1 Wa Elisha kk'kwanọng nwo kw'osi nnwa kwẹ ọphyabha k'obo obena bẹ́, "Tima ẹsọhmmọr chọ bina, mad-aninga k'ibyi kpenamkpen s'idaak-ọ k'ogbe makarẹ. Kirẹ, Ọvaar Ibinọkpaabyi kk'obena bẹ́, ekimẹkimẹ chiden m'eninga ma, k'icho ichenọmfa." 2 Minna kw'kwanọng nwo obin osi k'ose kw'ọgbaak-ettem ch'Ibinọkpaabyi nwo obenẹ. Otima ẹsọhmmọr chẹ obina ozeng z'ẹkọma ch'Philistiya, od-oninga za k'icho ichenọmfa.

3 Icho nwo kw'ottong ichenọmfa ọsa nya o, kwanọng nwo obina z'ẹkọma ch'Philistiya okwuna. Ozeng z'ọvaarnọng, od-ophyem-ẹ bẹ́, ọnang-ẹ ọsọhm, ọttara izek sẹ. 4 Wa ọvaarnọng ọd-ọgbaak odik ọnang Gehazi kw'ode ọtọhmnọng kw'ọgbaak-ettem ch'Ibinọkpaabyi, oben bẹ́, "Tek-m idik s'ibar odik maphyir s'Elisha ikk'ọsa." 5 K'ose kw'Gehazi od-otek ọvaarnọng ose kw'Elisha kk'ọnọng ọphyabha k'obo, kwanọng nwo kw'Elisha ọphyabh nnwa kwẹ k'obo oyin nya bẹ́, ophyem ọvaarnọng, ọnang-ẹ ọsọhm, ọttara izek sẹ. Gehazi oben bẹ́, "Ttatta ọvaarnọng kwaam, kwanọng nwo wọ ma e, ojinọngnwa kwẹ kw'Elisha ọphyabh k'obo e." 6 Ọvaarnọng ọbọbh kwanọng oyenẹ odik nwo. Kwanọng nwo otek-ẹ.

Ọvaarnọng ọtọka odik kw'kwanọng nwo ọgbaara ọtọhmnọng wanẹ kwẹ, oben-ẹ bẹ́, "Tọka ọttọhk kpenamkpen f'ode f'kwanọng nwo, nang-ẹ, ozeng k'ikpuka maphyir s'ifon z'izek sẹ, tọma ny'ewu ch'iwa obin orik obhon maa, pyirẹ menda."

7 Wa Ẹlisha obina ochina z'Damaskus k'ogbe kw'ọvaar Bẹn-Hadad kw'Aram ọmmẹ-ẹ ọmma. Matek ọvaarnọng bẹ́, "Ọgbaak-ettem ch'Ibinọkpaabyi kk'ozenga k'odenbhir okwu ma e." 8 Ọvaar Bẹn-Hadad oben Hazayẹl kw'ode odukwa kwẹ bẹ́, "Tọka ẹnanga tima kebha ọgbaak-ettem ch'Ibinọkpaabyi, aben-ẹ ọbọbh Ọvaar Ibinọkpaabyi bẹ́, ‘Ma, ina mbina m'ọkọhmaana mva o?’ " 9 Minna kw'Hazayẹl ofon od-okebha Elisha. Otima ẹnanga ch'ekpo py'ejibhẹ ọtam ny'Damaskọs, ọnana k'akamẹl arọbh afa, otima od-obe Elisha ny'ititika, oben-ẹ bẹ́, "Nnwa kwọ Bẹn-Hadad kw'ode ọvaarnọng kw'Aram wọ ọtọhm-m bẹ́, nkwu mbọbh-ọ bẹ́, ‘Ma, ina mbina m'ọkọhmana mva o?’ " 10 Ẹlisha ọpọhna bẹ́, "Zọhng ben-ẹ bẹ́, ‘Etuna kede bẹ́, m'abin-obina ny'ọkọhmaana mvo.’ Okenaka, Ọvaar Ibinọkpaabyi kk'ẹyaakẹ ọsa ọnang-m bẹ́, kẹ m'opope k'odik ọkkọkka." 11 Elisha ottima Hazayẹl ichen maa, mgbar isẹ-ẹ. Minna kw'ọgbaak-ettem ch'Ibinọkpaabyi nwo ọtọma ẹmọng obhubhom.

12 Hazayẹl ọbọbh-ẹ bẹ́, "Ode yen kw'ttatta kwaam od-obhom ẹmọng o?"

Elisha ọpọhna bẹ́, "Nd-mbhom okurọ itama s'nzong bẹ́, m'asi anọng p'Israẹl. Kọ m'ake ekpon k'ọfa-byi fabẹ, atima ọkkangkkang afhọ ajinọngva pabẹ, amaam ivava biribirẹ pabẹ ny'izek, abir ataarẹ panọng pabẹ p'atim ibhọr."

13 Hazayẹl oben bẹ́, "Kaam ọtọhmnọng kwọ kw'nde mach'ọfa-nnwa kw'ina ọttọhk áfẹ̀ ọbang, m'ntọma yen pira nsi odik katamse nwo o?"

Ẹlisha ọpọhna bẹ́, "Ọvaar Ibinọkpaabyi kk'aam ọkọhka bẹ́, kọ m'ade ọvaarnọng kw'Aram."

14 Minna kw'Hazayẹl obin orik Elisha nya, ọkpa nnam z'otte kw'orukọ abẹ. K'ogbe kw'Bẹn-Hadad ọbọbhọ Hazayẹl bẹ́, "Elisha oben-ọ yen?" Hazayẹl ọpọhn-ẹ bẹ́, "Otek-m bẹ́, kọ m'abin-obina k'ọkọhmaana k'odik ọkkọkka." 15 Okenaka, ewu esobh nya, Hazayẹl ọtọka ọbangmgbodo, kw'ikk'ọrana k'asi, obubha ọvaarnọng k'ititika. Ofona nya, ọvaarnọng ope. Hazayẹl o, okwu ọtọka ẹvaarninga chẹ.

16 Ny'icho ttong ichen s'Joram kw'ode nnwa kw'ọvaar Ahab kw'Israẹl ọbaabh, ny'ogbe kw'Jehoshaphat ode ọvaarnọng kw'Juda, nya kw'Jehoram kw'ode nnwa kw'Jehoshaphat, ọtọm Juda obubaabha. 17 Wa Jehoram ode icho ẹrọbh okwuma ijobh kkamfa, k'ogbe kw'ọtọm ẹvaar otitima. Oninga z'Jẹrusalẹm ọbaabha k'icho ochenọnttaan. 18 Wa kẹ otorọ ntọkọ s'avaarnọng p'Israẹl, k'ose kw'ẹsọhmmọr ch'Ahab ikk'ẹsa, okurọ ch'ọtọk ominanwa wanẹ kw'Ahab k'ọbada. Wa osi itama k'ititika s'Ọvaar Ibinọkpaabyi. 19 Chibhẹ ch'ode minna, Ọvaar Ibinọkpaabyi ozenga Devid kw'ode ọtọhmnọng kwẹ ábubẹ̀, ọtọr ifor k'edimẹ ch'ọkamẹ bẹ́, m'odimẹ Juda. Wa kẹ kk'ocheka bẹ́, ọnọng mòwor ny'ọsọhm kw'Devid, kw'im'otima ẹvaar ch'Devid, ttattampe.

20 K'ogbe kw'Jehoram ọbaabh, nya kw'anọng p'Edom make anọng p'Juda ẹkọhr. Ny'ogbe nwo wọ kw'mabir abhaaka ẹvaar chabẹ oyenẹ. 21 Ofona nya, Jehoram otima ijaar sẹ maphyir s'nnyanya id-itọr, ochina z'Zair. Wa anọng p'Edom akọbha kẹ, ọttara aso p'ayaar ijaar sẹ s'nnyanya id-itọr ake k'ettem. Otum ny'erungọ, obina ọmaana aso p'ayaar ijaar s'nnyanya id-itọr, ọphaakẹ ny'ottem kw'ikpakaana njo, odwu z'okwubha. Okenaka, asoja pẹ, marọbh akpa nnam zabẹ k'isọhm. 22 Tọma za maa, pyirẹ ma, anọng p'Edom aning k'ẹkọhr amaana anọng p'Juda. Ny'ogbe nwo mawan-wanẹ, wa ẹkọma ch'Libna, ebir ẹjẹ ẹkọhr.

23 Idik njoza s'iyinẹ k'ogbe kw'Jehoram ọbaabh, ọmaana idik s'osi maphyir, makkẹrẹ z'anwẹr p'avaar p'Juda. 24 Wa Jehoram okwu ope, manọhng-ẹ za ch'manọhng ab'otte, z'ebhondim ch'Devid. Ojinọngnwa kwẹ kw'okpen Ahaziya, okwu ọtọka ẹvaarninga ch'otte.

25 Ny'icho ttong ijobh kkamfa s'Joram kw'ode nnwa kw'Ahab ọbaabh Israẹl, nya kw'Ahaziya kw'ode nnwa kw'ọvaar Jehoram kw'Juda, ọtọm ẹbaabha. 26 Wa Ahaziya ode icho ẹrọbh okwuma ifa k'atam, k'ogbe kw'masẹ-ẹ ẹvaar. Oninga z'Jẹrusalẹm ọbaabha k'icho mawanẹ. Wa ọkka kwẹ okpen Ataliya, kw'ode nnwa kw'nnwa kw'ọvaar Omri kw'Israẹl. 27 Wa otorọ ntọkọ s'ẹsọhmmọr ch'Ahab. Osi itama z'ititika s'Ọvaar Ibinọkpaabyi, k'ose kw'ẹsọhmmọr ch'Ahab ikk'ẹsa, okurọ ch'iwa ọtọk kwanọng ny'echimma ndo.

28 Ahaziya otima Joram kw'ode nnwa kw'Ahab, od-orima ọvaar Hazayẹl kw'Aram ábẹ̀, z'Ramọt-Gilead. Anọng p'Aram mamuma Joram ekpo. 29 Minna kw'ọvaar Joram ọkpa nnam z'Jẹzrẹl. Oninga za bẹ́, abhaak p'ekpo py'anọng p'Aram nkk'ẹ amuma z'egbong ch'orim ọmaana ọvaar Hazayẹl z'Ramọt-Gilead, mape. Nya o, Ahaziya kw'ode nnwa kw'ọvaar Jehoram kw'Juda, obina ozeng z'Jẹzrẹl, od-oze Joram kw'Ahab obhonọ, okurọ ekpo py'nkk'ẹ amuma.