1 Ny'ogbe kw'Jehoyakim ọbaabh, ọvaar Nebukadnẹza kw'Babilọn, otima ẹkọhr odim z'Juda. Jehoyakim okwu oninga k'ẹbaabha ch'Nebukadnẹza k'icho ittaan. Okenaka, ọkpa nnam ọbọra Nebukadneza, obe idungsẹ ọmaan-ẹ. 2 Ọvaar Ibinọkpaabyi ọtọhm agbongnọng p'Babilọn, ọmaana p'Aram, ọmaana p'Moab, ọttara p'Ammọn bẹ́, mad-adimẹ Juda, ator k'ọgbaakadik kw'Ọvaar Ibinọkpaabyi otim atọhmnọng pẹ, p'ade agbaak-ettem ch'Ibinọkpaabyi, ọgbaak. 3 K'odik ọkkọkka, wa idik nja iyinẹ ikebha Juda itor k'ọgbaakadik kw'Ọvaar Ibinọkpaabyi ikk'ọgbaaka, ọfha otima okwubh anọng p'Israẹl ny'ikẹ k'ititika, okurọ mpyibha s'Manasẹ, ọmaana idik maphyir s'ikk'ọsa, 4 ọttara ọzẹ f'anọng p'mbọhk sabẹ iwur-owur f'okibhẹ. Wa kẹ kk'ọzẹ f'anọng p'mbọhk sabẹ iwur-owur, okibha maphyir ọkọbha Jẹrusalẹm. Wa Ọvaar Ibinọkpaabyi ifor kodo bẹ́, m'obina ọnang-ẹ.

5 Idik njoza s'iyinẹ k'ogbe kw'Jehoyakim ọbaabh, ọmaana idik s'osi, makkẹrẹ z'anwẹr p'avaar p'Juda. 6 Jehoyada ope otor ab'otte za. Jehoyakim kw'ode nnwa kwẹ, okwu ọtọka ẹvaarninga chẹ.

7 Wa ọvaarnọng kw'Ijip ọdọk z'ikẹ k'ẹkọma kobin oyin k'iyaan, okurọ bẹ́, ọvaarnọng kw'Babilọn kk'ẹkọma chẹ ọtọka maphyir, tọma z'Ekeka ch'Ijip maa, pyirẹ z'ọraanga kw'Eupharetes.

8 Wa Jehoyakin ode icho ichi kkanttaan k'ogbe kw'otim ẹvaar. Oninga z'Jẹrusalẹm ọbaabha k'aphe attaan. Wa ọkka kwẹ okpen Nebushta kw'ode kwanọngnwa kw'Elnathan kw'ofon Jẹrusalẹm. 9 Wa osi itama z'ititika s'Ọvaar Ibinọkpaabyi mach'otte kwẹ, ikk'ọsa.

10 Ny'ogbe nwo, agbongnọng p'Nebukadneza, abina azeng z'Jẹrusalẹm, mad-ayima egbong za. 11 Nebukadneza oyenẹ, okwu ny'ebhondim ndo, nya ch'agbongnọng pẹ mad-ayima egbong. 12 Ọvaar Jehoyakin kw'Juda, ọmaana ọkka kwẹ, ọmaana anọng p'ad-akker-ẹ, ọmaana aganọng, ọmaana adukwa pẹ maphyir, machera ekema ch'Nebukadnez.

Ny'icho ttong ochenọnttaan kw'ọvaarnọng kw'Babilọn ọbaabh, ọbọka Jehoyakin mach'ọgbakkọhbhọnọng, otima ofona.

13 K'ose kw'Ọvaar Ibinọkpaabyi ikk'ọgbaaka, Nebukadneza ọrọhbha ekpo ọkkọkka py'Ọsọhm kw'Ibinọkpaabyi, ọmaana mbyoza py'ening z'ọvaardimpa, obir ọkpaara ekpo mbyoza py'matim gol asi, py'iwa ọvaar Sọlọmọn ikk'ọsa osok z'Ọsọhm kw'Ọvaar Ibinọkpaabyi. 14 Ọtọka anọng p'Jẹrusalẹm maphyir, ọtọhm ebira, tọma z'adukwa, tto z'agbongnọng, pyirẹ z'ayok p'ayen itọhmbọhk, ọttara azeng-mphya. Wa bẹ maphyir made anọng nnọhna ẹrọbh okwuma ichen. Anọng p'ogbor bẹ ọtam ny'izek njo, bẹ-bẹ bọ p'uwa orikẹ.

15 Nebukadneza ọbọka Jehoyakin, ọtọhm-ẹ ebira z'Babilọn. Obir ọbọka ọkka kw'ọvarnọng, ọmaana panọng pẹ, ọmaana atọhmnọng pẹ, ọttara aganọng p'izek njo ny'Jẹrusalẹm, otima bẹ ozeng z'Babilọn. 16 Wa ọvaarnọng kw'Babilọn obir ọtọhm agbongnọng kibung-kibungọ p'ade anọng nnọhna ichi kkamfa okwuma arọbh ijobh p'ayen ẹfa mawuriji, mabir abaana k'egbong oririma, ọmaana anọng nnọhna mfa okwuma arọbh ijobh p'ayen itọhmbọhk, ọmaana azeng-mphya, z'Babilọn. 17 Okwu ọtọka Mattaniya kw'ode ọgbaanotte kw'otte kw'Jehoyakin, ọnang ẹvaar chẹ. Obhon-ẹ eche, ọkpẹ-ẹ Zedekiya.

18 Wa Zedekiya ode icho ẹrọbh okwuma icho mawanẹ, k'ogbe kw'otim ẹvaar ch'Juda. Oninga ny'Jẹrusalẹm ọbaabha k'icho ijobh kawanẹ. Wa ọkka kwẹ okpen Hamutal, kw'ode kwanọngnwa kw'Jẹrimaya kw'ofon Libna. 19 Wa osi itama z'ititika s'Ọvaar Ibinọkpaabyi, k'ose kw'Jehoyakin, ikk'ọsa. 20 Wa ofon k'ottempyibha kw'Ọvaar Ibinọkpaabyi, pira idik nja maphyir, iyin ikebha Jẹrusalẹm ọmaana Juda. K'okponganamgbe, okwubh bẹ maphyir ny'ikẹ k'ititika, ọbharẹ.

Ny'ogbe nwo, Zedekiya obe idungsẹ ọmaana ọvaarnọng kw'Babilọn.