1 Den Pol, nahal non Tigsas Kraēs. Ige et et vētleg te no. Et net ēwē te a mēvētleg no, ba Ḡod Imam mey a mak ēh lok Tigsas Kraēs en, kōyō mēvētleg no. 2 Wa tō den ige yathēthēngēn a tog tiwag tō mi no agōh.

Hiy kimi lēm̄ yon̄ del Taḡalasia.

3 Nasgōp wa natm̄at non Imam Ḡod tiwag mi Welan nongēn Tigsas Kraēs, notogtog tiwag mi kimi. 4 Tigsas ikē a mukēg nēh nonon so nilep yak nēvēvēg begengenyeg nongēn, tō nivaēh gēn den namyam het gōh, tatag van lemyōs non Ḡod Imam nongēn. 5 !Mogmogo wa ōliwo lap kē vaga! Qeleanen.

6 !No mamamakē nowmat veg a kimi metgotgo so tig kēlē Ḡod en, kē mōlōl kimi mi nasgōp non Kraēs! !Ba kimi mal at nangomi van loyoy ēwē tegha! 7 Ba tateh yoy ēwē mey netegha se. Ba ige et vivitwag mak tēqtēqyeg kimi, kēy nemyōs so leh hethet noyoy ēwē non Kraēs. 8 !Yēhē! !Kemem si so nin̄sel vitwag den alge wo motoytoy noyoy ēwē vitwag mey a netegha den mey a kemem mal vasemlō vatag van hiy kimi en, kē tavan lep! 9 Qeleso kemem mohohole tō am̄ag, tō nok hole lokse. So net vitwag wo nitoytoy noyoy ēwē vitwag hiy kimi mey a netegha den noyoy ēwē a kimi melep vatag en, kē tavan lep.

10 ?Wō kimi dēm van so nok so ak malaklak hē, ige sil siso Ḡod? No nemyōs so Ḡod nimlaklak. ?Kimi dēm van so nok soksok ige sil so mōyōs no? Tateh. Sowo nok wo mugumgu so ak malaklak ēwē net en, namanig nan no et yowyowveg non Kraēs te.

11 Yēhē yathithik wa yatētētek, itōk so nok vap m̄ōleg van hiy kimi. Noyoy ēwē a nok vavasemlō tō van hiy kimi en, net et qētēg te tō. 12 Wa tō nok et lep te noyoy ēwē gōh den net tegha, wa tō net et vatne te no aē. Ba Tigsas Kraēs mahgen a mavasemlō me hiy no noyoy ēwē agōh.

13 Namtevuk me am̄ag en nehet, qele kimi mal yon̄teg vatag nakaka nan. Lamahē nen, nok tatag nēvēnan ige Juw so mogmogo Ḡod. Vaga en nok damdamti ige et tēlēm̄ yon̄ non Ḡod so wuh kēy, a tateh magaysēn geh mi no. Vaga nok ak etgal so bun veteg nēm̄ yon̄ nan. 14 No mam̄agoy nōlōwlō Tujuw nehep den ige a kemem mowotwot tiwag tō, veg navaksek aē bitigtig maymay lēvēnamem.

15 Ba Ḡod mal vonyak vatag no, mahē a no lapgetō van lelo taqan tita mino. Tō kē mōlōl no heylō van lesgōp nonon. 16 Wa tō kē maklō Ēntēn me hiy no, so nok vasemlō noyoy ēwē veg kē van hiy ige lolqōn̄. Ba nok et yōstiwag hōn te tiwag mi net aē, 17 wa nok et van te Jerusalem so et ige a kēy nahal am̄ag den no, tateh. Ba no mavan ēgē n̄a Arabia, tō me atgiy en, nok van lokse me Damaskus.*1:17 Arabia en vētmahē liwo mey a qiyig gōh ige ōl so Sinai Peninsula. Damaskus en, napnō liwo non ige lolqōn̄. 18 Tō lēkle ētē vētēl en, no mavan hay Jerusalem so et Pita*1:18 Pol niōlōl nahan Pita so ‘Sephas.’. Tō no motog nōqōn̄ son̄wul nanm̄e tēvēlēm tiwag mi Pita.✝1:18 Acts 9:26-30 19 Ba no et etsas te ige hal yatkelgi. No met ēwē Jemes a ēthēn Welan Tigsas. 20 !Lengon Ḡod, vel hohole mino hēyhēywē, ba et galgal te! 21 Lēkle qōn̄ nen, no mavan n̄a Siria wa Silisia.*1:21 Siria wa Silisia, vētmahē vōyō non ige lolqōn̄. 22 Lamahē nen, ige sil tēlēm̄ yon̄ non Kraēs n̄a Judea, kēy et ēglal qete no. 23 Kēy moyon̄teg ēwē noyoy veg no, tō kēy vasem so, "Net gōh, kē mak tōqtōqyeg tō gēn so niak sisgoy nēdēmtig nongēn. Ba togtōkē kē nitoytoy bēdēmtig nan ēgēn." 24 Tō kēy melep kal nahan Ḡod veg no.