1 Elisha ọpọhna ọvaar Bẹn-Hadad bẹ́, "Bhaanga odik kw'Ọvaar Ibinọkpaabyi ọgbaakẹ. Ọvaar Ibinọkpaabyi obenẹ bẹ́: Ophyinẹ ogbese nwa, mm'akpe ogbobh-mbọhk kw'agwubuma ọkkọkka k'shẹkẹl mawanẹ z'ebhumma ch'Samariya. Mm'abir akpe agbobh-mbọhk afa p'barli k'shẹkẹl mawanẹ, ny'ebhumma ch'Samariya."

2 Osojanọng nwo kw'od-okkerẹ ọvaarnọng oben bẹ́, "Zaabẹ́ Ọvaar Ibinọkpaabyi ogwung amma p'ọrọngkpakpa, minna mòde?"

Elisha ọpọhna bẹ́, "Kọ m'atima achen pọ aze ch'odik nwo im'oyin minna. Okenaka, kọ ọttọhk kpenamkpen nya, màchi!"

3 Wa oyen ajinọng anna p'okpokora ọmma p'aning ny'ebhumma ch'ebhondim ch'Samariya. Maben ayok bẹ́, "Kayen kw'mm'oning ma, mope o? 4 Ó̱de mobenẹ bẹ́, ‘Modim z'ebhondim’, okwo fiden f'oning za, m'ọfhọ mina ọfhọ. Ó̱de mobir oben bẹ́, moninga ma, mm'opope. Ofona nya, tte mojeka ochina z'ibhinga-byi s'anọng p'Aram, mfha motte ifor samina ọbọhk, ọnang bẹ. Ó̱de nna mina afhọ, mm'oruk-oruk, óde mabir afhọ mina, mope."

5 Otum k'ẹsọhka, mabina achina z'ibhinga-byi s'anọng p'Aram. K'ogbe kw'mapyirẹ ny'ẹtọma ch'ibhinga-byi s'anọng p'Aram, m'ọnọng kaze. 6 Ode ch'Ọvaar Ibinọkpaabyi ikk'anọng p'Aram ọsa, mabhaanga izozo s'ijaar s'nnyanya id-itọr, ọmaana s'nnyanya, ọttara s'asoja k'ọsaabh. Ọwọhkọ maben ayok bẹ́, "Màkirẹ, ọvaarnọng kw'Israẹl kk'anọng p'Hẹt, ọmaana avaar p'Ijip ọyaama bẹ́, makwu arima mina ábẹ̀!" 7 Ofona nya, mabina ny'ẹsọhka, marọbh arik okkira fabẹ, ọmaana nnyanya, ọttara nnyanya s'id-itọhka ekpo. Marọbh arik ọttọhk kpenamkpen f'oning ny'ibhinga-byi njo, makaam akpen pabẹ.

8 Ajinọng mbo p'okpokora ọmma, mapyirẹ ny'ẹtọma ch'ibhinga-byi njo, madim k'ikkira janẹ, machi, mabir agwo. Matọka silva, ọmaana gol, ọttara ọbara, mad-adubh. Makpa nnam, madim k'ikkira ọdọk-ọdọk, macha ekpo byanẹ nya, mad-adubh.

9 Nya o, maben ayok bẹ́, "Ọttọhk f'nd-osi ma, kọbaan. Ewu nda ede ewu ch'etim ẹkkaabha ọkkọkka ekwu. Kojibhẹ bẹ́, mosok ẹkkaabha ndo m'amina k'ifor kẹ-kẹ. Ó̱de mótikẹ bẹ́, ewu esobha, pira mosi ẹkkaabha nda ẹnyaamẹ, mm'ọtọka irem. Tte moter ofona bẹ́ kpaar, mod-otek anọng odik nwa z'ọvaarsọhm."

10 Minna kw'mafon, mad-ayerẹ akker-ebhumma p'ebhondim, matek bẹ bẹ́, "Mochin z'ibhinga-byi s'anọng p'Aram, m'ọnọng za kokebh, m'ọnọng mawanẹ ẹmọng kobir ọbhaanga. Mokenka okebha nnyanya sabẹ, ọmaana nnyanya s'itim ọgbọk k'nnam, ọttara okkira f'nkk'arọbha arik." 11 Nya o, akker-ebhumma mbo, masi ẹkkaabha ndo ẹnyaamẹ, mabir atima ẹkkaabha ndo achina z'ọvaarsọhm.

12 Minna kw'ọvaarnọng obin ny'orungittem, oben adukwa pẹ bẹ́, "Kaam m'ntek bọnga ọttọhk f'anọng p'Aram asi ma. Mazong bẹ́, m'ọttọhk f'ẹcha koyen; kẹ wọ osi mabina arik ibhinga-byi sabẹ, matubha z'ẹgba atik mina, mfha ch'mm'okwu oror ọchattọhk, mabọka mina k'mbọhk, matọka ebhondim chamina."

13 Odukwa wanẹ kwẹ oben bẹ́, "Tte anọng banẹ atọka nnyanya nchen ny'nnyanya njo s'irikẹ ny'ebhondim, matima ad-abaana ibhinga-byi s'anọng p'Aram. Ó̱de mafhọ bẹ za, m'ode mbenga mach'anọng p'Israẹl maphyir p'nkk'opupa, apa. Tte mọtọhm bẹ mad-abaana, mfha moze odik kw'im'oyin."

14 Ofona nya, ọvaarnọng ọrọhbha ajinọng afa, ọtọhm bẹ bẹ́, matima ijaar ifa s'nnyanya id-itọr, mad-abaana asoja p'Aram. Oben bẹ bẹ́, "Màzọhng baana, maze odik kw'oyinẹ." 15 Ajinọng mbo mayaar ator bẹ maa, mapyirẹ z'ọraanga kw'Jọrdan. K'ose kw'mayaarẹ ny'eden, maze ọbara, ọmaana ekpo py'anọng p'Aram ch'ẹraamẹ ny'eden k'ose kw'nd-arọbh. Ajinọng mbo makwuna, makwu atek ọvaarnọng. 16 Nya o, anọng p'Samariya mafona, mazeng z'ibhinga-byi s'anọng p'Aram, macha oyena kwabẹ atima afona. Pira nnad-akpe ogbobh-mbọhk kw'agwubuma ọkkọkka k'shẹkẹl mawanẹ. Makpe agbobh-mbọhk afa p'barli-buma k'shẹkẹl mawanẹ, k'ose kw'Ọvaar Ibinọkpaabyi ikk'ọgbaaka.

17 Ode ch'ọvaarnọng ikk'ọnọng kw'od-okker-ẹ obena bẹ́, okkerẹ ebhumma. Anọng abarẹ ọnọng nwo mmo ny'ebhumma maa, ope. Odik nwo oyin otor k'ose kw'Elisha kw'ode ọgbaak-ettem ch'Ibinọkpaabyi ikk'ọgbaaka k'ogbe kw'ọvaarnọng okebh-ẹ z'ọsọhm. 18 Wa ode k'ose kw'ọgbaak-ettem ch'Ibinọkpaabyi ikk'ọvaarnọng obena bẹ́, "Ophyinẹ ogbese nwa, mm'akpe ogbobh-mbọhk kw'agwubuma ọkkọkka k'shẹkẹl mawanẹ, mabir akpe agbobh-mbọhk afa p'barli k'shẹkẹl mawanẹ, ny'ebhumma ch'Samariya."

19 Wa ọnọng nwo kw'od-okkerẹ ọvaarnọng kk'ọgbaak-ettem ch'Ibinọkpaabyi okkikken obena bẹ́, "Zaa wura Ọvaar Ibinọkpaabyi ogwung amma p'ọrọngkpakpa otte eje, minna mòde." Wa Elisha kk'ẹ ọpọhna bẹ́, "Kọ m'atima achen pọ aze odik nwo ch'im'oyin. Okenaka, kọ ọttọhk kpenamkpen nya, màchi!" 20 Wa odik nwo oyin mbengana mach'Elisha ikk'ọgbaaka. Anọng abarẹ ọnọng nwo mmo ny'ebhumma maa, ope.