam oninga ny'ija-byi njo, onemẹ ọbọhk kwẹ, oben bẹ́, "Màbọk-ẹ!" Minna kw'ọbọhk nwo kw'onemẹ otena ọgbaak-ettem ch'Ibinọkpaabyi ope, ọkaka, ọdọk k'izek kokpo ọsaka. 5 Minna kw'ija-byi njo ibira ibhaaka. Ititọhng s'inan nya inyaanẹ, itor k'ẹkọhka ch'ọgbaak-ettem ch'Ibinọkpaabyi otim ẹfa ch'ọgbaakadik kw'Ọvaar Ibinọkpaabyi, ọnang.

6 Nya o, ọvaar Jẹroboam oben ọgbaak-ettem ch'Ibinọkpaabyi nwo bẹ́, "Ototo, kwukọ Ọvaar Ibinọkpaabyi kwọ k'kaam k'eso, abira aze njọm, ọfha ọbọhk kwaam obira ode k'ose kw'okkikken ode." Minna kw'ọgbaak-ettem ch'Ibinọkpaabyi nwo oze njọm ọnang Ọvaar Ibinọkpaabyi, ọbọhk nwo kw'ọvaarnọng obira okwu ode mbengana. 7 Ọvaarnọng oben ọgbaak-ettem ch'Ibinọkpaabyi nwo bẹ́, "Kwu mọtọn ofona z'ọsọhm, ọfha ad-achi ọttọhk, mbira nsọ-ọ ẹtaam."

8 Ọgbaak-ettem ch'Ibinọkpaabyi nwo ọpọhna ọvaarnọng bẹ́, "Zaa wura akebhẹ oyena kwọ k'ibyi ifa anang-m igboka janẹ, kaam kọ mìntor mofona, ọchattọhk ma mìnchi, asi ma m'mbira ngwo. 9 Ọgbaakadik kw'Ọvaar Ibinọkpaabyi oben-m bẹ́, ‘Ọttọhk kàchi, asi kàgwo, ny'eden ch'azeng akwu kabira azenga abhana.’ " 10 Nya o, ọgbaak-ettem ch'Ibinọkpaabyi nwo, nozenga k'eden ọdọk-ọdok ọbhana, ọdọk ny'eden ch'iwura ozeng ochina z'Bẹtẹl, kozeng.

11 Wa oyen ọgbaak-ettem ch'Ibinọkpaabyi wanẹ kw'ikk'ọtama kw'orukọ ny'Bẹtẹl. Ajinọngva pẹ akwu atek-ẹ idik maphyir s'ọgbaak-ettem ch'Ibinọkpaabyi nwo ikk'ọsa ny'ibyi njo, ny'ewu ndo. Mabira atek otte odik kw'ọgbaak-ettem ch'Ibinọkpaabyi nwo ikk'ọgbaaka ọnang ọvaarnọng. 12 Otte kwabẹ ọbọbh bẹ bẹ́, "Memma kw'ozeng o?" Ajinọngva mbo matibh-ẹ eden ch'ọgbaak-ettem ch'Ibinọkpaabyi nwo kw'ofon z'Juda, ozeng ofona. 13 Nya kw'nobenẹ ajinọngva pẹ bẹ́, "Màdo iwọrninga-byi ny'ẹnyanya nang-m." Ch'nkk'iwọrninga-byi ada ny'ẹnyanya anang-ẹ, ovura ọnana, 14 ọyaar okwubh ọgbaak-ettem ch'Ibinọkpaabyi nwo z'eden. Od-okebh-ẹ ch'oning ẹwọr z'echirin ch'oak, ọbọbh-ẹ bẹ́, "Ma, kọ wọ ade ọgbaak-ettem ch'Ibinọkpaabyi nwo kw'ofon z'Juda yirẹ?" Ọgbaak-ettem ch'Ibinọkpaabyi nwo ọpọhn-ẹ bẹ́, "Iye, kaam wọ e."

15 Minna kw'ọgbaak-ettem ch'Ibinọkpaabyi nwo kw'ikk'ọtama oben-ẹ bẹ́, "Kwu mofona, ad-achi ọttọhk z'kaam k'ọsọhm."

16 Ọgbaak-ettem ch'Ibinọkpaabyi nwo oben-ẹ bẹ́, "Kaam kọ mìntor mọkpa nnam. Ọchattọhk mìmbir nchi mmaan-ọ, ozeng k'asi pọ, mìmbira ngwo. 17 Ọgbaakadik kw'Ọvaar Ibinọkpaabyi kk'aam obena bẹ́: ‘Ọchattọhk za kachi o, asi za kàgwo o, ny'eden ndo ch'azeng ata kabira azenga akwuna o.’ "

18 Ọgbaak-ettem ch'Ibinọkpaabyi nwo kw'ikk'ọtama ọpọhna bẹ́, "Kaam mbira nde ọgbaak-ettem ch'Ibinọkpaabyi mach'ikọ e. Ọvaar Ibinọkpaabyi wọ otim ozeng-eden wanẹ kwẹ oben-m bẹ́, ‘Tim-ẹ kpa nnam z'ọsọhm kwọ, ọfha ochi ọttọhk, obira ogwo asi.’ " (Zanga, wa ọd-ọbọhr-ẹ ọbọhra.) 19 Minna kw'ọgbaak-ettem ch'Ibinọkpaabyi nwo otor-ẹ makpa nnam, od-ochi ọttọhk, obira ogwo asi z'ọsọhm kwẹ.

20 Nya ch'matim achi ọttọhk ny'okpokkoro, Ọvaar Ibinọkpaabyi ọtọhm ẹkkaabha ọnang ọgbaak-ettem ch'Ibinọkpaabyi nwo kw'ikk'ọtama, kw'otim oyok ọkpa nnam. 21 Ọgbaak-ettem ch'Ibinọkpaabyi nwo kw'ikk'ọtama, oben ọgbaak-ettem ch'Ibinọkpaabyi nwoza kw'ofon z'Juda k'ẹrọng bẹ́, "Ọvaar Ibinọkpaabyi obenẹ bẹ́: ‘Kọ kk'ọgbaakadik kw'Ọvaar Ibinọkpaabyi atwa. Ọsana kw'Ọvaar Ibinọkpaabyi kw'ode Ibinọkpaabyi kwọ kabira akpobha. 22 Kọ akpa nnam ad-achi ọttọhk, abira agwo asi z'ibyi s'mben-ọ bẹ́, aning ọttọhk nya achi, aning asi nya abira agwo. Ch'node minna, ọkpakpa kwọ ọdọk z'epekwuk ch'ab'atte, mọ̀nọhnga.’ "

23 K'ogbe kw'ọgbaak-ettem ch'Ibinọkpaabyi kw'ofon z'Juda kk'ọttọhk ọcha kpo, obira ogwo asi, ọgbaak-ettem ch'Ibinọkpaabyi nwoza kw'ọtọk-ẹ z'eden otima ọkpa nnam, odo iwọrninga-byi ny'ẹnyanya chẹ, ọnang-ẹ. 24 Ch'nọbhan-ọbhana o, eche ekebh-ẹ z'eden ẹfhọ, ẹbharẹ ọkpakpa kwẹ ny'eden. Ẹnyanya chẹ ọttara eche ndo ch'ẹfhẹ-ẹ, ebe etum-ẹ ny'ẹbhaakẹ danẹ. 25 Anọng banẹ p'akpanẹ nya, maze ọkpakpa nwo kwẹ ch'oyim ny'izek, ttara eche ndo ch'ebe etum-ẹ nya. Anọng mbo afona mad-agbaak anọng z'ebhondim ch'ọgbaak-ettem ch'Ibinọkpaabyi nwo kw'ikk'ọtama, orukọ.

26 K'ogbe kw'ọgbaak-ettem ch'Ibinọkpaabyi nwo kw'otim-ẹ z'eden okpa nnam ọbhaang odik nwo nya, oben bẹ́, "Ọgbaak-ettem ch'Ibinọkpaabyi nwo kw'ọtwọ ọgbaakadik kw'Ọvaar Ibinọkpaabyi wọ e. Ọvaar Ibinọkpaabyi kk'ẹ ọbọhk ọtta ọnang eche, ẹyaak-ẹ k'akpa-k'akpa, ebira ẹfhẹ-ẹ, k'ose kw'ọgbaakadik kw'Ọvaar Ibinọkpaabyi kk'ẹ itọhng ọtọra."

27 Ọgbaak-ettem ch'Ibinọkpaabyi nwo, oben ajinọngva pẹ bẹ́, "Màdo iwọrninga-byi ny'ẹnyanya nang-m." Iva mbo masi minna. 28 Minna kw'ofon od-oze oforbukọ nwo ch'oyim ny'eden, ọmaana ẹnyanya, ọttara eche ndo ch'ebe etuma oforbukọ nwo ny'ẹbhaakẹ danẹ. Eche ndo oforbukọ nwo kechi, ẹnyanya ndo k'akpa-k'akpa kebir ẹyaakẹ. 29 Minna kw'ọgbaak-ettem ch'Ibinọkpaabyi nwo kw'ikk'ọtama, otinẹ oforbukọ nwo kw'ọgbaak-ettem ch'Ibinọkpaabyi ọnana ny'ẹnyanya, otim-ẹ ọbhana z'ebhondim ch'ikẹ kw'otin-ẹ otinẹ, ọfha obhom-ẹ, obira ọnọhng-ẹ. 30 Wa ọnọhnga oforbukọ nwo z'epekwuk chẹ oyenẹ. K'ose kw'anọng abhom-ẹ, kẹ oben bẹ́, "O agbaanatte kwaam e!"

31 Ch'ikẹ ọnọhnga o, oben ajinọngva pẹ bẹ́, "Óbo ókwu-m, mànọhng-m ny'epekwuk ndo ch'ọgbaak- ettem ch'Ibinọkpaabyi nwo ọnọhng. Màrurọ akọbhọ paam k'ẹbhaakẹ danẹ ch'akọbhọ pẹ. 32 Kirẹ, ẹkkaabha ndo ch'Ọvaar Ibinọkpaabyi ọtọhm-ẹ bẹ́, ọgbaak ọnang ija-byi s'Bẹtẹl ọmaana akapa maphyir p'ibhon s'Samariya, m'ede minna k'odik ọkkọkka."

33 Chibhẹ ch'idik nja kk'iyina, Jẹroboam nnam kọtọrọ k'adik-tama. Wa obira od-oteka ọnọngkira kpenamkpen ọsẹ-ẹ ọfọhn-ẹja kw'akapa. Ọnọng kpenamkpen kw'uwa ororọ bẹ́, ode ọfọhn-ẹja, waJẹroboam ọd-ọsẹ-ẹ ọfọhn-ẹja kw'ọkapa kw'agbeso. 34 Epyibha ch'iwa ẹnọmma ch'Jẹroboam esi dọ ma, ch'etim ẹnọmma chẹ etto, ẹvọhkọ maa, edimẹ eche m'iyagbin.