1 Ny'icho ttong ijobh kkamfa s'Ahaz ọbaabh Juda, nya kw'Hosiya kw'ode nnwa kw'Ẹla ọbaabh Israẹl z'Samariya k'icho osowanẹ. 2 Wa osi itama z'ititika s'Ọvaar Ibinọkpaabyi. Okenaka, itama sẹ mach'itama s'avaar p'achi eden abaabha Israẹl, kipyirẹ.

3 Wa ọvaar Shalmanẹsẹr kw'Asiriya, okwu orima Hoshiya ábẹ̀. Hoshiya okwu ode ọtọhmnọng kw'Shalmanẹsẹr, obir ọd-ọnang-ẹ ntuma. 4 Okenaka, ọvaarnọng kw'Asiriya okwu otin bẹ́, Hoshiya ode ọfaranọng, okurọ ch'ikk'azeng-eden ọtọhma z'So kw'ode ovaarnọng kw'Ijip, ọmaana ch'ina ọdọk ọvaarnọng kw'Asiriya ntuma ọd-ọnang mach'iwa od-osi k'icho k'icho. Ofona nya, Shalmanẹsẹr ọbọk-ẹ oke mgbakkọhbhọ. 5 Minna kw'ọvaarnọng kw'Asiriya odimẹ ny'ẹkọma ndo maphyir orima bẹ ábẹ̀, obir oyima egbong ny'Samariya k'icho ittaan. 6 Ny'icho ttong osowanẹ kw'Hoshiya ikk'ẹvaar otima, nya kw'ọvaarnọng kw'Asiriya okem Samariya k'egbong. Ọbọka anọng p'Israẹl k'ẹmmọri otima ozeng z'Asiriya. Ọtọka bẹ od-osok z'Hala z'ẹkọma ch'Gozan, z'ẹbhaakẹ ch'ọraanga kw'Habọ, ọmaana z'ibhon s'anọng Mede.

7 Wa idik nja maphyir iyinẹ okurọ mpyibha s'anọng p'Israẹl asi z'ititika s'Ọvaar Ibinọkpaabyi, kw'ode Ibinọkpaabyi kwabẹ. Wa bẹ nnakpobh aka ayọhnga Ibinọkpaabyi nwo kw'uwa otim bẹ obina z'Ijip, obir ọrọhbha bẹ k'mbọhk s'Phero kw'ode ọvaarnọng kw'Ijip. 8 Wa anọng p'Israẹl natorọ mmaana s'nkọma s'Ọvaar Ibinọkpaabyi ikk'okwubha pira bẹ nnapyirẹ ny'izek njo, mabir asi mmaana s'avaar p'Israẹl nkk'abhaaka. 9 Wa anọng p'Israẹl nad-asi idik s'ina itorọ z'nnam-nnam kw'Ọvaar Ibinọkpaabyi, kw'ode Ibinọkpaabyi kwabẹ. Tọma z'ọttangara maa, pyirẹ z'ọfa-byi f'ebhondim, masi ọja-byi f'ọyaankpa ny'ibhon sabẹ maphyir. 10 Wa mamin ata p'abarẹ odik, ọmaana ẹka-chi ch'Ashẹra k'ogbeso kpenamkpen, ọmaana k'ofokodo kpenamkpen. 11 Makwọmọ insẹns k'ọja-byi f'ọyaankpa mach'nkọma s'iwa Ọvaar Ibinọkpaabyi ikk'okwubha id-isi, pira bẹ mapyirẹ ny'izek njo. Minna kw'masi adiktama p'awọhkọ Ọvaar Ibinọkpaabyi obhem ettem. 12 Mabir akpobha aka, chibhẹ ch'Ọvaar Ibinọkpaabyi ikk'bẹ obena bẹ́, "M'idikse nja, kasi." 13 Wa Ọvaar Ibinọkpaabyi otim agbaak-ettem ch'Ibinọkpaabyi pẹ maphyir, ọmaana ayok p'aze iyaan, ọtọr anọng p'Israẹl, ọmaana anọng p'Juda itọhng. Oben bẹ bẹ́, "Màkpa nnam bọra adiktama pabọnga. Màkpobha apaanga paam, ọmaana akpebhẹ paam, mator k'asana maphyir p'nnang ab'atte bẹ́, makpobha, ọmaana p'ntte ọbọhk nnang agbaak-ettem ch'Ibinọkpaabyi p'ade atọhmnọng paam."

14 Okenaka, wa bẹ m'itọhng kayong. Machina ororo agaangẹ nso, mach'ab'otte p'uwa nna nnam k'Ọvaar Ibinọkpaabyi, kw'ode Ibinọkpaabyi kwabẹ, aphe. 15 Wa mabhum asana pẹ, ọmaana echekẹ ch'iwa ikk'ọsa ọmaana ab'otte, ọmaana apaanga p'uwa ikk'bẹ itọhng ọtọra bẹ́, masok. Makpobha aka p'nna k'eden ayinẹ. Bẹ oyenẹ, m'ọttọhk áfẹ̀, kabir abanga. Chibhẹ ch'Ọvaar Ibinọkpaabyi ikk'bẹ itọhng ọtọra, bẹ́, "Bọnga nkkàsi mach'bẹ masi." Wa bẹ machina ororo asaana osisi kw'nkọma s'ining ikọbha bẹ.

16 Wa mabhum apaanga p'Ọvaar Ibinọkpaabyi, kw'ode Ibinọkpaabyi kwabẹ. Masi akpata afa, p'akerẹ abhaamva, ọmaana ọkpata kw'Ashẹra. Maraka nso, makpobha ekpo maphyir py'ọrọngkpakpa, ọmaana ọka f'Baal. 17 Mafọhnọ nja s'makwọmọ ajinọngva, ọmaana aminava pabẹ k'ekpon. Masi mbọhk ọmaana ọkkẹwọrọ. Mabir atte ifor sabẹ ọbọhk anang k'itama osisi k'ititika s'Ọvaar Ibinọkpaabyi, s'isẹ-ẹ obhem ettem.

18 Nya o, wa ettem epyibhẹ Ọvaar Ibinọkpaabyi mawuriji otima otor anọng p'Israẹl, obir ọkpa nnam ọbọra bẹ. Wa ẹkọma ch'Juda dẹ-dẹ ina erikẹ. 19 Ozeng k'ẹkọma ch'Juda, wa m'asana p'Ọvaar Ibinọkpaabyi, kw'ode Ibinọkpaabyi kwabẹ, kakpobh. Wa matorọ mmaana s'anọng p'Israẹl nkk'abhaaka. 20 Ofona nya, Ọvaar Ibinọkpaabyi obhum anọng p'Israẹl maphyir, osi bẹ itama, obir otte bẹ ọbọhk ọnang anọng p'anang bẹ irem maa, okwubh bẹ maphyir ny'ikẹ k'ititika.

21 K'ogbe kw'Ibinọkpaabyi ọbhaangẹ anọng p'Israẹl z'ẹnọmma ch'Devid, wa anọng p'Israẹl asi Jeroboam kw'ode nnwa kw'Nẹbat ovaarnọng kwabẹ. Jeroboam ọbọhra anọng p'Israẹl, ọwọhkọ bẹ masi epyibha chiden. 22 Anọng p'Israẹl achina ororo k'mpyibha s'Jeroboam maphyir. M'nnam kakpa abọrạ jẹ 23 maa, kwu pyirẹ k'ogbe kw'Ọvaar Ibinọkpaabyi okwubh bẹ z'ititika sẹ, otor mach'iwa ikk'agbaak-ettem ch'Ibinọkpaabyi p'ade atọhmnọng pẹ, otima ọtọr bẹ itọhng. Minna kw'uwa anọng p'Asiriya mabọk anọng p'Israẹl z'abẹ k'izek, mad-ayima ebira z'Asiriya. Maa, pyirẹ menda, anọng p'Israẹl aning z'Asiriya.

24 Wa ọvaarnọng kw'Asiriya otima anọng obina z'Babilọn, ọmaana Kuta, ọmaana Avva, ọmaana Hamat, ọttara Sẹpharvayim, okwu osok bẹ ny'Samariya otima otera anọng p'Israẹl. Matọka Samariya maphyir, maruk ny'ibhondim sẹ. 25 K'ogbe kw'matọm eruka nya, wa m'Ọvaar Ibinọkpaabyi kakpobh. Ofona nya, Ọvaar Ibinọkpaabyi ọtọhm nche ọnang bẹ. Nche njo ifhọ anọng banẹ. 26 Wa itekẹ kk'ọvaarnọng kw'Asiriya ipyira bẹ́, "Anọng p'atọk akwu asok z'ibhon s'Samariya, m'ọttọhk kazong f'ọka f'ẹkọma ndo ororọ. Ọka mvo k'nche ọtọhma ọnang bẹ. Nche njo ining za ifhọ bẹ, okurọ ch'nna ọttọhk azong f'ọka mvo ororọ."

27 Nya o, ọvaarnọng kw'Asiriya oke ẹfa bẹ́, "M'atima ọfọhn-ẹja wanẹ kw'mabọk k'ẹmmọri z'Samariya, akpa nnam, od-oruk ọmaana anọng mbo, obir okpebhẹ bẹ idik s'ọka f'ẹkọma ndo ororọ." 28 Minna kw'ọfọhn-ẹja wanẹ kw'nkk'akwubha z'Samariya ọkpa nnam, okwu oruk ny'Bẹtẹl, okpebhẹ bẹ ose kw'mm'akpobha Ọvaar Ibinọkpaabyi.

29 Okenaka, ẹkọma kpenamkpen ch'ening nya, esi ọka fabẹ ny'ibhon s'marukọ, mabir attima aka-pa ny'ọja-byi f'ọyaankpa f'anọng p'Samariya nkk'asa. 30 Anọng p'Babilọn asi Sukọt-Bẹnọt, anọng p'Kuta asi Nẹgal, anọng p'Hamat asi Ashima, 31 anọng p'Ava asi Nibhaz ọmaana Tartak. Anọng p'Sẹpharvayim akwọmọ iva pabẹ k'ekpon, matima afọhnọ nja anang Adramẹlẹk, ọmaana Anamẹlẹk, p'ade aka p'Sẹpharvayim. 32 Wa bẹ makpobh Ọvaar Ibinọkpaabyi, okenaka, wa mabir arọbha anọng pabẹ k'akira k'akira bẹ́, made afọhn-ẹja pabẹ z'ọja-byi f'ọyaankpa. 33 Wa bẹ makpobh Ọvaar Ibinọkpaabyi, okenaka, wa mabir akpobha aka pabẹ oyenẹ, k'ose kw'ẹmmaana ch'nkọma s'mabin akwu, ede.

34 Maa, pyirẹ menda, anọng mba atima asi itamadik sabẹ. Bẹ m'Ọvaar Ibinọkpaabyi kakpobh. M'akpebhẹ, ọmaana apaanga, ọmaana ntọhna, ọttara asana p'Ọvaar Ibinọkpaabyi ọnang iva p'iva p'Jekọb kw'obir okpena Israẹl, kabir akpobha. 35 Wa Ọvaar Ibinọkpaabyi osi echekẹ ọmaana anọng p'Israẹl, oben bẹ bẹ́, "M'aka ọdọk-ọdọk kakpobha, m'eso kabir araka anang bẹ, m'nja kabir afọhnọ anang bẹ. 36 Ọvaar Ibinọkpaabyi kw'otim ẹfa chiden, otima bọnga obina z'Ijip, ọmaana abarada pẹ, kẹ wọ kw'mm'akpobha. Kẹ wọ kw'mm'araka eso anang, mabir afọhnọ nja anang. 37 Bọnga mm'akonga asok apaanga, ọmaana ntọhna, ọttara asana p'ọkkẹrẹ ọnang bọnga. M'aka ọdọk-ọdọk, kàkpobha. 38 M'echekẹ ch'nsi mmaana bọnga kàzaama. M'aka ọdọk-ọdọk, kàkpobha. 39 Màtera kpobha Ọvaar Ibinọkpaabyi kw'ode Ibinọkpaabyi kwabọnga. Kẹ-kẹ wọ im'okpo bọnga ọrọhbha k'mbọhk s'awawunanọng pabọnga maphyir."

40 Okenaka, wa m'itọhng kayong. Machina ororo k'mmaanadik sabẹ. 41 Chibhẹ ch'iwa anọng mba mad-akpobha Ovaar Ibinọkpaabyi, wa mabir ad-akpobha akpata pabẹ. Maa, pyirẹ menda, iva pabẹ, ọmaana iva p'iva pabẹ, matim asi idik s'iwa ab'otte asi.