1 K'ogbe kw'Ọvaar Hezekiya ọbhaang odik nwo nya o, minna kw'ọyaakẹ ọbara f'ọfọr, nọfọra abara-tama, otima ochina z'Ọsọhm kw'Ọvaar Ibinọkpaabyi. 2 Hezekiya ọtọhm Ẹliyakim kw'ode okker-idik s'odimpa, ọmaana Shẹbna kw'ode ọkkẹrẹ, ọttara aso p'afọhn-ẹja z'Izaya kw'ode nnwa kw'Amọs, obir ode ọgbaak-ettem ch'Ibinọkpaabyi. Bẹ maphyir mafọra abara-tama atima achina za. 3 Matek-ẹ bẹ́, "Ọvaar Hezekiya obenẹ bẹ́, Menda wọ ode ewu ch'ottemgbaaka, ọmaana ch'ẹgbọbhọ, ọttara ch'igbardik. Ewu nda ebir ede mach'kwanọng kw'ọmaan ọbọk-ẹ, pira ẹfa koyen ch'otim ọmaan. 4 Ṉ́nòsi, Ọvaar Ibinọkpaabyi kw'ode Ibinọkpaabyi kwọ, m'ọbhaanga idik njo maphyir s'ọvaarnọng kw'Asiriya ikk'ogbongso-nọng kwẹ ọtọhma bẹ́, otima okwu ọlọhkọ Ibinọkpaabyi kw'orukọ akpen, obir otima idik njo ọgbọbhọ ogbongso-nọng nwo k'idik s'Ọvaar Ibinọkpaabyi kw'ode Ibinọkpaabyi kwọ, ikk'ọbhaanga. Ofona nya, ze njọm bẹ́, anọng p'arik-orik, manaanga."

5 K'ogbe kw'osonọng kw'ọvaar Hezekiya makwu akebha Izaya, 6 Izaya oben bẹ bẹ́, "Màtek ttatta kwabọnga bẹ́, ‘Ọvaar Ibinọkpaabyi obenẹ bẹ́: Tte oning bọnga ojor ny'idik s'nkk'abhaanga s'ọvaarnọng kw'Asiriya ọgbaakẹ bẹ́, otima opyina eche chaam. 7 Màyonga itọhng! Ogbe kw'kẹ im'ọbhaanga ẹkkaabha danẹ, kaam m'nsẹ-ẹ oyena ochibhẹ bẹ́, ọkpa nnam z'ẹkọma chẹ oyenẹ. Nya wọ kw'mm'atima ọkkangkkang afhẹ-ẹ.’ "

8 K'ogbe kw'ogbongso-nọng nwo ọbhaang bẹ́, ọvaarnọng kk'obina z'Lakish, minna kw'ogbongso-nọng nwo ọtọr ifor, od-okebha ọvaarnọng za ch'od-orima Libna ábẹ̀.

9 Senakerib okwu ọbhaanga ẹkkaabha bẹ́, Tirhaka, kw'ode ọvaarnọng kw'Kush, okwuma z'eden bẹ́, orim-ẹ ábẹ̀. Minna kw'kẹ Senakerib obir ọtọhm azeng-eden pẹ ẹkkaabha z'Hezekiya bẹ́, 10 "Màtek Hezekiya kw'ode ọvaarnọng kw'Juda bẹ́, oning ọka f'ophe nnam ọbọhk otte ọbọhr-ẹ, ch'od-oben bẹ́, ‘Jẹrusalẹm k'mbọhk s'ọvaarnọng kw'Asiriya mòtto.’ 11 K'odik ọkkọkka, kọ kk'abhaanga k'ose kw'ọvaarnọng kw'Asiriya ikk'nkọma njoza maphyir, odima. Ma, achibhẹ bẹ́, kọ wọ im'anaanga yirẹ? 12 Ma, wa aka p'nkọma njo s'iwa ab'ttatta p'achi-m eden abaabha mavọhkọ, nkk'nkọma njo akkaana o, mbenẹ aka p'Gozan, ọmaana p'Haran, ọmaana p'Rẹzẹph, ọttara p'anọng p'Eden p'aning z'Tẹl-Assar? 13 Ọvaarnọng kw'Hamat ọmaana kw'Arpad kẹ o? Avaar p'Lair, ọmaana p'Sẹphavayim, ọmaana p'Hẹna, ọttara p'Ivva kẹ?"

14 Hezekiya ọtọka ẹkkaabha ndo ny'azeng-eden mbo k'mbọhk oyerẹ. Nya kw'obin ofona z'Ọsọhm kw'Ọvaar Ibinọkpaabyi, ọtọka ẹkkaabha ndo ọjẹ ny'ititika s'Ọvaar Ibinọkpaabyi. 15 Oze njọm ọnang Ọvaar Ibinọkpaabyi bẹ́, "O Ọvaar Ibinọkpaabyi kw'ode Ibinọkpaabyi kw'Israẹl, kw'ọnan ẹvaar-ẹvaar ny'ottem kw'achẹrubim. Kọ-kọ wọ ade Ibinọkpaabyi kw'ọbaabh nkọma s'iyagbin maphyir. Kọ wọ asi ẹrọng ọmaana izek. 16 O Ọvaar Ibinọkpaabyi, yonga itọhng abhaanga mawuriji, abir awonga achen pọ aze ẹkkaabha ch'Senakerib ọtọhmọ bẹ́, otima olukọ kọ Ibinọkpaabyi kw'oruk akpen.

17 "O Ọvaar Ibinọkpaabyi, ode majijik bẹ́, ọvaarnọng kw'Asiriya kk'nkọma njoza ọmaana izek sabẹ itama ọsa. 18 Bẹ nkk'aka pabẹ akwọma k'ekpon, mabir avọhkọ bẹ, okurọ bẹ́, wa bẹ m'Ibinọkpaabyi kade. Makenka ade nchi, ọmaana ata p'oyokinọng otim mbọhk, osi. 19 Ofona nya, o Ọvaar Ibinọkpaabyi kw'ode Ibinọkpaabyi kwamina, kkaana, arọhbha mina k'mbọhk sẹ, ọfha nkọma s'iyagbin maphyir izonga bẹ́, kọ Ọvaar Ibinọkpaabyi, kọ-kọ wọ ade Ibinọkpaabyi."

20 Nya o, Izaya kw'ode nnwa kw'Amos, ọtọhm ẹkkaabha ọnang Hezekiya bẹ: "Ma wọ ode odik kw'Ọvaar Ibinọkpaabyi, kw'ode Ibinọkpaabyi kw'Israẹl ọgbaakẹ: Kaam k'njọm sọ s'imaan Senakerib kw'ode ọvaarnọng kw'Asiriya, mmaanga. 21 Ọgbaakadik kw'Ọvaar Ibinọkpaabyi ikk'ọgbaaka kw'ọmaan Senakerib ode bẹ́:

" ‘Zayọn kw'ode okwura-kwura

oluk-ọ olukọ, obir ọmmọ-ọ asa.

Ominanwa kw'ode Jẹrusalẹm

owokọ eso chẹ k'ose kw'ikọ arọbhọ.

22 Bọng-ọnọng wọ kw'kọ ad-alọhkọ,

abir apyina eche?

Anyi wọ kw'ikọ ad-atima k'ẹmma, abir annenẹ?

Ibinọkpaabyi kw'Awuriji kw'Israẹl wọ yirẹ?

23 Kk'azeng-eden pọ atima alọhkọ Ọvaar Ibinọkpaabyi.

Kk'abir abena bẹ́,

"Kk'ijaar saam s'nnyanya id-itọr k'ọsaabh,

ntima mvura agbeso p'agor-ogorọ,

p'ade agbeso p'agorọ ọtam ny'Lẹbanọn.

Kaam kk'sida-chi s'igorọ ọtam nkkọhbha mmarẹ k'izek,

ọttara nchi s'junipa s'ijibhẹ ọtam.

Kaam kk'mbir mpyira z'ẹtaang-ẹtaanga kw'ẹtam ch'Lẹbanọn,

ch'ede ẹtam ch'ejibhẹ ẹyọhnga ayok.

24 Kaam kk'nsipe ntuma z'nkọma ọdọk-ọdọk,

mbir ngwo asi nya.

Kk'mmokpatọkọ saam

ntima nsi nkeka s'Ijip, igwu maphyir."

25 " ‘Kọ odik nwo atim abhaanga o?

Ogbe kk'obhira kw'nsi wẹ nsok minna;

Wa k'ẹtama kw'mphyikẹ nsok minna;

ma, n'nsi wẹ ode minna

bẹ́, kọ k'ibhondim s'ide ọfa-byi abhaka,

nide ata-kkin.

26 Anọng pabẹ p'ẹfa ikk'bẹ ẹsa,

maninga kk'oforpyibha, ọttara k'mgbar.

Bẹ made mach'ekpo py'owonọ,

py'ẹram omimen,

ọmaana mach'azizaarẹ p'amenẹ z'ipubhaang

p'echekira esi bẹ, mayọhna.

27 " ‘Okenaka, kaam nzong ibyi s'aning ma,

mbir nzonga ogbe kw'akwu, ọmaana ogbe kw'afon,

ọttara ose kw'ettem epyibh-ọ ẹmaan-m.

28 Ch'ettem ikk'ọ epyibha ẹmaan-m minna,

ọmaan ch'ẹnọng-myaana chọ ikk'aam ẹtta k'itọhng,

kaam m'mgban-ọ aga kwaam ny'ikọ k'isung,

mbir nke odik-pe kwaam ny'ẹmma chọ,

Kaam m'nsọ-ọ, akpa nnam

z'eden ch'azeng akwu.’

29 "Kọ Hezekiya, ẹkọhka ch'im'nsi nnang-ọ ede bẹ́:

"M'icho nwa, kọ m'achi ekpo py'ẹbhọk-ọbhọk,

ottong icho ifa, kọ m'abir achi ekpo py'ekwurọ nya.

"Ṉ́nòde icho kw'ottong ittaan, kọ zeng mmo gbon ekpo, abir apha,

Tubh iwonọ s'agrep, abir achi achiduk p'afon nya.

30 Bọnga mbo p'marik-orik, p'manaang ny'ọsọhm kw'Juda,

mm'attima ẹranga z'izek, obir ojibh ọnang bọnga.

31 Anọng p'arik-orik m'abina z'Jẹrusalẹm,

ọmaana z'egbe ch'Zayọn k'ọsaabh.

"Ọvaar Ibinọkpaabyi kw'ẹfa mapyhir, kw'od-ochera obo k'idik, kk'obena bẹ́, m'osi minna.

32 "Ofona nya, odik kw'Ọvaar Ibinọkpaabyi ọgbaakẹ kw'ọmaan ọvaarnọng kw'Asiriya ode bẹ́:

" ‘Kẹ m'ebhondim nda, mòdim,

oyuk kwẹ, nya mọtta.

Ogbongtergba mòtima odim nya,

egbong nya mobir oyima.

33 Ọvaar Ibinọkpaabyi kk'obena bẹ́, ny'eden ndo ch'ozeng okwu, nya kw'im'obir ozenga, ọkpa nnam;

kẹ m'ebhondim ndoma, mòdim.

34 Kaam m'nzenga Eche chaam ábubẹ̀, ọmaana ch'Devid kw'ode ọtọhmnọng kwaam,

nkaam ebhondim nda, mbir nkkaana dẹ.’ "

35 Ny'orungiwu nwo, ozeng-eden kw'Ọvaar Ibinọkpaabyi ochina z'ibhinga-byi s'anọng p'Asiriya, ọfhọ anọng nnọhna arọbh afa okwuma nchadanẹ okwuma arọbh ijobh okwuma ijobh. Ch'anọng p'Asiriya aphyabh ny'ekpebha o, nnaze affuranọng bẹ-bẹ k'ibyi kpenamkpen. 36 Minna kw'ọvaar Senakerib kw'Asiriya obikẹ ny'ibhinga-byi njo. Ọkpa nnam, od-oruk z'Ninẹvẹ.

37 K'ewu danẹ, ch'Senakerib oning nya okpobh Nisrok kw'ode ọka fẹ ny'ọkasọhm, Adramẹlẹk, ọmaana Sharẹzẹ p'ade ajinọngva pẹ, matima ọkkangkkang akebh-ẹ nya, mafhẹ-ẹ. Marọbh achina z'ẹkọma ch'Ararat. Esarhadọn kw'ode ojinọngnwa kwẹ, okwu ọtọka ẹvaarninga chẹ.