1 Wa Elisha kw'ode ọgbaak-ettem ch'Ibinọkpaabyi, oyerẹ ojinọng wanẹ kw'ẹkaan ch'agbaak-ettem ch'Ibinọkpaabyi, oben-ẹ bẹ́, "Tima odikpa kwọ bọka ọnọhma-baba kwọ. Tọka ogberenwa nwoma kw'ana p'oliv, tima china z'Ramọt-Gilead. 2 Ápyirẹ za, ror Jehu kw'ode nnwa kw'Jehoshaphat kw'ode nnwa kw'Nimshi. Akebh-ẹ za, tim-ẹ bina nya ch'ayok aning, atim-ẹ adim z'idongọ s'ẹtaanga. 3 Bir tọka ana p'ogberenwa nwo abyeng-ẹ ny'eso, aben bẹ́, ‘Ma wọ ode odik kw'Ọvaar Ibinọkpaabyi obenẹ bẹ́: Kaam nsọ-ọ ẹvaar ch'Israẹl.’ Íkk'asa minna, gwunga ọmma, arọbh; ogbe kakibhẹ!"

4 Minna kw'odikkobhnwa nwo kw'ode ọgbaak-ettem ch'Ibinọkpaabyi, obin ozeng z'Ramọt-Gilead. 5 Opyirẹ za o, oze adidennọng mbo p'agbongnọng ch'maning ẹwọr k'ibyi majanẹ. Oben oso kwabẹ bẹ bẹ́, "Nyen ẹkkaabha ch'm'nnang-ọ."

Jehu ọbọbh bẹ́, "Anyi wọ oyen ẹkkaabha oyenẹ ndo ma?"

Kẹ ọpọhna bẹ́, "Kọ oso kw'agbongnọng e."

6 Jehu obina odim z'ọsọhm. Minna kw'ọgbaak-ettem ch'Ibinọkpaabyi nwo obyeng Jehu ana mbo ny'eso, oben bẹ́, "Ọvaar Ibinọkpaabyi, kw'ode Ibinọkpaabyi kw'Israẹl obenẹ bẹ́, ‘Kaam nnyaan-ọ bẹ́, ade ọvaarnọng kw'Israẹl, p'ade anọng p'Ọvaar Ibinọkpaabyi. 7 Kọ m'adimẹ ẹsọhmmọr ch'Ahab kw'ode atte kw'otim-ọ otima. Kaam m'ntuka obo kw'atọhmnọng paam, p'ade agbaak-ettem ch'Ibinọkpaabyi. M'mbir ntuka obo kw'atọhmnọng maphyir p'Ọvaar Ibinọkpaabyi p'Jẹzẹbẹl, ọfhọ. 8 Ẹsọhmmọr ch'Ahab kibungọ, m'edimẹ. Kaam m'mfhọ maa, mpyirẹ k'okpongannam kw'ẹsọhmmọr ch'Ahab ny'Israẹl, zaa ode obira, wanẹma, ọmmaana. 9 Kaam m'nsi ẹsọhmmọr ch'Ahab ede mach'ẹsọhmmọr ch'Jeroboam kw'ode nnwa kw'Nẹbat, mbir nsi chẹ ede mach'ẹsọhmmọr ch'Baasha kw'ode nnwa kw'Ahija. 10 Ṉ́nòde Jẹzẹbẹl, mffa jọ m'ichẹ-ẹ k'agboka z'izek s'Jẹzrẹl. Ọnọng- gbọm mòninga kw'im'ọnọhng-ẹ.’ " Nya o, ọgbaak-ettem ch'Ibinọkpaabyi nwo, ogwung ọmma, ọrọbh ofona.

11 K'ogbe kw'Jehu obin okebha ayok agbongnọng za, oyok wanẹ ọbọbh-ẹ bẹ́, "Mba idik maphyir ide mbengana ma o? Odingidingẹ nwa okwu oror-ọ k'ambọng-o?"

Jehu ọpọhna bẹ́, "Kọ azong ojinọng oyenẹ ma, ọmaana abena pẹ."

12 Bẹ maben bẹ́, "Minna kode! Gbaak mina."

Nya o, Jehu oben bẹ́, "Odik kw'otek-m ode bẹ́, ‘Ọvaar Ibinọkpaabyi obenẹ bẹ́, kaam nsọ-ọ ọvaarnọng kw'Israẹl.’ "

13 Minna kw'masẹr-ọsẹr atọka anọhma-baba pabẹ, majẹ ny'abhukakpa bẹ́, ọbarẹ. Pira maje enyisa, mabir akwọhrọ k'ẹrọng bẹ́, "Jehu ode ọvaarnọng!"

14 Wa Jehu kw'ode nnwa kw'Jehoshaphat kw'ode nnwa kw'Nimshi, ochi Joram ikwu. (M'ogbe nwa, wa Joram kk'anọng p'Israẹl maphyir otima ọd-ọkaam Ramọt-Gilead k'mbọhk s'ọvaar Hazayẹl kw'Aram. 15 Okenaka, wa ọvaar Joram kk'nnam ọkpa z'Jẹzrẹl bẹ́, oninga nya, ogbobhọ abhaak p'ekpo py'anọng p'Aram nkk'ẹ amuma z'egbong ch'orim ọmaana ọvaar Hazayẹl kw'Aram.) Jehu oben bẹ́, "Ó̱de ọ́daak bọnga bẹ́, masi-m ọvaarnọng, tte ọnọng mawan-wanẹ oning osi bẹ́ myiọr, obina m'ebhondim, ọd-ọgbaak odik nwa z'Jẹzrẹl." 16 Minna kw'obin oyika k'ọkpaar kwẹ kw'ẹnyanya ẹd-ẹtọr, ọyaar ozeng z'ẹkọma ch'Jẹzrẹl, okurọ bẹ́, wa Joram oning za okwoka ọwọhng, ọmaana bẹ́, ọvaar Ahaziya kw'Juda, kk'ochina za bẹ́, ọd-ọzẹ-ẹ.

17 K'ogbe kw'okker-obhon obe z'ẹrọng kw'ọttangara kw'Jẹzrẹl, oze ẹkaan ch'agbongnọng p'Jehu ch'ed-ekwu z'eden, obok ẹmọng oben bẹ́, "Nze ẹkaan ch'agbongnọng banẹ ch'ekwuma z'eden."

Joram o, oke ẹfa bẹ́, "Màyerẹ ọyaar-ẹnyanya, màtọhm-ẹ bẹ́, okebha bẹ za, ọbọbh bẹ bẹ́, ‘Ma, makwu k'ọdaam o?’ "

18 Ọyaar-ẹnyanya nwo ọyaar okebha Jehu, oben-ẹ bẹ́, "Ọvaarnọng obenẹ bẹ́, nkwu mbọbh-ọ bẹ́, ‘Ma, makwu k'ọdaam o?’ " Jehu ọpọhn-ẹ bẹ́, "Kọ matima ọdaam asi mbọng o?" "Tera yak-m nnam ma e."

Okker-obhon otek ọvaarnọng bẹ́, "Ozeng-eden kk'opyira za ch'maning e, okenaka, ọdọk nnam mọkpa e."

19 Ofona nya o, ọvaarnọng ọtọhm ọyaar-ẹnyanya ttonga afa. Opyirẹ za, ọbọbh bẹ bẹ́, "Ọvaarnọng obenẹ bẹ́, nkwu mbọbh-ọ bẹ́, ‘Ma, makwu k'ọdaam o?’ " Jehu ọpọhn-ẹ bẹ́, "Kọ matima ọdaam asi mbọng o? Tera yak-m nnam e."

20 Okker-obhon nwo otek ọvaarnọng bẹ́, "Ozeng-eden kk'opyira za ch'maning e. Okenaka, kẹ ọdọk nnam mobir ọkpa e. Ọyaara nwo okkerẹ kw'Jehu, kw'ode nnwa kw'Nimshi. Kẹ ọd-ọyaar mach'odingidingẹ e."

21 Minna kw'Joram oke ẹfa, oben bẹ́, "Màdo ọkpaar nwo kwaam kw'ẹnyanya ẹd-ẹtọr k'ose kw'm'ntima." Macher nya o, ọvaar Joram kw'Israẹl, ọmaana ọvaar Ahaziya kw'Juda mabina, ọnọng-ọnọng ọyaar k'ọkpaar kwẹ kw'ẹnyanya ẹd-ẹtọr bẹ́, makebha Jehu za. Mad-akebh-ẹ z'izek s'iwa ide s'Nabọt kw'ofon Jẹzrẹl. 22 Joram oze Jehu nya o, ọbọbh bẹ́, "Jehu, ma akwu k'ọdaam o?"

Jehu ọpọhn-ẹ bẹ́, "Ọdaam m'osi yen oninga, ch'aka maphyir okpukpobha, ọmaana ọtaan f'Jẹzẹbẹl kw'ode akka vọ obirẹ?"

23 Minna kw'Joram ọbhakẹ nnam ọrọbh, od-owon Ahaziya bẹ́, "Ahaziya, rọbh o! Ẹbọhra dọ e!"

24 Nya o, Jehu ọtọr oyuk kwẹ, ọtta Joram ny'ottem kw'amaangọ. Oyuk nwo ọnwẹ-ẹ maa, opyir-ẹ z'ettem. Minna kw'ọrẹr-ẹ, otto ny'ẹtaanga kw'ọkpaar kwẹ kw'ẹnyanya ẹd-ẹtọr. 25 Jehu oben Bidka kw'od-okkerẹ ọkpaar kwẹ kw'ẹnyanya ẹd-ẹtọr bẹ́, "Tin-ẹ bharẹ z'owonọ nwo kw'uwa Nabọt kw'ofon Jẹzrẹl oyen. Jima ose kw'uwa kọ ọttara kaam mọd-ọtọn ọyaar k'ijaar s'nnyanya id-itọr, mọyakẹ Ahab kw'ode otte, nnam. Nya kw'Ọvaar Ibinọkpaabyi ọgbaakẹ itama nja ọmaan-ẹ bẹ́, 26 ‘Chena, kaam Ọvaar Ibinọkpaabyi nze izẹ s'Nabọt ọmaana izẹ s'ajinọngva pẹ. K'odik ọkkọkka, etuna kede bẹ́, kaam m'nsọ-ọ atuk ọzẹ mvo m'izek njoma. Kaam Ọvaar Ibinọkpaabyi wọ mgbaakẹ.’ Ofona nya, tin-ẹ bharẹ z'izek njo, k'ose kw'ọgbaakadik kw'Ọvaar Ibinọkpaabyi obenẹ."

27 K'ogbe kw'Ọvaar Ahaziya kw'Juda oze odik kw'ikk'oyina, ọrọbh ochorọ eden ch'ezengẹ z'Bẹt-Haggan. Jehu okwubh-ẹ, od-obok z'ẹmma bẹ́, "Màbir fhọ kẹ!" Minna kw'mamum-ẹ ekpo ny'ẹtaanga kw'ọkpaar kwẹ kw'ẹnyanya ẹd-ẹtọr, nya ch'ọd-ọrọbh ny'eden bẹ́, ochina z'Gur kw'ọnyọm Ibleam. Okenaka, ọrọbh ọnaanga, ozeng z'Megiddo, oninga za ope. 28 Atọhmnọng pẹ, matọka affura pẹ k'ọkpaar kw'ẹnyanya ẹd-ẹtọr, matim-ẹ akwuna z'Jẹrusalẹm. Wa manọhng-ẹ z'epekwuk chẹ, z'ebhondim ch'Devid, otor ab'ttatta pẹ za. 29 (K'icho ttong ijobh kawanẹ s'Joram kw'ode nnwa kw'Ahab ọbaabh, nya kw'Ahaziya okwu otima ẹvaar ch'Juda.)

30 Nya o, Jehu ochina z'Jẹzrẹl. K'ogbe kw'Jẹzẹbẹl ọbhaang odik nwo, obina od-osi abakpachen, obir otobha isisa sẹ. Obina, od-obe z'ọmma kw'ofum, okkerẹ z'iyaan. 31 K'ose kw'Jehu odimẹ ny'ebhumma, Jẹzẹbẹl ọbọbh bẹ́, "Ma, akwu k'ọdaam o, kọ kw'akerẹ Zimri,* kw'azeng mmo afhọ atte kw'arukọ ábẹ̀?"

32 Jehu otinẹ ichen, okkerẹ z'ọmma nwo kw'ofum. Obok ẹmọng bẹ́, "Anyi wọ obe k'ikaam o? Anyi wọ?" Ajinọng afa, nnosi, ajinọng attaan p'mabhaar-ọbhaar, maninga z'ọmma nwo kw'ofum, marọn-ẹ z'izek. 33 Jehu oben bẹ́, "Manyun-ẹ bharẹ z'izek" Minna kw'manyunọ Jẹzẹbẹl abharẹ z'izek. Izẹ janẹ sẹ, ipyakẹ z'etumọ, ọttara z'nnyanya sẹ. Nnyanya njo, ikebh-ẹ ny'izek, ibar-ẹ ntọkọ.

34 Minna kw'Jehu odimẹ z'ẹtaanga, oninga za ochi, obir ogwo, oben bẹ́, "Màtinẹ kwanọng nwo kw'nkk'ẹ ẹmma ananga, zọhng nọhnga, kirẹ wa kẹ ode ominanwa kw'ọvaarnọng." 35 Okenaka, k'ogbe kw'nnabenẹ bẹ́, mad-anọhng-ẹ, m'ọdọk ọttọhk kpenamkpen kaze, kw'ọkpanẹ osokpakpa kwẹ, ọmaana mmokpattọkọ, ọttara mbọhk jẹ-jẹ. 36 Nya o, makpa nnam, mad-atek Jehu kw'obenẹ bẹ bẹ́, "Ma wọ ode odik kw'Ọvaar Ibinọkpaabyi otim ọtọhmnọng kwẹ kw'ode Elijah kw'ofon Tishbẹ ọgbaak bẹ́: Ny'izek njo s'ining z'Jẹzrẹl, nya wọ kw'mffa m'ininga, ichi aten-yaara p'Jẹzẹbẹl. 37 Oforbukọ kw'Jẹzẹbẹl m'ode mach'ẹbọr ny'izek njo s'ining z'Jẹzrẹl, mfha kwuna ọnọng oning-oning kw'im'oben bẹ́, ‘Jẹzẹbẹl wọ ma.’ "