Gálatas 6

Vel et so niywu nahaphap dēw namun

1 Yathithik wa yatētētek, so vitwag den kimi wo misisgoy, tō kimi mey a Nuvu non Ḡod aē mi kimi en, atmi biyin̄ kē, tō so lom tenenen kē, a lemtehal mey a nemlumlum. Ba atmi etgoy galgalsi kimi, kimi tiple sisgoy. 2 Kimi so vēy biyin̄ kimi so yuwu bevel haphap het a wo maqal kimi. Lēdēmdēm qelegōh en, tō kimi tak tatag qēt nele non Kraēs.

3 So net vitwag wo mēdēmdēm so, "Ino itōk veteg net tegha," ba kē net yeghuquy ēwē, kē nigalgal lok kē mahgen. 4 Velvel et so niēglal galgalsi namtevōn mahgen so qeleave. Tō kē tēsēsē vēh kē aē, ba nitog dēmdēm van bemtevōn net tegha. 5 Veg vel et vivitwag so niywu nahaphap dēw namuy.

Gēn nitog n̄ayn̄ay den nahaphap mey nēwē

6 Ige a notog leptō leln̄e vatvatne lohohole non Ḡod en, itōk so kēy gasēg nahaphap del mey nēwē tiwag mi ige vatvatgo nonoy.

7 Atmi nitog qaqa en. Tateh et tagal vēh Ḡod, tō nahap te mey a net nivah en, nahap nan kē telep lok. 8 Veg net wo mavah nahapte a nataqn̄ige*6:8 Navap nataqn̄ige, lohohole non Pol nēdēmdēm nan so nahaphap mey nehet a nēdēmdēm nongēn nemyōs en, mey a kē natvale goy vel haphap a Nuvu Yon̄ nemyōs. nemyōs en, kē telep lok namatmat aē den nataqn̄ige. Ba net wo mavah nahapte a Nuvu nemyōs en, kē telep lok nēh lap aē den Nuvu. 9 Tō gēn nitog n̄ayn̄ay den nahaphap mey nēwē a gēn akak en. Veg gēn telep nayseyse aē litiy qōn̄ nan sowo gēn nitog m̄egeygey. 10 Bastō, nitiy wē yeh so gēn ak nahaphap mey nēwē so biyin̄ ige del aē, so gēn wo tak vēh. Yakhag yeh veg yathēthēngēn wa yatētētangēn a kēy nēdēmtig Kraēs.

Babah ne hohole so hole matyak kēy

11 Atmi et neletes lililwo mino, no mayap mahgēk van nohohole gōh.

12 Yatkel vatvatgo nemyōs so qeqet kimi van so tep vēglal kimi. Ba kēy nemyōs ēwē so ige Tisrael so vesveshiy kēy bataqn̄imi. Kēy akak qelenen veg kēy mētēgteg so ige Juw so ak tōqtōqyeg kēy mahē a kēy toytoy gatay namatmat non Kraēs apwo wolwol.

13 Ige a mal hel kēy nen, kēy et tatag te Nele. Ba kēy nemyōs so qēyēt kimi van so hel kimi, tō kēy tohole sotel kēy veg nataqn̄imi. 14 Ba veg no en, no tohole sotel vēh no veg bege vitwag ēwē, veg a bamatmat nonon Tigsas Kraēs, Welan nongēn, a kē mamat lowolwol. Heylō nowolwol non Kraēs en, nok at yak den namyam, tō namyam niat yak den no.

15 Veg et tiy ikē yeh te sowo mal hel vēglal net siso et hel vēglal te kē. Nitiy ikē yeh en, so Ḡod mak gayaq kē. 16 Nok tatay so natm̄at wa namgaysēn non Ḡod nitog tiwag mi ige del a kēy tatag namtehal nen, tiwag mi ige Tisrael non Ḡod.

17 Nitog so net niak tēktēk lokse no. Veg namtewot vatag aē lataybēk a nivasemlō so ino net non Tigsas.*6:17 Pol nihole gatay namtewot a kēy muwuh tō kē am̄ag veg kē motoytoy veg Kraēs.

18 Yēhē yathithik wa yatētētek, nasgōp non Welan nongēn Tigsas Kraēs notog tiwag mi kimi del. Qeleanen.