1 Ny'icho ttong ẹrọbh okwuma ittaan s'Joash kw'ode nnwa kw'Ahaziya otim ẹvaar ch'Juda, nya wọ kw'Jehoahaz kw'ode nnwa kw'Jehu oning z'Samariya ọbaabha Israẹl k'icho ichi kkamfa. 2 Wa osi itama z'ititika s'Ọvaar Ibinọkpaabyi okurọ ch'osi mpyibhase njo s'Jẹroboam kw'ode nnwa kw'Nẹbat, osi, s'iwọhkọ anọng p'Israẹl mabir asi epyibha. Wa Jehoahaz nnam kobir ọtọr k'itama osisi. 3 Minna kw'ettem epyibh Ọvaar Ibinọkpaabyi ẹmaana anọng p'Israẹl. Ofona nya, otte bẹ ọbọhk ọnang ọvaar Hazayẹl kw'Aram, ọmaana Bẹn-Hadad kw'ode nnwa kwẹ bẹ́, mabaabha bẹ.

4 Nya o, Jẹhoaz obhomọ ọkpẹkẹ Ọvaar Ibinọkpaabyi. Ọvaar Ibinọkpaabyi ọbhaang-ẹ, okurọ ch'oze irem s'ọvaarnọng kw'Aram ọyak ọbọhk ọnang anọng p'Israẹl. 5 Nya o, Ọvaar Ibinọkpaabyi ọtọhm ọkkaan ọnang anọng p'Israẹl, osi bẹ manaanga k'mbọhk s'anọng p'Aram. Minna kw'anọng p'Israẹl mabir akwu aruk k'ibhon sabẹ, k'ose kw'uwa makkikken aruk. 6 Okenaka, m'nnam katọrọ k'mpyibha s'ọsọhm kw'Jẹroboam osi, s'iwọhkọ anọng p'Israẹl asi epyibha. Machina ororo asi mpyibha njo. Wa mabir atte ẹka-chi ch'Ashera ọbọhk, ebe ny'Samariya.

7 Wa ogbongnọng mawan-wanẹ kw'Jẹhoaz korikẹ, kw'ọkpanẹ anọng arọbh afa okwuma ijobh p'ad-ayaar nnyanya, ọmaana ijaar ijobh s'nnyanya id-itọr, ọttara asoja nnọhna ẹrọbh okwuma nnọhna nchen p'izek. Ode ch'iwa ọvaarnọng kw'Aram ikk'ayok mboza ọfhakpo, osi bẹ maker ebonọ ch'ogbe kw'nd-agwuma abarli.

8 Idik njoza s'uwa iyinẹ k'ogbe kw'Jẹhoahaz ọbaabh, ọmaana idik mapyhir s'osi, ọttara mgbong s'okem, makkẹrẹ z'anwẹr p'avaar p'Israẹl. 9 Wa Jehoahaz ope otor ab'otte, manọhng-ẹ z'Samariya. Jehoash kw'ode nnwa kwẹ, okwu ọtọka ẹvaarninga chẹ

10 Ny'icho ttong ẹrọbh okwuma ichi kkamfa s'ọvaar Joash ọbaabh Juda, nya wọ kw'Jehoash kw'ode nnwa kw'Jehoahaz oning z'Samariya ọbaabha Israẹl k'icho ichi kawanẹ. 11 Osi itama z'ititika s'Ọvaar Ibinọkpaabyi. Nnam katorọ k'mpyibha s'Jẹroboam kw'ode nnwa kw'Nẹbat osi, s'iwa ọwọhkọ anọng p'Israẹl abir asi. Ochina ororo osi mpyibha njo.

12 Idik njoza s'iwa iyinẹ k'ogbe kw'Jẹhoahaz ọbaabh, ọmaana idik mapyhir s'osi, ọmaana ẹfa ch'otim orima ọvaar Amaziya kw'Juda ábẹ̀, makkẹrẹ z'anwẹr p'avaar p'Israẹl. 13 Wa Jehoash ope otor ab'otte za. Manọhng-ẹ z'Samariya, za ch'mad-anọhnga avaarnọng p'Israẹl. Jẹroboam okwu ọtọka ẹvaarninga chẹ.

14 Wa oyen ọkọhmaana f'ọd-ọmma Elisha. Elisha o, okwu ope ny'ọkọhmaana mvo. Jehoash kw'ode ọvaarnọng kw'Israẹl ọta ọd-ọzẹ-ẹ. Obhom-ẹ, oben bẹ́, "Ttatta kwaam e! Atte kwaam e! Ijaar s'nnyanya id-itọr e, ọmaana ayaar-nnyanya p'Israẹl e!"

15 Elisha oben-ẹ bẹ́, "Tọka oyuk ọmaana akọhn pẹ." Ọvaarnọng osi minna. 16 Pira oben ọvaarnọng kw'Israẹl bẹ́, "Tọka oyuk nwo tima ny'mbọhk." Ọtọk nya o, Ẹlisha ọnana mbọhk sẹ ny'ọvaarnọng k'mbọhk.

17 Oben-ẹ bẹ́, "Gwunga ọmma nwo kw'ofum kw'okkerẹ za ch'ewuchen ed-eyin." Ọvaarnọng ogwunga wẹ. Ẹlisha oben-ẹ bẹ́, "Tta!" Ọvaarnọng ọtta. Ẹlisha obir oben-ẹ bẹ́, "Oyuk kw'Ọvaar Ibinọkpaabyi kw'ekema, oyuk nwo kw'okem anọng p'Aram! Kọ m'afhọ anọng p'Aram kibung-kibungọ z'Aphẹk."

18 Nya o, oben ọvaarnọng bẹ́, "Tọka akọhn mbo." Minna kw'ọvaarnọng ọtọk akọhn mbo. Elisha oben-ẹ bẹ́, "Bin akọhn ny'izek." Obin pẹ ny'izek igbedim ittaan, pira ọkpọka. 19 Ettem ekwu epyibh ọgbaak-ettem ch'Ibinọkpaabyi ẹmaana ọvaarnọng. Oben-ẹ bẹ́, "Wúra ábinẹ ayuk mbo igbedim ichen ny'izek, wanẹma, igbedim ichadanẹ, nya wọ kw'uwura ikk'anọng p'Aram akema kibung-kibungọ. Okenaka, min'akema bẹ igbedim ittaan jẹ-jẹ."

20 Elisha okwu ope, manọhng-ẹ.

Ẹkaan ch'akikọhra ch'efon Moab ed-edim ny'ẹkọma ndo k'etitebhẹ kpenamkpen ẹyak bẹ edik. 21 K'ogbe wanẹ, ch'anọng p'Israẹl ad-anọhnga ojinọng wanẹ, maze ẹkkaan ndo ch'akikọhra ch'ed-ekwu okwu. Minna kw'masẹr-ọsẹr atọka offuranọng nwo abharẹ z'epekwuk ch'Elisha. K'ose kw'offuranọng nwo otwu akọbhọ p'Ẹlisha z'epekwuk, minna kw'ọphyabh, obina obobe.

22 Ny'ogbe nwo maphyir kw'Jehoahaz ọbaabh Israẹl, wa ẹkọma ch'Israẹl ening k'irem s'ọvaar Hazayẹl kw'Aram. 23 Okenaka, wa Ọvaar Ibinọkpaabyi osi ọphyaam ọnang bẹ, obir oze bẹ okwo, obir ọkọhka bẹ bẹ́, mayik-ẹ k'ettem, okurọ echekẹ ch'ochekẹ ọnang Abraham, ọmaana Isaak, ọttara Jekọb. Maa, pyirẹ menda, kẹ kọkamẹ bẹ́, m'ọfhọ bẹ, wanẹma, okwubh bẹ k'ikẹ k'ititika.

24 Ọvaar Hazayẹl kw'Aram okwu ope. Bẹn-Hadad kw'ode nnwa kwẹ, okwu ọtọka ẹvaarninga chẹ. 25 Nya o, Jehoash kw'ode nnwa kw'Jehoahaz ọkpa nnam ọna Bẹn-Hadad kw'ode nnwa kw'Hazayẹl ibhon njo s'uwa ikk'ọtọka k'egbong z'Jehoahaz kw'ode otte kwẹ. Jehoash okema Bẹn-Hadad igbedim ittaan. Minna wọ kw'obir ọkpa nnam ọtọka ibhon njo s'anọng p'Israẹl.