1 Ny'icho ttong ifa s'Jehoash kw'ode nnwa kw'Jehoahaz ọbaabh Israẹl, nya kw'Amaziya kw'ode nnwa kw'Joash ọtọm ẹvaar ch'Juda otitima. 2 Wa Amaziya ode icho ẹrọbh okwuma ichen k'ogbe kw'otim ẹvaar. Oninga z'Jẹrusalẹm, ọbaabha k'icho ẹrọbh okwuma osowanẹ. Jehoaddan kw'ofon Jẹrusalẹm wọ uwa ode ọkka kwẹ. 3 Wa Amaziya osi idik s'itor-otor k'ititika s'Ọvaar Ibinọkpaabyi, okenaka kẹ kosi opyirẹ mach'uwa Devid kw'ode otte, osi. Otor ntọkọ s'Joash kw'ode otte k'ọttọhk kpenamkpen f'osi. 4 Kẹ wa ọja-byi f'ọyaankpa kọvọhkọ, ọwọhkọ anọng achina ororo afọhnọ nja, mabir akwọmọ insẹns nya.

5 K'ogbe kw'ẹvaar ch'Amaziya ikk'ettim mawuriji, ọfhọ adukwa mbo p'uwa mafhọ otte kw'ode ọvaarnọng. 6 Okenaka, iva p'adukwa mbo p'uwa mafhọ otte, kọfhọ. Wa osi minna otor k'ose kw'Ọvaar Ibinọkpaabyi obenẹ Mosẹs z'nnwẹr kw'asana bẹ́, "M'otte ọttara ọkka kafhọ k'eso ch'iva. M'iva kabir afhọ k'eso ch'otte ọttara ọkka. Ọnọng-ọnọng m'ope k'epyibha chẹ."

7 Amaziya nwa wọ uwa okem anọng p'Edom p'ade anọng nnọhna ẹrọbh okwuma nchen k'egbong, z'ilokodo s'onung. Obir ọbọka obhon kw'Sẹla, okpe wẹ bẹ́, Jọktẹl. Obhon nwo otim okpen minna maa, pyirẹ menda.

8 Nya o, Amaziya ọtọhm azeng-eden pẹ ẹkkaabha ch'ọmmakarẹ ọnang ọvaar Jehoash kw'Israẹl, kw'ode nnwa kw'Jẹhoahaz kw'Jehu obhonọ. Oben-ẹ bẹ́, "Kwu mokkerẹ ayok ititika, morima egbong."

9 Okenaka, Jehoash kw'ode ọvaarnọng kw'Israẹl, ọpọhna Amaziya kw'ode ọvaarnọng kw'Juda bẹ́, "Okwumọkwumọ wanẹ ny'Lẹbanọn ọtọhm ẹkkaabha ọnang ochi kw'sida ny'Lẹbanọn bẹ́ ‘Tọka ominanwa kwọ nang nnwa kwaam k'ọbada.’ Minna kw'eten ch'ẹkkaam-ọkkaam ny'Lebanọn ekwu ẹbarẹ okwumọkwumọ nwo ẹtọkọ. 10 K'odik ọkkọkka, kọ kk'anọng p'Edom akema, nya wọ asi ad-age ifor. Tte ettem elebh-ọ ch'ikk'akema. Okenaka, ninga z'ọsọhm kwọ o! Osempira aror ẹkọhr ch'im'ẹwọhkọ, kọ ọmaana Juda matto akwubha ẹmma o?"

11 Okenaka, Amaziya itọhng koyong. Minna kw'Jehoash kw'ode ọvaarnọng kw'Israẹl orim-ẹ ábẹ̀. Kẹ ọmaana Amaziya kw'ode ọvaarnọng kw'Juda marima ayok abẹ z'Bẹt-Shẹmẹsh, ny'ẹkọma ch'Juda. 12 Wa anọng p'Israẹl makema anọng p'Juda, ojinọng kpenamkpen ọrọbh ọkpa nnam z'ọsọhm kwẹ. 13 Jehoash kw'ode ọvaarnọng kw'Israẹl ọbọka ọvaar Amaziya kw'Juda kw'ode nnwa kw'Joash kw'Ahaziya obhonọ k'ẹmmọri, z'Bẹt-Shẹmẹsh. Minna kw'Jehoash ofon ọd-ọvọhkọ etumọ ch'Jẹrusalẹm ch'ede ntọkọ ẹnọhna k'adum, tọma ny'ebhumma ch'Ephraim maa, pyirẹ z'ebhumma ch'ibongọ s'etumọ ndo. 14 Jehoash ọtọka gol, ọmaana silva, ọttara ekpo py'oze ny'Ọsọhm kw'Ọvaar Ibinọkpaabyi, ọttara z'nkwurukpa s'ọvaar-dimpa. Obir ọbọka anọng k'ẹmmọri otima okwuna z'Samariya.

15 Idik njoza s'iyinẹ k'ogbe kw'Jehoash ọbaabh, ọmaana idik s'osi, ọmaana ẹfa chẹ, ọttara egbong ch'ikẹ ọmaana ọvaar Amaziya kw'Juda marim, makkẹrẹ z'anwẹr p'avaar p'Israẹl. 16 Jehoash okwu ope otor ab'otte za. Manọhng-ẹ z'Samariya, za ch'mad-anọhng avaar p'Israẹl. Jeroboam kw'ode nnwa kwẹ, okwu ọtọka ẹvaarninga chẹ.

17 Wa Amaziya kw'ode nnwa kw'ọvaar Joash kw'Juda, orukọ akpen k'icho ichi, k'ogbe kw'Jehoash kw'ode nnwa kw'ọvaar Jehoahaz kw'Israẹl, ikk'ọpa. 18 Idik njoza s'iyinẹ k'ogbe kw'Amaziya ọbaabh, makkẹrẹ z'anwẹr p'avaar p'Juda.

19 Wa machi Amaziya ikwu z'Jẹrusalẹm. Minna kw'ọrọbhọ ochina z'Lakish. Okenaka, awawunanọng pẹ matọhm anọng p'ad-afhọ anọng bẹ́, mad-afhẹ-ẹ. Anọng mbo akebh-ẹ z'Lakish, mafhẹ-ẹ za. 20 Matọhk-ẹ k'ẹnyanya makwu anọhnga z'Jẹrusalẹm, za ch'manọhng ab'otte, z'ebhondim ch'Devid.

21 Anọng p'Juda maphyir, matọka Azariya kw'ode icho ichi kawanẹ k'atam, masẹ-ẹ ẹvaar, matim-ẹ atera eso ch'Amaziya kw'ode otte. 22 Kẹ wọ uwa obir okwu osi obhon kw'Elat ọnang anọng p'Juda k'ogbe kw'Amaziya kw'ode otte, ikk'ọpa otor ab'otte.

23 Ny'icho ttong ichi s'Amaziya kw'ode nnwa kw'Joash ọbaabh Juda, nya kw'Jẹroboam kw'ode nnwa Jehoash otim ẹvaar ch'Israẹl. Oninga ny'Samariya ọbaabha k'icho arọbh afa okwuma icho mawanẹ. 24 Wa Osi itama z'Ọvaar Ibinọkpaabyi k'ititika. Nnam kọtọrọ k'mpyibha s'Jẹroboam kw'ode nnwa kw'Nẹbat s'ọwọhkọ anọng p'Israẹl asi. 25 Jẹroboam nwa wọ uwa obir otor nnem s'Israẹl, tọma z'Lebo-Hamat maa, pyirẹ z'ọraanga kwiden kw'Araba, otor k'ọgbaakadik kw'Ọvaar Ibinọkpaabyi, kw'ode Ibinọkpaabyi kw'Israẹl ikk'Jona kw'ode ọtọhmnọng kwẹ otima ọgbaak. Wa Jona ode nnwa kw'Amitayi, kw'ofon Gat-Hẹpha, obir ode ọgbaak-ettem ch'Ibinọkpaabyi.

26 Wa Ọvaar Ibinọkpaabyi kk'ọza ose kw'ọnọng kpenamkpen ny'Israẹl, ọyak ọbọhk ọtọka irem, tọma k'obira, pyirẹ k'ọmmaana. Ọnọng kw'ọkkaan bẹ kode. 27 Ch'iwa Ọvaar Ibinọkpaabyi ina obenẹ bẹ́, m'odimẹ Israẹl eche m'iyagbin, wa nozeng z'Jeroboam kw'ode nnwa Jehoash, ọkkaana bẹ.

28 Idik njoza s'iyinẹ k'ogbe kw'Jeroboam ọbaabh, idik maphyir s'osi, ọmaana mgbong s'okem, ọmaana ose kw'uwa obir ọtọka obhon kw'Damaskọs, ọmaana kw'Hamat s'iwa ikkikken ide ibhon s'Juda otima ọkpa nnam z'Israẹl, makkẹrẹ z'anwẹr p'avaar p'Israẹl. 29 Jeroboam okwu ope otor ab'otte p'uwa ade avaar p'Israẹl. Zakariya kw'ode nnwa kwẹ okwu ọtọka ẹvaarninga ch'otte.