1 Wa Ahab oyen ajinọngva arọbh attaan okwuma ijobh p'aning z'Samariya. Jehu ọkkẹr nkkaabha ọtọhm ọnang z'Samariya bẹ́, manang asonọng p'Jẹzrẹl, ọmaana asogbọhkọnọng, ọttara anọng p'akkerẹ iva p'Ahab. Oben bẹ́, 2 "Ajinọngva p'atte kw'marukọ ábẹ̀, maning ma amaana bọnga. Ijaar s'nnyanya id-itọr, ọmaana nnyanya ibir ininga imaana bọnga. Mabir aninga k'ebhondim ch'ede ifa-byi, ebir eyena egbongkpo. K'ose kw'ẹkkaabha nda epyipyirẹ bọnga nya, 3 màchina ny'ajinọngva p'atte kw'marukọ ábẹ̀, màteka ọnọng kw'ojibhẹ ọyọhnga ayok, ọmaana oyok kw'ọbaan-ọbaana, kw'im'ọnana k'ẹvaarkkọhbhọ ch'otte kw'orukọ ábẹ̀. Ṉ́kk'asa minna, màsi erima ch'atte kw'abọnga k'ọsọhm."

4 Okenaka, wa ojora okwu odim bẹ, maben bẹ́, "Ó̱de avaarnọng afa nna kẹ ábẹ̀ akpo, mina bọ mm'okpo o?"

5 Ofona nya o, okker-idik-s'odimpa, ọmaana ọbaabh-ebhondim, ọmaana asogbọhkọnọng, ọttara abaabh-isọhmmọr, matọhm ẹkkaabha nda anang Jehu bẹ́, "Mina mode atọhmnọng pọ e. Mm'osi ọttọhk kpenamkpen f'abenẹ. Mina m'ọnọng kpenamkpen ẹvaar mosi. Kọ zeng mmo si ọttọhk kpenamkpen f'achibhẹ bẹ́, ode ọkkọkka."

6 Minna kw'Jehu ọkkẹrẹ ẹkkaabha ttonga mfa, ọnang bẹ, oben bẹ́, "Ó̱de bọnga mabe k'kaam, mabira achera bẹ́, mm'akpobha-m, màpe ajinọngva p'arukọ atte kwabọnga ábẹ̀, nso, màtọka jẹ, achen-m ophyinẹ ogbese nwa, z'Jẹzrẹl."

M'ogbe nwa, wa ajinọngva p'ọvaarnọng obhonọ anọng nso arọbh attaan okwuma ijobh, maning amaana ajinọng p'abarẹ odik ny'ebhondim ndo, p'uwa ad-akkerẹ bẹ. 7 K'ogbe kw'ẹkkaabha ndo epyirẹ bẹ, ajinọng mbo p'abarẹ odik, matọka iva mbo anọng arọbh attaan okwuma ijobh p'ọvaarnọng obhonọ, mape bẹ nso maphyir. Matọka nso njo ake k'ọkariba, matọhm anang Jehu z'Jẹzrẹl. 8 K'ogbe kw'ozeng-eden nwo opyirẹ nya, otek Jehu bẹ́, "Nkk'nso s'ajinọngva mbo p'ọvaarnọng obhonọ atima akwa e."

Jehu oke ẹfa bẹ́, "Màsok jẹ k'akkin afa z'eden ch'mad-azenga adim z'ebhumma ch'ebhondim maa, opyirẹ ophyinẹ k'ekpebha."

9 Ewu esobh nya o, Jehu oyin k'iyaan. Okwu obe anọng mbo maphyir ny'ititika, oben bẹ bẹ́, "Mbọhk sabọnga m'odik nwa kide. Kaam oyenẹ wọ nchi atte kwaam kw'nrukọ ábẹ̀, ikwu, mfhẹ-ẹ. Okenaka, anyi wọ nnọfhọ anọng mba maphyir? 10 Màzonga nya bẹ́, odik kode kw'Ọvaar Ibinọkpaabyi ikk'ọgbaaka ọmaana ọsọhm kw'Ahab kw'im'otun-otuna. Ọvaar Ibinọkpaabyi kk'ọttọhk ọsa f'uwa otim Elijah kw'ode ọtọhmnọng kwẹ, ọgbaak." 11 Minna kw'Jehu ozeng ọfhọ ọnọng kpenamkpen kw'orikẹ ny'ọsọhm kw'Ahab ny'Jẹzrẹl. Obir ọfhọ ajinọng p'Ahab p'abarẹ odik, ọmaana ayok-echekẹ pẹ, ọmaana afọhn-nja pẹ. Ọnọng mawanẹ kode kw'uwa otte ọbọhk bẹ́, oninga akpen ny'ọsọhm kw'Ahab.

12 Minna kw'Jehu obin ochina z'ẹkọma ch'Samariya, z'ẹbhaakẹ ch'Bẹt-Eked, kw'ode ibyi s'akker-arọkimaan. 13 Okebha ivọkka banẹ p'ọvaar Ahaziya kw'Juda nya. Ọbọbh bẹ bẹ́, "Bọnga made bọnga anọng o?"

Mapọhn-ẹ bẹ́, "Mina mode anọng p'Ahaziya, p'makwu azima isọhmmọr s'ọvaarnọng, ọttara s'ọvaarkwanọng."

14 Jehu oke ẹfa bẹ́, "Màbọka bẹ k'mbọhk!" Minna kw'mabọk bẹ anọng nso arọbh afa okwuma afa k'mbọhk, mad-abhirẹ bẹ ndọngọ z'esipe ch'Bẹt-Eked. Ọnọng mawanẹ kw'osokọ akpen, kode.

15 Obin nya, okebha Jehonadab kw'ode nnwa kw'Rekab z'eden ch'oben bẹ́, okwu ọzẹ-ẹ. Jehu ozim-ẹ, oben bẹ́, "Ma, kọ abe k'kaam o, k'ose kw'kaam mbe k'kọ o?"

Jehonadab ọpọhna bẹ́, "Iye."

Jehu oben bẹ́, "Ó̱de ode minna, nang-m ọbọhk kwọ." Jehonadab osi minna. Jehu ọkkaan-ẹ, oyik-ẹ z'ọkpaar kw'ẹnyanya ẹd-ẹtọr. 16 Jehu oben-ẹ bẹ́, "Yak-m nnam, akwu aze ose kw'ncher obo k'Ọvaar Ibinọkpaabyi." Minna kw'matọnọ, mayika ny'ọkpaar kwẹ kw'ẹnyanya ẹd-ẹtọr.

17 Jehu opyirẹ z'Samariya o, ochera anọng maphyir p'arikẹ z'ẹsọhmmọr ch'Ahab, ọfhọ. Odimẹ bẹ eche, otor k'ọgbaakadik kw'Ọvaar Ibinọkpaabyi otim Elijah, ọgbaak.

18 Minna kw'Jehu oyerẹ anọng mbo maphyir k'ibyi majanẹ, oben bẹ bẹ́, "Wa Ahab okpobh Baal bẹ́ kẹrẹm, kaam Jehu m'mkpobh-ẹ mawuriji. 19 Màyerẹ agbaak-ettem ch'Baal maphyir, mattonga, ọmaana atọhmnọng pẹ maphyir, ọttara afọhn-ẹja pẹ maphyir. Tte ọnọng mawan-wanẹ oning oworọ ny'ikpakaana njo o, okurọ bẹ́, kaam m'nkwu mfọhnọ ẹja chiden nnang Baal. Ọnọng kpenamkpen kw'obhumọ eyerẹ ndo, ọdọk akpen mòruk." Okenaka, wa Jehu ọd-ọbọhra bẹ ọbọhra, ọfha otima eden ndo, ọfhọ atọhmnọng p'Baal.

20 Jehu oben bẹ́, "Màyerẹ ikpakaana ittonga okurọ Baal." Minna kw'mayerẹ ikpakaana njo. 21 Jehu ọtọhm ẹkkaabha ọkọma Israẹl. Atọhmnọng p'Baal maphyir, makwu. Ọtọhmnọng mawanẹ kode kw'ina nya, okwu. Masaabh maa, ọsọhm kw'Baal ofu, tọma k'eso danẹ, pyirẹ z'eso ndoza. 22 Nya o, Jehu oben ọnọng kw'od-oye nnya bẹ́, "Tọka anọhma-baba chena atọhmnọng maphyir p'Baal." Minna kw'ọtọk anọhma-baba mbo ochena bẹ.

23 Minna kw'Jehu ọttara Jehonadab kw'ode nnwa kw'Rekab mabin adim ny'ọsọhm nwo kw'Baal. Jehu oben atọhmnọng p'Baal bẹ́, "Bọnga maphyir màkkerẹ mawuriji, màze bẹ́, ọtọhmnọng mawanẹ kw'Ọvaar Ibinọkpaabyi, ma kode, kirẹ etobha nda ede ch'atọhmnọng p'Baal dẹ-dẹ." 24 Minna kw'madimẹ z'ẹtaanga, bẹ́, mad-afọhnọ nja, mabir anang nnanga s'ẹkwọmọ. Ode ch'Jehu kk'anọng arọbh anna osoka z'iyaan. Ọtọr anọng mbo itọhng bẹ́, "Ó̱de ọ́nọng wanẹ m'abọnga k'ẹkaan, okenka otte ọnọng mawanẹ m'anọng mba p'nke bọnga k'mbọhk, ọnaang-ẹ ọrọbh, kẹ m'otima akpen pẹ, otera eso ch'ọnọng kw'ọnaang-ẹ, ọrọbh."

25 Jehu ochichera ẹja ch'nnanga s'ẹkwọmọ nya, oben anọng mbo p'akkerẹ ibyi, ọmaana asonọng pẹ bẹ́, "Màdim z'ẹtaanga, màfhọ bẹ za. Tte ọnọng mawan-wanẹ, oning bọnga ọnang o." Minna kw'matim akkangkkang afhọ bẹ. Akker-byi mbo, ọttara asonọng p'Jehu, matọr aforbukọ mbo abharẹ k'iyaan, pira nnadimẹ z'ọsọhm kw'Baal ẹtaanga. 26 Matinẹ ọta nwo kw'ọbar-odik ny'ọsọhm ẹtaanga kw'Baal, matima ayin k'iyaan, makwọmọ wẹ. 27 Mavọhkọ ẹta ndo ch'Baal ch'ẹbar-odik, mabira achikẹ ọsọhm kwẹ. Anọng natim ibyi njo asi ọgbana maa, pyirẹ menda.

28 Minna kw'uwa Jehu ọkpọk ekpobha ch'Baal ny'Israẹl. 29 Okenaka, wa kẹ ochin ororo k'mpyibha njo s'Jẹroboam kw'ode nnwa kw'Nẹbat ikk'ọwọhka anọng p'Israẹl asi. Wa mpyibha njo ide ekpobha ch'mad-akpobha akpata p'abhaamva p'matim gol asi, masok z'Bẹtẹl, ọmaana z'Dan.

30 Ọvaar Ibinọkpaabyi oben Jehu bẹ́, "Ch'ikk'ọttọhk f'otor-otor asa mawuriji k'kaam k'ititika, abir asi okpenamkpen f'ntọhm-ọ ny'ẹsọhmmọr ch'Ahab k'ose kw'nchibhẹ k'ettem chaam, iva p'iva pọ, m'atima ẹvaar ch'Israẹl maa, opyirẹ ipemaanitor nna." 31 Chibhẹ nya, wa Jehu ifor kodo bẹ́, okpobha apaanga p'Ọvaar Ibinọkpaabyi, kw'ode Ibinọkpaabyi kw'Israẹl. Wa kẹ ochin ororo k'mpyibha s'Jẹroboam, s'iwa ikk'ọwọhka anọng p'Israẹl, asi.

32 Ny'ogbe nwo, Ọvaar Ibinọkpaabyi ọtọma ọsaabh f'Israẹl oyiyekẹ. Hazayẹl okema nkọma s'anọng p'Israẹl maphyir s'ining 33 z'okwubha kw'ewuchen ed-eyin, z'ẹbhaakẹ ch'Jọrdan maphyir, ọmaana z'ẹkọma ch'Gilead (kw'ode ẹkọma ch'Gad, ọmaana ch'Reubẹn, ọttara ch'Manasẹ). Bir tọma z'Aroer kw'ọnyọm iwọn-isaka s'Amọn maa, pyirẹ z'Gilead, ọttara z'Bashan.

34 Ṉ́nòde idik njoza s'iyinẹ k'ogbe kw'Jehu ọbaabh, ọmaana idik s'osi maphyir, ọttara ekpo py'oyen maphyir, makkẹrẹ z'anwẹr p'avaar p'Israẹl.

35 Wa Jehu o, okwu ope, otor ab'ttatta pẹ. Manọhng-ẹ z'Samariya. Jehoahaz kw'ode nnwa kwẹ, okwu ọtọka ẹvaarninga chẹ. 36 Wa Jehu oning z'Samariya ọbaabha Israẹl k'icho ẹrọbh okwuma ochenọnttaan.