1 Nya o, ọvaarnọng oyerẹ ọkwa kw'asogbọhkọnọng maphyir p'Juda ọmaana p'Jẹrusalẹm. 2 Otima anọng p'Juda, ọmaana anọng p'Jẹrusalẹm, ọmaana afọhn-ẹja, ọmaana agbaak-ettem ch'Ibinọkpaabyi, ọttara anọng mboza maphyir, tọma z'ayok p'kperede, pyirẹ z'ayok piden, ochina z'Ọsọhm kw'Ibinọkpaabyi. Oyerẹ idik maphyir s'makkẹrẹ z'nnwẹr kw'echekẹ kw'maze z'Ọsọhm kw'Ọvaar Ibinọkpaabyi ọnang bẹ, mabhaanga. 3 Ọvaarnọng obe otuma ẹkpọmmachi, osi echekẹ ẹbhachẹ ny'Ọvaar Ibinọkpaabyi k'ititika bẹ́, kẹ m'otima ettem chẹ maphyir, ọmaana ọgbagba kwẹ maphyir otor Ọvaar Ibinọkpaabyi, obir okpobha asana pẹ, ọmaana okpebhẹ kwẹ, ọttara apaanga pẹ. M'ofona nya, idik s'echekẹ s'makkẹrẹ m'nnwẹr nwa, m'iyin minna k'odik ọkkọkka. Nya o, anọng mbo maphyir make ọbọhk ny'echekẹ ndo.

4 Ọvaarnọng oben Hilkiya kw'ode ọfọhn-ẹja kwiden, ọmaana afọhn-ẹja mboza p'ator-ẹ k'nnam, ọmaana ayok p'akkerẹ ẹsọhmma bẹ́, machina z'Ọsọhm kw'Ọvaar Ibinọkpaabyi, mad-arọhbha ekpo maphyir py'mad-atima akpobha Baal, ọmaana Ashẹra, ọttara ekpo py'ọrọngkpakpa. Ọkwọmọ pyẹ z'mbọr-mbọr s'Jẹrusalẹm, z'ẹgba, z'ilokodo s'Kidrọn. Otima ititọhng njo, ochina z'Bẹtẹl. 5 Okwubh afọhn-ẹja mbo p'aka maphyir p'ọvaarnọng kw'Juda ọrọhbh bẹ́, makwọmọ insẹns z'ọja-byi f'ọyaankpa z'ibhondim s'Juda, ọmaana njo s'nyọm Jẹrusalẹm. Wa afọhn-ẹja mbo ad-afọhnọ nja z'ogbe nwo anang Baal, ọmaana echekira, ọmaana ophe, ọttara ekpo py'ening z'ọrọngkpakpa. 6 Ọvaarnọng ọrọhbha ẹka-chi ch'Ashẹra z'Ọsọhm kw'Ọvaar Ibinọkpaabyi, otima oyin z'iyaan kw'Jẹrusalẹm, z'ilokodo s'Kidrọn, ọkwọmọ chẹ za. Okok akpongkkang p'ẹka-chi ndo, ọnyaanẹ z'apekwuk p'afutẹtẹ-nọng. 7 Obir ọvọhkọ isọhm s'azaza p'ejinọng s'ining z'Ọsọhm kw'Ọvaar Ibinọkpaabyi, za ch'panọng ad-aninga ayok ekpo py'Ashera.

8 Josaya otima afọhn-ẹja maphyir p'aning z'ibhon s'Juda oyin ka, pira nolukọ ọja-byi f'ọyaankpa f'ọtọm z'Geba maa opyirẹ z'Beershẹba, za ch'iwa afọhn-ẹja ad-aninga akwọmọ insẹns. Ọvọhkọ ebhumma-den ch'echin z'ebhumma ch'ebhondim ch'Joshua ọbaabh ch'ening z'obhurubọhk kw'ebhumma ch'ebhondim. 9 Chibhẹ ch'iwa afọhn-ẹja p'ọja-byi f'ọyaankpa nna ọtọhm asi z'ija-byi s'Ọvaar Ibinọkpaabyi z'Jẹrusalẹm, wa mad-ator ayok afọhn-ẹja machi brẹd kw'nna yist ake.

10 Wa obir osi ẹka-kwuna ch'Tophet ch'ening z'ilokodo s'Bẹn-Hinnọm, etto asi, ọfha ọnọng oning ojinọngnwa kwẹ, wanẹma, ominanwa kwẹ, otim ọfọhnọ ẹja ch'ẹkwọmọ ọnang ọka f'Molẹk. 11 Ny'ọmma kw'ochin z'Ọsọhm kw'Ọvaar Ibinọkpaabyi, ọrọhbha nnyanya s'iwa avaar p'Juda ad-atima akpobha echekira. Wa jẹ ining k'ibyi s'inyọm idongọ s'odidennọng wanẹ kw'okpen Natan-Mẹlẹk. Josaya ọkwọmọ ijaar njo s'nnyanya id-itọr, s'mad-atima akpobha echekira.

12 Onyunọ ọja-byi f'uwa avaar p'Juda attim z'ipubhaang, za ch'ọnyọm idongọ s'Ahaz s'ining z'ẹrọng. Obir ozeng z'ọja-byi f'Manasẹ ikk'ọsa z'iter ifa s'Ọsọhm kw'Ọvaar Ibinọkpaabyi, ọrọhbha vẹ nya, ọvọhkọ matuku-tuku. Pira ọtọka adidọhbh-gbuku-gbuku mbo, ọbharẹ z'ilokodo s'Kidrọn. 13 Ọttọhk f'uwa ọvaarnọng obir osi otto asi ode ọja-byi f'ọyaankpa, f'oning z'ẹbhaakẹ ch'ewuchen ed-eyin z'Jẹrusalẹm, z'ẹwọn-ẹwọna kw'Egbe ch'adiktama. Ọja-byi mvo f'uwa ọvaar Sọlọmọn kw'Israẹl ikk'ottima ọnang Ashtorẹt kw'ode ọka f'ọbọk-ọbọkọ f'anọng p'Sidon, ọmaana Kẹmọsh kw'ode ọka f'ọbọk-ọbọkọ f'anọng p'Amọr, ọttara Molek kw'ode ọka f'ọbọk-ọbọkọ f'anọng p'Ammọn. 14 Josaya ọvọhkọ ata p'abarẹ odik, obir ọkpaara ika-chi s'Ashera, otima ayokinọng-kọbhọ, obubha obyi mvo maphyir.

15 Ozeng k'ija-byi s'ining z'Bẹtẹl, ọmaana ọja-byi f'ọyaankpa f'uwa Jeroboam kw'ode nnwa kw'Nẹbat osi, f'ọwọhkọ anọng p'Israẹl asi epyibha, wa obir ọvọhkọ vẹ maphyir, ọbharẹ. Ọkwọmọ ija-byi njo s'ọyaankpa maa, izeng ititọhng, obir ọkwọmọ ẹka-chi ch'Ashẹra. 16 Nya o, Josaya okkerẹ ọkọbha, oze apekwuk mbo p'aning z'egbe, ọrọhbha akọbhọ p'aning za, ọkwọmọ pẹ ny'ija-byi njo, ọfha ọka mvo otto asi, otor k'ọgbaakadik kw'Ọvaar Ibinọkpaabyi okkikken otima ọgbaak-ettem ch'Ibinọkpaabyi ọgbaak idik nja.

17 Ọvaarnọng ọbọbh bẹ́, "Bọng-ẹta ch'marabh amaana epekwuk ch'id-nze kina?"

Anọng p'ebhondim ndo apọhna bẹ́, "Ẹkọhk epekwuk ch'ọgbaak-ettem ch'Ibinọkpaabyi kw'ofon Juda, kw'uwa ọgbaak odik kw'ọmaan ija-byi s'Bẹtẹl, kw'ode idik oyenẹ s'ikk'asa nya."

18 Josaya oben bẹ́, "Ttẹ-ẹ ọbọhk za. Tte ọnọng oning akọbhọ pẹ, ogbokọ." Minna kw'mayobhọ akọbhọ pẹ, ọmaana mbo p'ọgbaak-ettem ch'Ibinọkpaabyi kw'ofon Samariya.

19 K'ose kw'uwa ikk'ọsa z'Bẹtẹl, minna kw'Josaya obir ọrọhbha aka-pa p'ọja-byi f'ọyaankpa maphyir p'uwa avaarnọng p'Israẹl nkk'asa z'ibhon s'Samariya, s'iwa iyemẹ ottempyibha kw'Ọvaar Ibinọkpaabyi. 20 Josaya ọfhọ afọhn-ẹja mbo p'ọja-byi f'ọyaankpa maphyir ny'ọja-byi mvo, obir ọkwọmọ ayokinọng-kọbhọ ny'ọja-byi mvo. Pira nọkpa nnam z'Jẹrusalẹm.

21 Ọvaarnọng okwu ọnang anọng maphyir ẹfa bẹ́, "Màsi odidaama kw'Pasova kw'Ọvaar Ibinọkpaabyi, kw'ode Ibinọkpaabyi kwabọnga, k'ose kw'makkẹrẹ m'Nnwẹr nwa kw'Echekẹ." 22 Pasova nwa m'ode ocheden kw'im'ode nkọmẹ, tọma z'ogbe kw'akpaar-aponga abaabh Israẹl, ọmaana z'ogbe kw'avaarnọng abaabh Juda. 23 Okenaka, ny'icho ttong ichi kkanttaan kw'ẹbaabha ch'ọvaar Josaya, wa masi odidaama kw'Pasova anang Ọvaar Ibinọkpaabyi z'Jẹrusalẹm.

24 Odik kw'ọttar nya obir ode ẹrọhbha ch'iwa Josaya ọrọhbh abọhnganọng, ọmaana anọng p'aze iyaan, ọmaana aka p'isọhmmọr, ọmaana akpata, ọmaana ibyibyadik njoza s'iwa ining z'Juda, ọmaana z'Jẹrusalẹm. Wa osi idik nja mbengana, k'ose kw'ining z'nnwẹr kw'asana, kw'uwa Hilkiya kw'ode ọfọhn-ẹja, oze z'Ọsọhm kw'Ọvaar Ibinọkpaabyi. 25 Tọma z'avaar p'achi eden abaabha maa, pyirẹ z'avaar p'akpongnnam, wa ọvaarnọng za kode mach'Josaya, kw'otte ifor sẹ ọbọhk ọnang Ọvaar Ibinọkpaabyi, ọmaana ettem chẹ maphyir, ọmaana ọgbagba kwẹ maphyir, ọttara ẹfa chẹ maphyir, k'ose kw'ode z'asana p'Mosẹs maphyir.

26 Chibhẹ nya, wa Ọvaar Ibinọkpaabyi nnam kọkpa ọbọra ottempyibha kwẹ kwiden kw'oyen k'Juda, kw'ofon k'ittem-bhemadik s'Manasẹ osi otima otor-ẹ. 27 Nya o, Ọvaar Ibinọkpaabyi oben bẹ́, "Kaam m'mbir nkwubh Juda m'kaam k'ititika k'ose kw'nkwubhọ Israẹl, mbir mbhum Jẹrusalẹm kw'ode ebhondim ch'ntek, ọmaana Ọsọhm nwa kw'Ibinọkpaabyi kw'mbenẹ bẹ́, "Nya kw'mm'aninga akpobha Eche chaam*."

28 Idik njoza s'iyinẹ k'ogbe kw'Josaya ọbaabh, ọmaana idik s'osi, makkẹrẹ z'anwẹr p'avaar p'Juda.

29 K'ogbe kw'uwa Josaya otim ẹvaar, Phero Neko kw'ode ọvaarnọng kw'Ijip, obina ochina z'ọraanga kw'Eupharetes bẹ́, ọd-ọkkaana ọvaarnọng kw'Asiriya. Ọvaar Josaya obina oyin egbong ọmaan-ẹ. Minna kw'Neko orim-ẹ ábẹ̀, ọfhẹ-ẹ z'Megido. 30 Atọhmnọng p'Josaya, matọhka oforbukọ kwẹ k'ijaar s'ẹnyanya ẹd-ẹtọr, tọma z'Megido maa, pyirẹ z'Jẹrusalẹm. Manọhng-ẹ z'epekwuk chẹ oyenẹ. Anọng p'ẹkọma ndo makwu ayaana Jehoahaz kw'ode nnwa kw'Josaya, manang-ẹ ẹvaar ch'otte.

31 Wa Jehoahaz ode icho ẹrọbh okwuma ittaan k'ogbe kw'otim ẹvaar ch'Israẹl. Oninga z'Jẹrusalẹm ọbaabha k'aphe attaan. Wa ọkka kwẹ okpen Hamutal, kwanọngnwa kw'Jẹrimaya kw'ofon Libna. 32 Wa Jehoahaz osi itama z'ititika s'Ọvaar Ibinọkpaabyi, k'ose kw'anọng p'achẹ-ẹ eden k'ẹbaabha, nkk'asa. 33 Wa Phero Neko ọkẹ-ẹ mgbakkọhbhọ z'Ribla, z'ẹkọma ch'Hamat, ọfha oning Jẹrusalẹm ọbaabh. Ọnang anọng p'Juda ọkpaara kw'ode atalẹn p'silva arọbh achen, ọmaana talẹn mawanẹ kw'gol. 34 Phero Neko ọtọka Ẹliyakim, kw'ode nnwa kw'Josaya, ọnang-ẹ ẹvaar ch'otte. Obhona eche ch'Ẹliyakim, nọkpẹ-ẹ Jehoakim. Okwu ọtọka Jehoahaz otima ozeng z'Ijip. Oninga za maa, ope. 35 Jehoyakim okwu ọnang Phero Neko silva, ọmaana gol mbo p'ọbọbh-ẹ. Pira wa oyena silva, ọmaana gol mbo, wa ọkpaar ọtabha ọnang anọng p'izek njo, otor k'ose kw'ẹfa ch'ọnọng-ọnọng ebeng.

36 Wa Jehoyakim ode icho ẹrọbh okwuma ichen k'ogbe kw'otim ẹvaar ch'Juda. Oninga z'Jẹrusalẹm ọbaabha k'icho ijobh kkamfa. Wa ọkka kwẹ okpen Zebida kw'ode kwanọngnwa kw'Pedaya kw'ofon Ruma. 37 Wa Jehoyakim osi itama z'ititika s'Ọvaar Ibinọkpaabyi, k'ose kw'anọng p'achẹ-ẹ eden abaabha, nkk'asa.