1 Wa Naaman ode oso kw'asoja p'ọvaarnọng kw'Aram, obir ọbar otte kw'osi ọtọhm ọmaana odik. Wa oyen ikpukpobha mawuriji okurọ bẹ́, kẹ kw'uwa Ọvaar Ibinọkpaabyi otim okema egbong ọnang anọng p'Aram. Wa ode osojanọng kw'ọbar ettem. Okenaka, wa ode okpokoranọng.

2 K'ogbe wanẹ, nkaan s'agbongnọng p'Aram, iyin egbong. Mabọka ominanwa wanẹ kw'ofon Israẹl k'ẹmmọri. Ominanwa nwo okwu oruk kwanọng kw'Naaman ábẹ̀. 3 Ewu danẹ, ominanwa nwo oben ọkka kw'orukọ ábẹ̀ bẹ́, "Wúra átte kw'nrukọ ábẹ̀ im'ochera bẹ́, od-oze ọgbaak-ettem ch'Ibinọkpaabyi z'Samariya, wúra ọ́sẹ-ẹ obina ny'okpokora nwo."

4 Minna kw'Naaman obin od-otek otte kw'oruk ábẹ̀ odik kw'ominanwa nwo kw'ofon Israẹl, obenẹ. 5 Ọvaarnọng kw'Aram oben-ẹ bẹ́, "K'eden kpenamkpen, zọhng kebha ọvaarnọng kw'Israẹl. Kaam m'ntọhm ẹkkaabha nnang-ẹ." Naaman ọtọka atalẹn ijobh p'silva, ọmaana ashẹkẹl nnọhna ichi p'gol, ọttara mbara-rin ijobh, otima obina ozenga. 6 Ẹkkaabha ndo ch'ọtọk ochena ọvaarnọng kw'Israẹl ede bẹ́: "M'ẹkkaabha nda, kaam ntọhmọ Naaman kw'ode ọtọhmnọng kwaam nnang-ọ bẹ́, abin-ẹ k'okpokora."

7 Ọvaarnọng kw'Israẹl oyerẹ ẹkkaabha ndo nya o, ọyaakẹ ekpo py'ọfọr z'ifor, oben bẹ́, "Kaam wọ nde Ibinọkpaabyi o? Kọ atọk bẹ́, kaam wọ nd-mfhọ ọnọng, mbir mphyabha ọnọng k'obo o? Osempira atte nwa ọtọhm ọnọng ọnang-m bẹ́, mbin-ẹ k'okpokora? Kk'nza bẹ́, ẹkọhr dọ ch'od-oror-m nya!"

8 K'ogbe kw'Elisha kw'ode ọgbaak-ettem ch'Ibinọkpaabyi ọbhaang bẹ́, ọvaarnọng kw'Israẹl kk'ekpo py'ọfọr ọyaaka, ọtọhm ẹkkaabha nda ochen-ẹ, oben bẹ́: "Bọng ọttọhk f'azeng ábẹ̀ ayaakẹ ekpo py'afọr o? Tọhm ọnọng nwo nang-m, ọfha ozonga bẹ́, ọgbaak-ettem ch'Ibinọkpaabyi oning m'Israẹl." 9 Minna kw'Naaman obin ọttara nnyanya sẹ, ọmaana ijaar s'nnyanya id-itọr, ofona od-obe z'ẹsọhmma ch'Elisha. 10 Elisha ọtọhm ozeng-eden, od-oben-ẹ bẹ́, "Zọhng rana ifor sọ z'Ọraanga kw'Jọrdan igbedim ichenọmfa, ọfha abir atọka ifor sọ, okpokora nwo, obir ọttọ-ọ ọbọhk."

11 Okenaka, Naaman ọdọk-ẹ, ofona. Oben bẹ́, "Kaam osi-m bẹ́, m'oyin m'iyaan, obe ma oyerẹ eche ch'Ọvaar Ibinọkpaabyi, kw'ode Ibinọkpaabyi kwẹ. Obira owora ọbọhk nya ch'okpokora oning, osi-m mbina. 12 Ọraanga kw'Abana, ọmaana ọraanga kw'Pharpar, ọttara araanga p'Damaskọs, majibhẹ ayọhnga araanga p'Israẹl maphyir. Osempira pira z'araanga mbo k'nter nd-nrana, ọfha okpokora ọsa?" Minna kw'ọdọk-ẹ, ọbhakẹ nnam, otima ididọkọ ofona.

13 Atọhmnọng p'Naaman abina akebh-ẹ, maben-ẹ bẹ́, "O ttatta, wúra ọgbaak-ettem ch'Ibinọkpaabyi oben-ọ bẹ́, asi ọttọhk f'ọgaangẹ ọyọhnga mva, wura kasi o? Osempira odik kwẹ machera, k'ogbe kw'oben-ọ bẹ́, ‘Rana ifor sọ k'asi, ọfha abina’?" 14 Minna kw'Naaman ofon, od-osi k'ose kw'ọgbaak-ettem ch'Ibinọkpaabyi oben-ẹ, ọrana ifor sẹ ny'Ọraanga kw'Jọrdan igbedim ichenọmfa. Ẹkpakpa chẹ, ebir ekwu ebhona, ẹsọhmọ mach'ẹkpakpa ch'ọbhannwa.

15 Nya o, Naaman ọmaana anọng p'ator-ẹ maphyir, makpa nnam z'ọgbaak-ettem nwo kw'Ibinọkpaabyi. Naaman obe ny'ititika s'ọgbaak-ettem ch'Ibinọkpaabyi nwo, oben bẹ́, "K'odik ọkkọkka, kaam menda kk'nzonga bẹ́, Ibinọkpaabyi za kode m'iyagbin kibungọ, kw'ọkpanẹ Ibinọkpaabyi kw'Israẹl. Ototo, tọka ẹnanga ch'kaam ọtọhmnọng kwọ, nnang-ọ."

16 Ọgbaak-ettem nwo ọpọhna bẹ́, "K'ose kw'Ọvaar Ibinọkpaabyi kw'mkpobh orukọ akpen, ọttọhk kpenamkpen mìntọka." Chibhẹ ch'Naaman okwuk-ẹ, kocher ọtọka.

17 Naaman oben bẹ́, "Ó̱de ína ẹnanga chaam màtọka, ototo, kenaka, tte kaam ọtọhmnọng kwọ ọbọhk, mgberẹ izek ma, k'ose kw'anyanyava afa, mm'akpo atọhka, ntima mbhana. Tọma ma, china ororo, kaam ọtọhmnọng kwọ ọdọk nnanga s'ẹkwọmọ, ọmaana ẹja mìmfọhnọ nnang ọka kpenamkpen, kw'ọkpanẹ Ọvaar Ibinọkpaabyi. 18 Okenaka, tte Ọvaar Ibinọkpaabyi obina ọnang kaam ọtọhmnọng kwọ k'ọttọhk mavanẹ, f'ode bẹ́: K'ogbe kw'atte kw'nsi ọtọhm mmaana odimẹ z'ọka-pa f'Rimmon bẹ́, ọraka eso ọnang Rimmon, kaam m'ntor-ẹ mọraka eso. K'ogbe kw'nrak eso ny'eden ndo, tte Ọvaar Ibinọkpaabyi obina ọnang kaam ọtọhmnọng kwọ."

19 Elisha oben-ẹ bẹ́, "Zọhng k'ọdaam."

Ch'Naaman ikk'ozenga maa, otuma za, 20 Gehazi kw'ode ọtọhmnọng kw'Elisha kw'ode ọgbaak-ettem ch'Ibinọkpaabyi oben z'ettem bẹ́, "Atte kwaam kw'nsi ọtọhm mmaana, ọjọhkọ Naaman nwa kw'ofon Aram maa, obhum ẹnanga ch'otim okwu. K'ose kw'Ọvaar Ibinọkpaabyi oruk akpen, kaam m'nkwubh-ẹ k'eden, ntọka ọttọhk vanẹ ny'ikẹ k'ọbọhk."

21 Minna kw'Gehazi oduk-oduka okwubh Naaman k'eden. Ch'Naaman ọzẹ-ẹ za ch'od-otima ẹbhar okwu, obina z'ọkpaar kw'nnyanya id-itọr, ọsaka bẹ́, od-okebh-ẹ. Okebh-ẹ nya o, ọbọbh Gehazi bẹ́, "Ode yen?"

22 Gehazi ọpọhna bẹ́, "Odik kpenamkpen kode. Atte kwaam kw'nsi ọtọhm mmaana wọ ọtọhm-m bẹ́, mben-ọ bẹ́, ‘Adikkobh afa p'attar k'ẹkaan ch'agbaak-ettem kk'abina z'ẹkọma ch'Ephraim ch'ening k'egbe, makwu. Ọbẹ anang bẹ talẹn kw'silva, ọttara mbara-rin mfa.’ "

23 Naaman oben Gehazi bẹ́, "Ototo, tọka atalẹn p'silva afa." Naaman ọgban-ẹ bẹ́, ọtọka ẹnanga ndo. Gehazi ọtọka atalẹn mbo afa p'silva, ọttara mbara-rin mfa, oyika k'mkpa mfa, ọnang atọhmnọng pẹ afa. Matọhka atima achi Gehazi eden. 24 K'ogbe kw'Gehazi opyirẹ z'ogbeso o, ọtọka ekpo mbyo z'atọhmnọng mbo k'mbọhk, osok z'ọsọhm. Oben bẹ bẹ́, màzọhng. Ajinọng mbo mafona.

25 K'ogbe kw'odimẹ z'ọsọhm, od-obe otte kw'osi ọtọhm ọmaana k'ititika, Elisha ọbọbh-ẹ bẹ́, "Gehazi, akwun men?"

Gehazi ọpọhn-ẹ bẹ́, "Ttatta, ọtọhmnọng kwọ ibyi kọta."

26 Okenaka, Elisha oben-ẹ bẹ́, "Azong ma bẹ́, wura egwugwuma chaam ening nya ẹmaan-ọ ny'ogbe kw'atte nwo ọsak z'ikẹ k'ọkpaar kw'ẹnyanya ẹd-ẹtọr bẹ́, okebh-ọ? Ma, ogbe kk'opyira kw'm'atọka akpuka, wanẹma, ọbara, wanẹma, owonọ kw'oliv, wanẹma, owonọ kw'grep, wanẹma, arọkimaan, wanẹma, abhaam, wanẹma, abira k'ejinọng ọttara k'ẹpanọng o? 27 Okpokora kw'Naaman m'ojeka kọ ọmaana iva pọ, ọttara iva p'iva pọ ma ttattampe." Minna kw'Gehazi otim okpokora obina ny'Elisha k'ititika, ifor sẹ niwur bẹ́ gwang.