1 K'ogbe kw'uwa Ọvaar Ibinọkpaabyi min'otima bhaka-bhaka otima Ẹlaija ochina z'Ọvaarbhon kwẹ, ny'ogbe nwo, Ẹlaija ọmaana Elisha mad-abina z'Gilgal afon-ofona. 2 Ch'nd-azenga ny'eden o, Ẹlaija oben Elisha bẹ́, "Kọ ninga ma, kirẹ Ọvaar Ibinọkpaabyi kk'aam obena bẹ́, nchina z'Bẹtẹl."

Okenaka, Elisha oben bẹ́, "K'ose kw'Ọvaar Ibinọkpaabyi oruk akpen, kọ Ẹlaija abir aruk ọdọk, kaam kọ ọbọhk mìntte." Minna kw'matọnọ achina z'Bẹtẹl.

3 Mapyirẹ za o, ẹkaan ch'agbaak-ettem ch'Ibinọkpaabyi ch'ening ny'Bẹtẹl ekwu ẹbọbh Elisha bẹ́, "Ma, azong ma bẹ́, menda Ọvaar Ibinọkpaabyi m'otima atte ofon-ofona o?"

Elisha ọpọhna bẹ́, "Iye. Okenaka, màmyi nya."

4 Nya o, Ẹlaija oben Elisha bẹ́, "Ninga ma. Ọvaar Ibinọkpaabyi kk'aam obena bẹ́, nchina z'Jeriko."

Elisha ọpọhna bẹ́, "K'ose kw'Ọvaar Ibinọkpaabyi oruk akpen, kọ Ẹlaija abir aruk akpen, kaam kọ ọbọhk mìntte." Minna kw'matọnọ ẹkaan achina z'Jeriko.

5 Mapyirẹ za o, ẹkaan ch'agbaak-ettem ch'Ibinọkpaabyi ch'ening ny'Jeriko makwu abọbh Elisha bẹ́, "Ma, azong ma bẹ́, menda Ọvaar Ibinọkpaabyi m'otima atte ofon-ofona o?"

Elisha ọpọhna bẹ́, "Iye. Okenaka, màmyi nya."

6 Ẹlaija obira oben Elisha bẹ́, "Ninga ma, kirẹ Ọvaar Ibinọkpaabyi kk'aam obena bẹ́, nchina z'ọraanga kw'Jọrdan."

Elisha ọpọhna bẹ́, "K'ose kw'Ọvaar Ibinọkpaabyi oruk akpen, kọ abira aruk akpen, kaam kọ ọbọhk mìntte." Minna kw'matọnọ ẹkaan afona.

7 Ẹkaan ch'agbaak-ettem ch'Ibinọkpaabyi anọng arọbh afa okwuma ijobh, efona ed-ebe z'ororo, eze ibyi s'Ẹlaija ọmaana Elisha mabe ny'ọraanga kw'Jọrdan. 8 Ẹlaija ọwọra owurọ-baba kwẹ, ọkwọn-ọkwọnọ, obin ny'ọraanga. Ọraanga ọbhaangẹ agboka afa. Bẹ anọng afa, mazenga ny'ọgbaarẹ kw'ọraanga nwo, majeka.

9 Majek nya o, Ẹlaija ọbọbh Elisha bẹ́, "Tek-m ọttọhk f'm'nsi nnang-ọ pira matim-m afona arik-ọ ma."

Elisha ọpọhna bẹ́, "Tte nyena okebh f'egwugwuma chọ igbedim ifa."

10 Ẹlaija oben-ẹ bẹ́, "Ọttọhk f'aphyem-m ma, ọgaang-ọgaangẹ. Zaa ode ch'ode, óde aze-m ch'mm'atim-m afona, m'ode fọ ode. Okenaka, ína aze ch'matim-m afona, ọttọhk f'aphyemẹ, màyena."

11 K'ose kw'mad-azenga ny'eden agbaak idik, minna kw'ijaar s'nnyanya id-itọr s'itim ekpon, ọmaana nnyanya s'itim ekpon, iyinẹ, ibhaangẹ bẹ anọng afa. Bhaka-bhaka otinẹ Ẹlaija, otim-ẹ ochina z'obhon kw'Ibinọkpaabyi. 12 Elisha oze odik nwa nya o, obhom, oben bẹ́, "Atte kwaam! Atte kwaam! Ijaar s'nnyanya id-itọr, ọmaana ayaar-nnyanya p'Israẹl!" Elisha ọdọk kẹ koze. Ọtọka ẹfọrakpo py'Ẹlaija, ọyaakẹ pyẹ k'ibyi ifa.

13 Elisha odunga owurọ-baba kw'ofon z'Ẹlaija k'ifor otto ny'izek, otima od-obe ny'akonga p'ọraanga kw'Jọrdan. 14 Otima owurọ-baba nwo kw'Ẹlaija kw'ikk'ọtta, obin ny'ọraanga, oben bẹ́, "Ọvaar Ibinọkpaabyi kw'ode Ibinọkpaabyi kw'Ẹlaija kẹ?" K'ose kw'obinẹ owurọ-baba nwo ny'asi, ọraanga nwo ọbhaangẹ agboka afa. Ozenga nya, ojeka.

15 Ẹkaan ch'agbaak-ettem ch'Ibinọkpaabyi ch'ebin z'Jeriko ch'ening nya eze odik nwo, eben bẹ́, "Egwugwuma ch'Ẹlaija n'ening ọmaana Elisha." Minna kw'mabin akebha Elisha za, maraka nso k'ekpukpobha-maana, manang-ẹ. 16 Maben-ẹ bẹ́, "Kirẹ e, moyen atọhmnọng arọbh afa okwuma ijobh ma p'ayen ẹfa. Tte mafona mad-aror atte kwọ. Okpokpo ode bẹ́, Ọvaar Ibinọkpaabyi kk'ẹ ọtọka ọnana z'agbeso banẹ, wanẹma, kẹ osoka k'ilokodo janẹ."

Elisha ọpọhna bẹ́, "Mma e, m'bẹ katọhm e."

17 Agbaak-ettem ch'Ibinọkpaabyi mbo magbana odik nwo maa, mgbar isi Elisha. Minna kw'nobenẹ bẹ́, "Màtọhm bẹ." Matọhm agbaak-ettem ch'Ibinọkpaabyi anọng arọbh afa okwuma ijobh bẹ́, maror Ẹlaija. Maror-ẹ k'iwu ittaan, m'kẹ kaze. 18 K'ogbe kw'nna akpa nnam akebha Elisha z'Jeriko, oben bẹ bẹ́, "Wura bọnga kintekẹ bẹ́, maning ata?"

19 Anọng p'ebhondim ndo maben Elisha bẹ́, "Ttatta kwamina, kọ oyenẹ kk'azonga bẹ́, obhon nwoma oning k'ibyi ọkkọkka. Okenaka, asi pẹ kajibhẹ, izek sẹ kibir ijibh."

20 Elisha oben bẹ́, "Màtọka onung ke k'ogbobh-mbọhk ọbhakwẹ, nang-m." Minna kw'matọk anang-ẹ.

21 Nya o, Elisha ochina z'ekeka ndo, ọnyaanẹ onung mvo nya. Oben bẹ́, "Ma wọ ode odik kw'Ọvaar Ibinọkpaabyi obenẹ: ‘Kaam kk'asi mba nda. Ogbe kode kw'mm'abir atima obo akwu m'izek nja, wanẹma, masi ekpo ening ejibhẹ.’ " 22 Tọma za maa, pyirẹ menda, asi mbo atim ajibh-ojibh za k'ose kw'Elisha ikk'ọgbaaka.

23 Elisha obina ny'Jeriko bẹ́, ochina z'Bẹtẹl. Ch'od-ozenga ny'eden o, adikkobhva banẹ p'afon ny'obhon nwo, matima Elisha asi ekirẹ. Maben-ẹ bẹ́, "Ọwọbh-osokpa, bina ma! Ọwọbh-osokpa, bina ma!" 24 Elisha ọbhakẹ okkerẹ bẹ, ọnang bẹ ẹmma k'eche ch'Ọvaar Ibinọkpaabyi. Minna kw'nten mfa s'ikerẹ eche*, iyinẹ ny'ẹtam, iyaakẹ adikkobhva mbo p'ade anọng arọbh afa okwuma afa, k'akpa-k'akpa. 25 Elisha ozenga ochina z'egbe ch'Karmẹl. Obin nya, ọkpa nnam z'Samariya.