1 Wa Joram kw'ode nnwa kw'Ahab okwu otima ẹvaar ch'Israẹl z'Samariya, ny'icho kw'ottong ichi kkanttaan s'Jehoshaphat ọbaabh Juda. Joram oninga z'Samariya ọbaabha k'icho ijobh kkamfa. 2 Wa osi itama z'Ọvaar Ibinọkpaabyi k'ititika. Okenaka, itama sẹ mach'njo s'otte ọmaana ọkka kide. Wa ọrọhbh ọta kw'Baal kw'otte ikk'ommina, ọbharẹ. 3 Okenaka, Joram ovura ọnana ny'mpyibha njo s'iwa Jẹroboam kw'ode nnwa kw'Nẹbat ikk'anọng p'Israẹl otima osi.

4 Wa Mesha kw'ode ọvaarnọng kw'Moab ode otir-arọkimaan. Wa kẹ ọd-ọnang ọvaarnọng kw'Israẹl ntuma s'arọkimaanva p'ade nnọhna arọbh ijobh kkamfa okwuma ijobh, ọmaana iphyabha s'arọkimaanva nnọhna arọbh ijobh kkamfa okwuma ijobh. 5 Okenaka, k'ogbe kw'Ahab ikk'ọpa, ọvaarnọng kw'Moab otima ẹkọhr otor ọvaarnọng kw'Israẹl. 6 Ny'ogbe nwo o, ọvaar Joram obina ny'Samariya, od-otobha agbongnọng p'Israẹl maphyir. 7 Obira ọtọhm ẹkkaabha ọnang Jehoshaphat kw'ode ọvaarnọng kw'Juda bẹ́: "Ọvaarnọng kw'Moab kk'ẹkọhr otima otor-m e. Ma, ina ator-m morim-ẹ ábẹ̀ o?"

Jehoshaphat ọpọhna bẹ́, "Iye, m'ntor-ọ otor. Kaam ọttara kọ, mode ọttọhk mavanẹ. Anọng pọ ọmaana paam, made ọttọhk mavanẹ. Nnyanya sọ ọmaana saam, ibir ide ọttọhk mavanẹ."

8 Jehoshaphat ọbọbh-ẹ bẹ́, "Bọng-eden ch'mm'ozenga orima bẹ ábẹ̀?"

Joram ọpọhna bẹ́, "Mm'ozenga ny'eden ch'Edom ny'ibyi s'anọng nna arukọ."

9 Nya o, ọvaarnọng kw'Israẹl ọmaana ọvaarnọng kw'Juda, ọttara ọvaarnọng kw'Edom, mabina ozenga. K'ogbe kw'nkk'kpangkpangtete asa k'iwu ichenọmfa, asi p'asoja pabẹ ọmaana p'nnyanya sabẹ, makwu asa.

10 Ọvaarnọng kw'Israẹl oben bẹ́, "Bọng-odik wọ ma o! Oyinẹ bẹ́, Ọvaar Ibinọkpaabyi otim mina avaar attaan okwu ma bẹ́, ọtọka mina oke anọng p'Moab k'mbọhk o?"

11 Jehoshaphat ọbọbh bẹ́, "Ọgbaak-ettem ch'Ibinọkpaabyi ma kode o, kw'mm'ọbọbh Ọvaar Ibinọkpaabyi odik o?"

Odukwa wanẹ kw'ọvaarnọng kw'Israẹl ọpọhna bẹ́, "Elisha kw'ode nnwa kw'Shaphat, oning ma e. Kẹ wọ kw'uwa Ẹlaija od-otima osi ọtọhm e."

12 Jehoshaphat oben bẹ́, "Iyaa! Kẹ ọd-ọgbaak ettem ch'Ọvaar Ibinọkpaabyi k'odik ọkkọkka." Minna kw'Ọvaarnọng kw'Israẹl, ọmaana Jehoshaphat, ọttara ọvaarnọng kw'Edom mabin akebha Elisha.

13 Elisha ọbọbh ọvaarnọng kw'Israẹl bẹ́, "Odik nwa ọmyẹ kaam yen o? Màzọhng kebha agbaak-ettem ch'Ibinọkpaabyi p'atte, ọmaana p'akka."

Ọvaarnọng kw'Israẹl ọpọhna bẹ́, "Mma e, mokwu ma, okurọ bẹ́, Ọvaar Ibinọkpaabyi ikk'mina avaar attaan otima okwu ma, ọfha ọtọka mina oke anọng p'Moab k'mbọhk e."

14 Elisha oben bẹ́, "K'ose kw'Ọvaar Ibinọkpaabyi kw'Ẹfa maphyir kw'mkpobh orukọ akpen, m'nzenga ikpukpobha s'nyen k'ọvaar Jehoshaphat kw'Juda ábubẹ̀, nyonga bọnga itọhng. 15 Mànang-m ọnọng kw'od-okir ogim-ogim."

K'ose kw'ọnọng nwo od-okir ogim-ogim nwo, ẹfa ch'Ọvaar Ibinọkpaabyi ẹsaka, ẹnwa Elisha k'ifor, 16 Elisha oben bẹ́, "Ma wọ ode odik kw'Ọvaar Ibinọkpaabyi obenẹ: Kaam m'nke asi maa, mafu m'nsipe s'igwu-ogwu, m'ilokodo nja. 17 Ọvaar Ibinọkpaabyi obenẹ bẹ́: Bọnga mm'ofum màze, m'ẹrọng màbir aze. Chibhẹ nya, asi m'afu nsipe njo. Nya kw'bọnga ọmaana abhaam pabọnga, ọmaana etirakpo mbyoza, mm'agwo asi. 18 Odik nwoma ọmọm-ọmọm z'mbọhk s'Ọvaar Ibinọkpaabyi. Kẹ m'obir ọtọka Moab, oke bọnga k'mbọhk. 19 Bọnga mm'ana bẹ ebhondim, ọmaana obhon ọkkọkka okpenamkpen kwabẹ. Mm'akkọhbh echi kpenamkpen ch'ejibh-ojibh abharẹ k'izek, makibhẹ nkeka sabẹ maphyir, mabir atima ata akibhẹ ozek ọkkọkka fabẹ."

20 Ewu esobh nya, ny'ogbe kw'mad-afọhnọ ẹja ch'ekpebha, minna kw'asi atọm z'ẹbhaakẹ ch'Edom abhobh. Asi mbo, mafu ny'ibyi njo maphyir.

21 K'ogbe kw'anọng p'Moab mabhaang bẹ́, avaar mbo attaan kk'akwa bẹ́, marima bẹ ábẹ̀, mayerẹ ojinọng kpenamkpen kw'ikk'obenga k'egbong oririma: ode nnwa-nnwa o, ode ọtaminọng o, mad-atonga z'enem chabẹ. 22 Ch'maphyabh ny'ekpikpebha, echekira ẹmaanẹ ny'asi mbo. Asi mbo akorọ mach'izẹ z'achen p'anọng p'Moab. 23 Anọng p'Moab maben ayok bẹ́, "Makirẹ azẹ e! Ṉ́nòsi avaar mbo attaan kk'ayok ábẹ̀ arima, mafhọ ayok e. Ajinọng p'Moab, màbina, mọd-ọcha oyena kwabẹ!"

24 Okenaka, k'ogbe kw'agbongnọng p'Moab mapyirẹ z'ibhinga-byi s'Israẹl, agbongnọng p'Israẹl mabina, marima bẹ ábẹ̀ maa, marọbh. Agbongnọng p'Israẹl madim ny'ẹkọma ndo, mafhọ anọng p'Moab. 25 Minna kw'mavọhkọ ibhondim sabẹ. Ojinọng kpenamkpen ọbharẹ ẹta ny'iwonọ sabẹ maa, ata abubha iwonọ sabẹ maphyir. Makpa nkeka sabẹ maphyir, mabir akkọhbh echi kpenamkpen ch'ejibh-ojibh, abharẹ. Ebhondim ch'Kir-Hareset dẹ-dẹ dọ iwa neyen ata p'attong-ottonga. Okenaka, agbongnọng p'atim abanttẹttẹ, makọbha ebhondim ndo ake k'ettem, marima dẹ ábẹ̀.

26 K'ogbe kw'ọvaarnọng kw'Moab oze bẹ́, egbong ndo kk'epyibha ẹnang-ẹ, ọtọka agbongnọng anọng ẹnọhna okwuma arọbh ichi p'atim akkangkkang bẹ́, otima odim z'obhon kw'ọvaarnọng kw'Edom. Okenaka, kokpo. 27 Nya o, ọvaarnọng kw'Moab, otima ochedennwa kw'ọbaan bẹ́, ọtọka ẹvaarninga chẹ, otim-ẹ ọfọhnọ ẹja ny'etumọ ch'ebhondim. Anọng p'Moab o, matima ottempyibha kwiden arima anọng p'Israẹl maa, agbongnọng p'Israẹl atọr nnam, mabhana zabẹ k'ẹkọma.