1 Ny'icho ttong ẹrọbh okwuma ichenọmfa s'ọvaar Jeroboam ọbaabh Israẹl, nya kw'Azariya kw'ode nnwa kw'Amaziya ọtọm Juda obubaabha. 2 Wa ode icho ichi kawanẹ k'atam, k'ogbe kw'masẹ-ẹ ẹvaar. Oninga z'Jẹrusalẹm ọbaabha k'icho arọbh afa okwuma ijobh kkamfa. Ọkka kwẹ okpen Jekoliya, kw'ofon Jẹrusalẹm. 3 Wa Azariya osi idik s'itor-otor z'ititika s'Ọvaar Ibinọkpaabyi k'ose kw'uwa Amaziya kw'ode otte, ikk'ọsa. 4 Okenaka, wa ọja-byi f'ọyaankpa kọvọhkọ. Ayokinọng achina ororo afọhnọ nja, mabir akwọmọ insẹns nya.

5 Ọvaar Ibinọkpaabyi ọtọhbh ọvaar Azariya okpokora kw'oning ọmaan-ẹ, maa, ope. Wa osi oruk kwẹ nkọmẹ. Jotam kw'ode nnwa kw'ọvaarnọng, okwu ọtọka ẹvaarninga ch'otte, obir ọbaabha anọng p'ẹkọma ndo.

6 Idik njoza s'iyinẹ k'ogbe kw'Azariya ọbaabh, ọmaana idik maphyir s'osi, makkẹrẹ z'anwẹr p'avaar p'Juda. 7 Azariya ope otor ab'otte za. Manọhng-ẹ atuma ab'otte z'ebhondim ch'Devid. Jotam kw'ode nnwa kwẹ, okwu ọtọka ẹvaarninga chẹ.

8 Ny'icho ttong ẹrọbh okwuma ichi kkanttaan s'Azariya ọbaabh Juda, nya kw'Zekariya kw'ode nnwa kw'Jẹroboam oning z'Samariya ọbaabha Israẹl k'aphe achadanẹ. 9 Wa Zekariya osi itama z'ititika s'Ọvaar Ibinọkpaabyi mach'ab'otte nkk'asa. Nnam kọtọrọ k'mpyibha s'Jẹroboam kw'ode nnwa kw'Nẹbat s'ọwọhkọ anọng p'Israẹl asi.

10 Shalum kw'ode nnwa kw'Jabesh ochi Zekariya ikwu. Orima Zekariya ábẹ̀ ny'ikpakaana s'anọng, ọfhẹ-ẹ. Ọfhẹ-ẹ nya o, ọtọka ẹvaar chẹ. 11 Idik njoza s'iyinẹ k'ogbe kw'Zekariya ọbaabh, makkẹrẹ z'anwẹr p'avaar p'Israẹl. 12 Minna kw'ọgbaakadik kw'Ọvaar Ibinọkpaabyi otim Jehu ọgbaak, okwu ode minna bẹ́, "Iva pọ bọ mm'adaabh ẹvaar ch'Israẹl k'ipemaanitor nna."

13 Ny'icho ttong ẹrọbh okwuma osowanẹ kw'ẹrọbh s'Uziya ọbaabh Juda, nya kw'Shalum kw'ode nnwa kw'Jabẹsh oning z'Samariya ọbaabha k'ophe mawanẹ. 14 Nya o, Mẹnahẹm kw'ode nnwa kw'Gadi, obina z'Tirza, ochina z'Samariya, od-orima Shalum kw'ode nnwa kw'Jabẹsh ábẹ̀, z'Samariya. Mẹnahẹm ọfhọ Shalum, ọtọka ẹvaar chẹ otima.

15 Idik njoza s'iyinẹ k'ogbe kw'Shalum ọbaabh, ọmaana ikwu s'otim anọng ochi, makkẹrẹ z'anwẹr p'avaar p'Israẹl.

16 Ny'ogbe nwo, Mẹnahẹm ọtọma z'Tirza orima anọng p'Tiphsa, ọmaana ọnọng kpenamkpen kw'oning ny'ebhondim ndo, ọttara ibhon s'ining inyọma nya, okurọ ch'ibhon njo ibhumọ bẹ́, igwunga mbhumma sabẹ inang-ẹ. Wa kẹ obikẹ obhon kw'Tiphsa, obir ọbhaaka mmọr s'panọng p'atim ibhọr.

17 Ny'icho ttong ẹrọbh okwuma osowanẹ kw'ẹrọbh s'Azariya ọbaabh Juda, nya kw'Mẹnahẹm kw'ode nnwa kw'Gadi, ọbaabh Israẹl. Wa oning z'Samariya ọbaabha k'icho ijobh. 18 Wa osi itama z'ititika s'Ọvaar Ibinọkpaabyi. K'ẹbaabha chẹ maphyir, wa nnam kọtọrọ k'mpyibha s'Jẹroboam kw'ode nnwa kw'Nẹbat s'ọwọhkọ anọng p'Israẹl asi.

19 Nya o, Pul kw'ode ọvaarnọng kw'Asiriya, od-orima anọng p'ẹkọma ndo. Mẹnahẹm ọnang Pul atalẹn nnọhna mfa okwuma arọbh ijobh p'silva, ọfha ọbẹ-ẹ k'nnam, osi ẹvaar chẹ ebe. 20 Wa Mẹnahẹm ọkpaar ọtabha kw'akpuka mbo ọnang anọng p'Israẹl. Ojibhadanọng kpenamkpen osi ọtabha kw'ashẹkẹl arọbh afa okwuma ijobh p'silva bẹ́, manang ọvaarnọng kw'Asiriya. Minna kw'ọvaarnọng kw'Asiriya ọtọrọ nnam, otte ẹkọma ndo ọbọhk.

21 Idik njoza s'iyinẹ k'ogbe kw'Mẹnahẹm ọbaabh, ọmaana idik maphyir s'osi, makkẹrẹ z'anwẹr p'avaar p'Israẹl. 22 Wa Mẹnahẹm okwu ope otor ab'otte. Pẹkahiya kw'ode nnwa kwẹ, okwu ọtọka ẹvaarninga chẹ.

23 Ny'icho ttong arọbh afa okwuma ijobh s'Azariya ọbaabh Juda, nya kw'Pẹkahiya kw'ode nnwa kw'Mẹnahẹm okwu otima ẹvaar ch'Israẹl. Oninga z'Samariya ọbaabha k'icho ifa. 24 Wa Pẹkahiya osi itama z'ititika s'Ọvaar Ibinọkpaabyi. Nnam kọtọrọ k'mpyibha s'Jẹroboam kw'ode nnwa kw'Nẹbat s'ọwọhkọ anọng p'Israẹl asi. 25 Osonọng wanẹ kw'arim-mgbong pẹ, kw'ode Pẹka kw'ode nnwa kw'Remaliya, ọchẹ-ẹ ikwu. Ọtọka ajinọng arọbh afa okwuma ijobh p'Gilead, otima ọd-ọfhọ Pẹkahiya, ọmaana Argọb, ọttara Ariyẹ z'ifa-byi s'ọvaar-dimpa, z'Samariya. Minna kw'Pẹka ọfhọ Pẹkahiya, okwu ọtọka ẹvaarninga chẹ.

26 Idik njoza s'iyinẹ k'ogbe kw'Pẹkahiya ọbaabh, ọmaana idik maphyir s'osi, makkẹrẹ z'anwẹr p'avaar p'Israẹl.

27 Ny'icho ttong arọbh afa okwuma ijobh kkamfa s'Azariya ọbaabh Juda, nya kw'Pẹka kw'ode nnwa kw'Remaliya otim ẹvaar ch'Israẹl. Oninga z'Samariya ọbaabha k'icho ẹrọbh. 28 Wa osi itama z'ititika s'Ọvaar Ibinọkpaabyi. Wa nnam kọtọrọ k'mpyibha s'Jẹroboam kw'ode nnwa kw'Nẹbat s'ọwọhkọ anọng p'Israẹl, asi.

29 K'ogbe kw'Pẹka ọbaabh Israẹl, nya kw'Tiglat-Pilẹsa kw'ode ọvaarnọng kw'Asiriya, okwu ọtọka Ijọn, ọmaana Abẹl-Bẹt-Maaka, ọmaana Janoa, ọmaana Kẹdẹsh ọttara Hazọr. Obir ọtọka Gilead, ọmaana Galili, ọttara izek s'Naphtali, ọbọka anọng p'ẹkọma ndo maphyir k'ẹmmọri, otima bẹ ochina z'Asiriya. 30 Ny'icho ttong ẹrọbh s'Jotam kw'ode nnwa kw'Uziya ọbaabh Juda, nya kw'Hosea kw'ode nnwa kw'Ẹla, ochi Pẹka kw'ode nnwa kw'Remaliya ikwu, orim-ẹ ábẹ̀, ọfhẹ-ẹ, ọtọka ẹvaar chẹ.

31 Idik njoza s'iyinẹ k'ogbe kw'Pẹka ọbaabh, ọmaana idik s'osi, makkẹrẹ z'anwẹr p'avaar p'Israẹl.

32 Ny'icho ttong ifa s'Pẹka kw'ode nnwa kw'Remaliya ọbaabh Israẹl, nya kw'Jotam kw'ode nnwa kw'Uziya ọtọm Juda obubaabha. 33 Wa ode icho ẹrọbh okwuma ichen k'atam, k'ogbe kw'masẹ-ẹ ẹvaar. Oninga z'Jẹrusalẹm ọbaabha k'icho ichi kawanẹ. Wa ọkka kwẹ okpen Jerusha, kw'ode ominanwa kw'Zadọk. 34 Wa Jotam osi idik s'itor-otor z'ititika s'Ọvaar Ibinọkpaabyi, mach'iwa Uziya kw'ode otte, ikk'ọsa. 35 Okenaka, wa kẹ ọja-byi f'ọyaankpa kọvọhkọ. Minna kw'anọng achina ororo afọhnọ nja, mabir akwọmọ insẹns nya. Wa Jotam obir ottima ebhumma ch'ebir-ebir kw'Ọsọhm kw'Ọvaar Ibinọkpaabyi.

36 Idik njoza s'iyinẹ k'ogbe kw'Jotam ọbaabh, ọmaana idik s'osi, makkẹrẹ z'anwẹr p'avaar p'Juda. 37 (Ny'ogbe nwo, Ọvaar Ibinọkpaabyi ọtọhm Rezin kw'ode ọvaarnọng kw'Aram, ọmaana Pẹka kw'ode nnwa kw'Remaliya bẹ́, mad-arima Juda ábẹ̀.) 38 Wa Jotam ope otor ab'otte za. Manọhng-ẹ z'ebhondim ch'Devid kw'ode otte. Wa Ahaz kw'ode nnwa kwẹ, okwu ọtọka ẹvaarninga chẹ.