1 Ny'icho ttong ichenọmfa s'Jehu ọbaabh Israẹl, nya kw'masi Joash ẹvaar, oninga z'Jẹrusalẹm ọbaabha k'icho arọbh afa. Wa ọkka kwẹ okpen Zibiya, kw'ofon Beershẹba. 2 Joash osi idik ọkkọkka z'Ọvaar Ibinọkpaabyi k'ititika ny'icho njo maphyir s'Jehoyada kw'ode ọfọhn-ẹja ọnang-ẹ ntọhna. 3 Okenaka, wa aka p'ọyaankpa kọrọhbh. Anọng achina ororo mad-afọhnọ nja, mabira akwọmọ insẹns nya.

4 Joash oben afọhn-ẹja bẹ́, "Màtọka ikpuka njo s'nnanga s'iwur-owur maphyir s'anọng atim akwu z'Ọsọhm kw'Ọvaar Ibinọkpaabyi, ọmaana s'matọk k'ẹnọngbhika, ọmaana ikpuka s'anọng achekẹ bẹ́, mm'anang, ọttara njo s'ibin anọng z'ettem bẹ́, matima akwu z'Ọsọhm kw'Ibinọkpaabyi. 5 Tte ọfọhn-ẹja kpenamkpen, ọtọka akpuka k'ọye-kpa wanẹ, p'mm'atima ado ọttọhk kpenamkpen f'maze bẹ́, okibh-okibhẹ ny'Ọsọhm kw'Ọvaar Ibinọkpaabyi."

6 Okenaka, k'icho ẹrọbh okwuma ittaan s'ọvaar Joash ọbaabh, afọhnọ-ẹja mbo, m'Ọsọhm nwo kw'Ọvaar Ibinọkpaabyi kado. 7 Ofona nya, ọvaar Joash oyerẹ Jehoyada kw'ode ọfọhn-ẹja, ọttara afọhn-ẹja mboza. Ọbọbh bẹ bẹ́, "Osempira m'ekpo mbyo py'ekibhẹ z'Ọsọhm kw'Ọvaar Ibinọkpaabyi kad-ado? M'ọdọk akpuka z'aye-kpa pabọnga, katọka. Nn'tte ọbọhk, matima ado Ọsọhm kw'Ọvaar Ibinọkpaabyi." 8 Nya o, afọhn-ẹja mbo achera bẹ́, bẹ m'ọdọk akpuka z'anọng mbo k'mbọhk matọka. Mabir aben bẹ́, bẹ azang mm'azeng mmo mado Ọsọhm kw'Ibinọkpaabyi.

9 Jehoyada kw'ode ọfọhnọ-ẹja, ọtọka ikwukwu janẹ odwu ọmma ny'ọkpa kwẹ. Ọtọka jẹ osok ẹbhaakẹ danẹ ch'odimbọhk kw'ija-byi, k'ose kw'im'adim z'Ọsọhm kw'Ọvaar Ibinọkpaabyi. Afọhn-ẹja mbo p'akkerẹ ẹsọhmma ndo, make ikpuka njo maphyir s'anọng atim akwu, ny'ikwukwu njo, ny'Ọsọhm kw'Ọvaar Ibinọkpaabyi . 10 Ogbe kpenamkpen kw'maze bẹ́, akpuka p'ayik ny'ikwukwu njo kk'asaabha, ọkkẹrẹ kw'avaar ọttara ọfọhn-ẹja kwiden, mm'akwu abhik akpuka mbo p'anọng nkk'atima akwa ny'Ọsọhm kw'Ọvaar Ibinọkpaabyi, pira nn'acha ake k'mkpa. 11 K'ogbe kw'nkk'okpukabhik azonga, matọka anang anọng p'marọhbh bẹ́, makkerẹ ọtọhm f'Ọsọhm kw'Ibinọkpaabyi. Ikpuka njo jọ s'iwa mad-atima akpe anọng p'asi ọtọhm ny'Ọsọhm kw'Ibinọkpaabyi kw'ode agwọhr-agbaaka, ọmaana attim-isọhm, 12 ọmaana ayik-isọhm, ọttara aphaak-ata. Madebh agbaaka, ọttara ata p'nkk'adoka, p'mm'atima ado Ọsọhm kw'Ọvaar Ibinọkpaabyi. Ikpuka njo jọ s'iwa mabir ad-atima asi idik zẹkẹ-zẹkẹ njoza maphyir s'imaan ẹda ch'Ọsọhm kw'Ọvaar Ibinọkpaabyi.

13 Wa m'akpuka p'matim akwu z'Ọsọhm kw'Ọvaar Ibinọkpaabyi katim asi agbobh-mbọhk p'silva, ọmaana ẹfangba, ọmaana agbobh-mbọhk p'asi ochichakẹ, ttara nnyisa, wanẹma, ekpo ọdọk-ọdọk py'Ọsọhm kw'Ọvaar Ibinọkpaabyi, py'matim gol, wanẹma, silva, asi. 14 Wa mad-atọka akpuka mbo anang atọhmnọng. Bẹ mabir atima akpuka mbo mado Ọsọhm kw'Ọvaar Ibinọkpaabyi. 15 Wa m'anọng mbo p'manang akpuka kayerẹ bẹ́, matek bẹ ose kw'malukọ akpuka mbo k'atọhmnọng, okurọ bẹ́, wa ẹmmaana chabẹ etor-otor. 16 Wa m'akpuka p'afon k'nnanga s'edik-tuka, ọmaana s'nnanga s'epyibha, kad-atima adim z'Ọsọhm kw'Ọvaar Ibinọkpaabyi. Wa akpuka mbo made p'afọhn-ẹja.

17 M'ogbe nwa, ọvaar Hazayẹl kw'Aram obin od-orima obhon kw'Gat ábẹ̀, okema. Minna kw'ọbhakẹ nya, obir orima Jẹrusalẹm ábẹ̀. 18 Okenaka, ọvaar Joash kw'Juda ọtọka ekpo py'ewur-owur maphyir, py'Jehoshaphat, ọmaana Jehoram, ọttara Ahaziya p'acheden abaabha Juda, matte ọbọhk anang Ibinọkpaabyi, ọmaana nnanga s'ikẹ oyenẹ ikk'ọbọhk ọtta, ọnang Ọvaar Ibinọkpaabyi, ọttara gol kw'oze z'nkwurukpa s'Ọsọhm kw'Ọvaar Ibinọkpaabyi, ọmaana z'ọvaar-odimpa. Ọtọhm ekpo mbyo maphyir ọnang ọvaar Hazayẹl kw'Aram. Pira wa n'ọtọrọ nnam z'Jẹrusalẹm.

19 Idik njoza s'iyinẹ k'ogbe kw'Joash ọbaabh, ọttara idik s'osi maphyir, makkẹrẹ z'anwẹr p'avaar p'Juda. 20 Wa atọhmnọng pẹ machẹ-ẹ ikwu, mafhẹ-ẹ z'Bẹt-Millo, z'eden ch'echin z'Silla. 21 Atọhmnọng mbo p'uwa mafhẹ-ẹ made, Jozabad kw'ode nnwa kw'Shimẹyat, ọmaana Jehozabad kw'ode nnwa kw'Shomẹr. Wa Joash ope, manọhng-ẹ za ch'manọhng ab'ttatta pẹ, z'ebhondim ch'Devid. Amaziya kw'ode nnwa kwẹ, okwu ọtọka ẹvaarninga chẹ.