1 Wa Josaya ode icho ochenọnttaan k'ogbe kw'masẹ-ẹ ẹvaar. Oninga z'Jẹrusalẹm ọbaabha k'icho ẹrọbh okwuma ijobh kawanẹ. Ọkka kwẹ okpen Jedida, kw'ode kwanọngnwa kw'Adaya kw'ofon Boska. 2 Wa osi idik s'idaakẹ Ọvaar Ibinọkpaabyi, obir otor ntọkọ s'Devid kw'ode otte kwẹ k'eden kpenamkpen. Wa nnam kọkpa ọbọra idik ọkkọkka osisi.

3 Ny'icho ttong ichi kkanttaan s'ọbaabh, ọvaar Josaya ọtọhm Shafan kw'ode ọkkẹrẹ z'Ọsọhm kw'Ibinọkpaabyi. Azaliya kw'ode nnwa kw'Meshulam wọ obhonọ Shafan. Josaya oben-ẹ bẹ́, 4 "Zọhng kebha Hilkiya kw'ode ọfọhn-ẹja kwiden, aben-ẹ bẹ́, obhik akpuka mbo p'matim akwu z'Ọsọhm kw'Ọvaar Ibinọkpaabyi, kw'ode akpuka p'akker-ẹsọhmma nkk'atọka z'anọng k'mbọhk. 5 Tte matọka akpuka mbo anang anọng p'marọhbh bẹ́, makkerẹ ọtọhm f'Ọsọhm kw'Ibinọkpaabyi. Tte akker-ọtọhm mbo anang anọng p'ad-ado Ọsọhm nwo kw'Ibinọkpaabyi akpuka. 6 Atọhmnọng mbo ade amin-agbaaka, ayik-isọhm ọmaana abẹ-isọhm. Tte mabir adebh nchi s'agbaaka, ọmaana ata p'madok-odoka p'mm'atima ado Ọsọhm kw'Ibinọkpaabyi. 7 Okenaka, tte ọnọng oning bẹ oyerẹ bẹ́, makwu anang obhik f'akpuka mbo p'manang bẹ, okurọ bẹ́, bẹ mator-otor k'osisi kwabẹ."

8 Hilkiya kw'ode ọfọhn-ẹja oben Shafan kw'ode ọkkẹrẹ bẹ́, "Kk'Nnwẹr kw'Apaanga nza z'Ọsọhm kw'Ibinọkpaabyi." Hilkiya ọtọka wẹ ọnang Shafan, oyerẹ. 9 Shafan kw'ode ọkkẹrẹ obina ozeng z'ọvaarnọng, od-otek-ẹ bẹ́, "Adukwa pọ kk'akpuka p'aning z'Ọsọhm kw'Ibinọkpaabyi atọka anang anọng p'asi ọtọhm, ọmaana ayok p'akkerẹ ọtọhm ny'Ọsọhm kw'Ibinọkpaabyi." 10 Nya o, Shafan kw'ode ọkkẹrẹ otek ọvaar Josaya bẹ́, "Hilkiya kw'ode ọfọhn-ẹja kk'aam nnwẹr ọnanga e." Shafan oyerẹ nnwẹr nwo ny'ọvaarnọng k'ititika.

11 K'ogbe kw'ọvaarnọng ọbhaang idik s'Nnwẹr nwo kw'Apaanga, ọyaakẹ ekpo py'ọfọr ny'ifor. 12 Ọvaarnọng oben Hilkiya kw'ode ọfọhn-ẹja, ọmaana Ahikam kw'ode nnwa kw'Shafan, ọmaana Akọr kw'ode nnwa kw'Mikaya, ọmaana Shafan kw'ode ọkkẹrẹ, ọttara Asaya kw'ode ọtọhmnọng kw'ọvaarnọng bẹ́, 13 "Màzọhng bọbh Ọvaar Ibinọkpaabyi odik kw'ọmaan idik s'nnwẹr nwa kw'nkk'ọza. Màbọbh-ẹ k'eso chaam, ọmaana k'eso ch'anọng mba, ọttara k'eso ch'Juda maphyir. Kirẹ, ottempyibha kw'Ọvaar Ibinọkpaabyi kw'mayemẹ, kẹ kw'im'otima otor mina, okurọ ch'ab'ttatta p'achi mina eden, nna idik s'makkẹrẹ m'nnwẹr nwa s'maan mina, akpobh."

14 Hilkiya kw'ode ọfọhn-ẹja, ọmaana Ahikam, ọmaana Akbọr, ọmaana Shafan, ọttara Asaiya, mafona, mad-akebha Hulda kw'ode ọgbaak-ettem ch'Ibinọkpaabyi k'ẹpanọng, magbaak odik amaan-ẹ. Hulda wọ uwa ode kwanọng kw'Shalum, kw'Tikva obhonọ kw'ode nnwa kw'Harhas kw'od-okkerẹ ibyi s'ẹfọrakpo py'Ọsọhm kw'Ibinọkpaabyi. Wa kẹ orukọ z'Ẹkọma Ẹbhachẹ ch'Jẹrusalẹm.

15 Kwanọng nwo oben bẹ bẹ́, "Ọvaar Ibinọkpaabyi kw'ode Ibinọkpaabyi kw'Israẹl obenẹ bẹ́, ‘Tek ojinọng kw'ọtọhm-ọ bẹ́, 16 Ọvaar Ibinọkpaabyi oben-ẹ bẹ́, Kaam m'ntọhm itama nnang m'obhon nwa ọmaana anọng p'arukọ ma, k'ose kw'ọvaarnọng kw'Juda kk'ọttọhk kpenamkpen f'makkẹrẹ m'nnwẹr nwoma, oyera. 17 Ch'anọng mba nkk'aam abhuma, mabir akwọmọ insẹns anang aka, bẹ nkk'ottempyibh kwaam ayema okurọ aka pabẹ maphyir p'matim mbọhk, asi. Ottempyibha kwaam ọmaana anọng mba, ẹkpọka moyena.’ 18 Ṉ́nòde ọvaarnọng kw'Juda kw'ọtọhm-ọ bẹ́, akwu abọbh Ọvaar Ibinọkpaabyi odik, tek-ẹ bẹ́, ‘Ma wọ ode odik kw'Ọvaar Ibinọkpaabyi kw'ode Ibinọkpaabyi kw'Israẹl ọgbaakẹ ọmaana idik s'nkk'abhaanga: 19 ch'bọnga masẹr-ọsẹr atin mpyibha sabọnga, mabir asaka ifor sabọnga z'Ibinọkpaabyi k'ititika ch'mabhaang itama s'mgbaakẹ mmaana ibyi nja, ọmaana anọng p'aning ma, ch'nnang bẹ ẹmma, mbir mben bẹ́, nk'eden mayin, ch'mpyibha sabọnga ibir isi bọnga okwo maa, mabhom amọng m'kaam k'ititika, kaam Ọvaar Ibinọkpaabyi kk'ẹmọng chabọnga mbir mmaanga. 20 Ofona nya, kaam m'ntobha bọnga k'ose kw'mm'ator ab'ttatta pabọnga, manọhnga bọnga k'ẹmẹm. Achen pabọnga itama maphyir s'm'ntima ndim m'ibyi nja, maze.’ " Minna kw'matọk ẹkkaabha ndo achena ọvaar Josaya.