1 Wa ny'ogbe nwo, Hezekiya okwu otto obo-kọhmaana. Izaya kw'ode ọgbaak-ettem ch'Ibinọkpaabyi, kw'ode nnwa kw'Amos, ofona od-oben-ẹ bẹ́, "Ọvaar Ibinọkpaabyi obenẹ bẹ́: M'atobha ọsọhm kwọ oninga k'ọkkọkka, okurọ bẹ́, m'apope e; ọkọhmaana mva, manaanga."

2 Minna kw'Hezekiya ọbhakẹ okkerẹ etumọ, oze njọm ọnang Ọvaar Ibinọkpaabyi, oben bẹ́, 3 "O Ọvaar Ibinọkpaabyi, jima ose kw'kaam ikk'ọ mkpobha k'ọkkọkka, ọttara ose kw'ntim ettem chaam nsi ejibha ch'atim achen pọ aze." Hezekiya obhom ẹmọng mawuriji.

4 Pira Izaya obina ny'ottem kw'eterttem ndo, Ọvaar Ibinọkpaabyi oben-ẹ bẹ́: 5 "Kpa nnam, ad-atek Hezekiya kw'ọbaabh anọng paam bẹ́, ‘Ọvaar Ibinọkpaabyi kw'ode Ibinọkpaabyi kw'Devid kw'ode atte kwọ, obenẹ bẹ́, kaam kk'njọm sọ mmaanga, mbir nze asen pọ; kaam m'nsọ-ọ abina ny'ọkọhmaana mvo. K'ewu ch'ettong ittaan tọma menda, kọ m'ata z'Ọsọhm kw'Ọvaar Ibinọkpaabyi. 6 Kaam m'nttar-ọ icho minna ichi k'akpen pọ. Kaam m'nkkaana kọ ọmaana ebhondim nda k'mbọhk s'ọvaarnọng kw'Asiriya. M'mbir nkaam ebhondim ndoma k'eche chaam, ọmaana k'eche ch'Devid kw'ode ọtọhmnọng kwaam.’ "

7 Nya o, Izaya oben atọhmnọng p'ọvaarnọng bẹ́, "Màtima achiduk p'fig, màsi echiranga." Wa bẹ masi minna. Matọka afok-ẹ nya aphyi mbo. Minna kw'obin ny'ọkọhmaana mvo.

8 Wa Hezekiya kk'Izaya ọbọbha bẹ́, "Bọng-ọttọhk vọ im'ode ẹkọhka bẹ́, Ọvaar Ibinọkpaabyi m'obin-m m'ọkọhmaana mva, ọmaana ch'obenẹ bẹ́, kaam m'nta z'Ọsọhm kw'Ọvaar Ibinọkpaabyi, k'ewu ch'ettong ittaan, tọma menda o?"

9 Ofona nya, Izaya ọpọhn-ẹ bẹ́, "Ma wọ ode ẹkọhka ch'Ọvaar Ibinọkpaabyi ikk'ocheka ọmaan-ọ bẹ́, Ọvaar Ibinọkpaabyi m'osi ọttọhk f'ikk'ọnwọhnga: Ma, ọgbagba m'otima ntọkọ ijobh ochina ititika, wanẹma, m'otima ntọkọ ijobh ochina nnam-nnam yirẹ?"

10 Hezekiya oben bẹ́, "Ode ọttọhk f'ọmọm-ọmọm bẹ́, ọgbagba otima ntọkọ ijobh, ochina ititika. Kọmọmọ bẹ́, obir otima ntọkọ ijobh ochina nnam-nnam."

11 Nya o, Izaya kw'ode ọgbaak-ettem ch'Ọvaar Ibinọkpaabyi oze njọm oyerẹ Ọvaar Ibinọkpaabyi. Minna kw'Ọvaar Ibinọkpaabyi osi ọgbagba nwo ochina nnam-nnam ntọkọ ijobh otima ọsaka abhukakpa p'ọsọhm kw'Ahaz.

12 Ny'ogbe nwo, Marduk-Baladan kw'ode nnwa kw'ọvaar Baladan kw'Babilọn, ọtọhm ẹkkaabha ọmaana ẹnaanga ochena Hezekiya, okurọ ch'ọbhaang ọkọhmaana f'Hezekiya. 13 Hezekiya olobh azeng-eden mbo, ọd-ọkọhka bẹ ekpo mapyhir py'ening ny'ọsọhm kw'nd-aye ekpo py'ejibh-ojibh mach'silva, ọmaana gol, ọmaana ekpo py'elebh eruk, ọttara ana p'oliv. Obir otima bẹ ọd-ọkọhka egbongkpo, ọmaana ọttọhk kpenamkpen f'ọbarẹ odik. Ọttọhk kode f'oning ny'ọvaarsọhm kw'Hezekiya, ọmaana ny'ebhondim chẹ, f'uwa ina anọng mbo, ọkọhk.

14 Ofona nya, Izaya kw'ode ọgbaak-ettem ch'Ibinọkpaabyi, obina od-okebha Hezekiya kw'ode ọvaarnọng, ọbọbh-ẹ bẹ́, "Bọng-odik kw'ajinọng mbo, abenẹ? Bọng-ẹbhaakẹ ch'mabin akwu?

Hezekiya ọpọhn-ẹ bẹ́, "Mafon z'ẹkọma ch'ebhir-obhir."

15 Izaya ọbọbh-ẹ bẹ́, "Bọng-ọttọhk f'anọng mbo aze ny'ọvaarsọhm kwọ o?"

Hezekiya oben bẹ́, "Maze ọttọhk kpenamkpen f'oning ny'ọvaarsọhm kwaam. Ọttọhk kode f'ọbar-m odik, f'ina bẹ nkọhk."

16 Nya o, Izaya oben Hezekiya bẹ́, "Bhaanga ọgbaakadik kw'Ọvaar Ibinọkpaabyi: 17 K'odik ọkkọkka, ogbe okwuma kw'mm'atọka ọttọhk kpenamkpen f'oning ny'ọvaardimpa kwọ, ọmaana ekpo py'ab'atte p'achi eden abaabha nkk'aya maa, pyirẹ menda, matima afona z'Babilọn. Ọvaar Ibinọkpaabyi ọgbaakẹ bẹ́, ọttọhk f'im'orik-orik nya, kode. 18 Iva banẹ p'iva pọ, p'ade izẹ sọ oyenẹ, p'mm'amaan anang-ọ, mm'atọka bẹ, atima afona, mad-ade anọng p'mabhaar-ọbhaar z'ọvaardimpa kw'ọvaarnọng kw'Babilọn."

19 Hezekiya oben bẹ́, "Ẹkkaabha nda ch'Ọvaar Ibinọkpaabyi ch'agbaak ma, ejibh-ojibh." Wa ofon ch'Hezekiya ochibhẹ bẹ́, "Kaam m'nyena ẹmẹm ọmaana odiriji m'akpen paam."

20 Idik njoza s'iyinẹ k'ogbe kw'Hezekiya ọbaabh, ọmaana idik s'osi maphyir, ọmaana oyena kwẹ, ozeng k'ose kw'otumọ esipe, ọmaana ebhobh ch'etim asi edim z'ebhondim, makkẹrẹ z'anwẹr p'avaar p'Juda. 21 Wa Hezekiya okwu ope otor ab'otte za. Manasẹ kw'ode nnwa kwẹ, okwu ọtọka ẹvaarninga chẹ.