1 Wa Manasẹ ode icho ijobh kkamfa ch'ọtọm ẹbaabha. Oninga z'Jẹrusalẹm ọbaabha k'icho arọbh afa okwuma ichi. Wa ọkka kwẹ okpen Hephziba. 2 Wa osi itama z'Ọvaar Ibinọkpaabyi k'ititika. Adiktama p'uwa nkọma s'Ọvaar Ibinọkpaabyi okwubhọ pira anọng p'Israẹl apyirẹ, bẹ bọ p'uwa od-osi. 3 Wa obir ọtọm-ọtọma osi ọja-byi mvo f'ọyaankpa f'uwa Hezekiya kw'ode otte, ikk'ọvọhka maphyir. Obir osi ọja-byi f'Baal, ọmaana ẹka-chi ch'Ashẹra, k'ose kw'Ahab kw'uwa ọbaabh Israẹl, osi. Obir ọd-ọraka eso ọnang ekpo maphyir py'ọrọngkpakpa, obir okpobha byẹ. 4 Ochina z'Ọsọhm kw'Ọvaar Ibinọkpaabyi, osi ọja-byi za ch'Ọvaar Ibinọkpaabyi kk'obena bẹ́, ‘M'Jẹrusalẹm kw'mmin'aninga akpobha Eche chaam.’ 5 Ny'iterttem njo ifa s'osi ny'Ọsọhm kw'Ibinọkpaabyi, wa obir osi ọja-byi f'ekpo py'ọrọngkpakpa maphyir. 6 Ọkwọmọ nnwa kwẹ oyenẹ k'ekpon, otim-ẹ ọfọhnọ ẹja. Osi ẹbọhk, ọmaana nchibhẹ, od-okebha abọhnganọng ọmaana anọng p'aze iyaan, ọd-ọbọbh bẹ idik. Osi itama s'ikem ẹsaabha z'Ọvaar Ibinọkpaabyi k'ititika, s'id-iwọhkọ ettem epyibh Ibinọkpaabyi.

7 Ẹka-chi ndo ch'Ashẹra ch'ikk'ọsa, ọtọka osok z'Ọsọhm kw'Ibinọkpaabyi, chibhẹ ch'iwa Ọvaar Ibinọkpaabyi obenẹ Devid ọmaana nnwa kwẹ Sọlọmọn bẹ́, "Ma mfona s'Israẹl maphyir, kaam kk'Ọsọhm nwa kw'Ibinọkpaabyi, ọmaana Jẹrusalẹm nteka bẹ́, nya kw'mm'aninga akpobha Eche chaam ttattampe. 8 Kaam ọdọk anọng p'Israẹl ọbọhk mìntte mabina arik izek nja, machina ororo attena m'izek s'iwa nnang ab'ttatta pabẹ, óde bẹ mm'azonga ifor sabẹ, masi ọttọhk kpenamkpen f'mbenẹ bẹ bẹ́, masi, mabir akpobha asana p'Moses kw'ode ọtọhmnọng kwaam ọnang bẹ." 9 Okenaka, wa anọng mbo m'itọhng kayong. Manasẹ otima bẹ ottena eden, ọwọhkọ bẹ masi itama s'iyọhng njo s'iwa nkọma njo s'Ọvaar Ibinọkpaabyi okwubhọ ny'Israẹl, isi.

10 Ọvaar Ibinọkpaabyi otima atọhmnọng p'ad-agbaak ettem chẹ oben bẹ́, 11 "Ọvaar Manasẹ kw'Juda kk'itama siden ọsa. Kk'itama s'iyọhng njo s'anọng p'Amọr p'acheden aninga m'ibyi nja, ọsa, ọwọhkọ Juda otor-ẹ ny'itama s'aka pẹ okpukpobha. 12 Ofona nya, Ọvaar Ibinọkpaabyi kw'ode Ibinọkpaabyi kw'Israẹl obenẹ bẹ́, kaam m'ntima itama s'ina ebena ide, ndim ny'Jẹrusalẹm ọmaana Juda. Ọnọng kpenamkpen kw'ọbhaang itama kirase njo, m'okkon-ẹ. 13 Eden ndo ch'nzeng mkpaara aponga p'Samariya, ọmaana p'echimma ch'Ahab, dẹ dọ ch'm'mbir ntima ntor Jẹrusalẹm. K'ose kw'ọnọng ọd-ọfọhnọ ọgbangbang maa, ọttọhk morik, minna kw'kaam m'ndimẹ Jẹrusalẹm kibung-kibungọ. M'ndimẹ wẹ maa, mbhak-ẹ abherekpa afa. 14 Kaam m'mbhum ayok mbo p'ade oyena kwaam p'arik-orik. M'ntte bẹ ọbọhk nnang awawunanọng pabẹ. Awawunanọng mbo maphyir m'ana bẹ ọttọhk kpenamkpen f'mayen maa, marik bẹ abọhk-kpakpa. 15 Tọma z'ewu ch'ab'ttata pabẹ abin arik Ijip, maa pyirẹ m'ewu ch'menda, bẹ nkk'itama asa m'kaam k'ititika maa, nkk'ottempyibha kwaam ayema.

16 Manasẹ ọdọk, kk'anọng saabhada obir ọfha maa, Jẹrusalẹm node izizẹ tọma k'eso danẹ, pyirẹ z'eso ndoza, gbaarẹ epyibha ndoza ch'ọwọhkọ anọng p'Juda masi, obir ọwọhkọ bẹ, masi itama z'Ọvaar Ibinọkpaabyi k'ititika.

17 Idik njoza maphyir s'iyinẹ k'ogbe kw'Manasẹ ọbaabh, ọmaana idik s'osi, ọttara epyibha ch'osi, makkẹrẹ z'anwẹr p'avaar p'Juda. 18 Minna kw'uwa Manasẹ ope otor ab'otte za. Manọhng-ẹ z'ewoniva ch'odimpa kwẹ, ch'ening z'Uza. Amọn kw'ode nnwa kwẹ, okwu ọtọka ẹvaarninga chẹ.

19 Wa Amọn ode icho ẹrọbh okwuma ifa ch'masẹ-ẹ ẹvaar. Oninga z'Jẹrusalẹm ọbaabha k'icho ifa. Wa ọkka kwẹ okpen Meshulemet kw'ode kwanọngnwa kw'Haruz kw'ofon Jotba. 20 Wa Amọn osi itama k'ititika s'Ọvaar Ibinọkpaabyi mach'iwa Manasẹ kw'ode otte, osi. 21 Wa otorọ ntọkọ s'otte kibung-kibungọ, od-okpobha aka mbo p'uwa otte okpobh, obir ọraka eso ọnang bẹ. 22 Minna kw'uwa obhumọ Ọvaar Ibinọkpaabyi kw'ab'ttatta pẹ. Ibinọkpaabyi nwo, kọbir okpobha.

23 Adukwa p'Amọn, makwu achẹ-ẹ ikwu, mafhẹ-ẹ ny'odimpa kwẹ. 24 Anọng p'Juda abina k'ẹrọng, mafhọ anọng mbo maphyir p'machi ọvaar Amọn ikwu, pira mafhẹ-ẹ. Makwu atọka ẹvaar anang Josaya kw'ode nnwa kw'Amọn.

25 Idik njoza maphyir s'iyinẹ k'ogbe kw'Amọn ọbaabh, ọmaana idik s'osi, makkẹrẹ z'anwẹr p'avaar p'Juda. 26 Wa manọhng-ẹ z'epekwubh ch'ewoniva ch'Uza. Josaya kw'ode nnwa kwẹ, okwu ọtọka ẹvaarninga chẹ.