1 Yesu kakibhelekwa kumbwani ya Betelehemu, mu nkoa ghwa Yudea, manjubha agho Helode kakibhegha mutwa. Kamu, mbole ya kubhelekwa Yesu, bhanautendehi bha kumanya ndondwa kuhuma mbande ya ngeha bhakehika ku Yelusalemu 2 bhakikonya, "Kabhengha kwoki aywo mwana ywakabhelekitwe, ywakapala kubhegha Mutwa ywa Akaayahudi? Tuyibhona ndondwa yake payibwitukila kungeha, na twenga tuhika kumtundamila."

3 Mutwa Helode pakayihwite nnando aghu kakibhaghaya, ywombe papamo na bhandu boha bhubho bha ku Yelusalemu. 4 Basi kakiakema papamu mandundame akulu bhoha na ahunda bha Malaghilo gha Musa, kakiakonya "Kilisito katabhelekwa kwoki?"

5 Bhombe bhakinng'ombela, "Katabhelekwa kumbwani ya Betelehemu kunkoa ghwa Yudea," Handa pakalembite mbuye ywa Chapanga.

6 "Naghwenga Betelehemu munnima ghwa Yudea,

Ghwenga ghunndoko ng'obhe nkati ya hitami ihwadali hya ku Yudea;

Mana, kwa ghwenga katabwituka kilongohi

ywakapala kualongoha bhandu bhangu Akaaisilaeli."

7 Apo ndo Helode kakiakema pambwegha abho atendehi bha kumanya ndondwa, kakiakonya bhammanyihe nndaluko ghwa tela ghuubhonekanite yila ndondwa. 8 Mbole kakibhalaghila aghende Betelehemu pakiaghombela. "Nng'ende mukahingukihe maha mihalo ya mwana aywo. Mbole ya kummona mumuyihile mihalo yake, ngati na nenga ng'ende kuntundamila."

9 Mbole ya kunnyihwa Mutwa, abho atendehi bha kumanya ndondwa bhakibhuka, na kamu yila ndondwa bhaayibhonite mbande ya ngeha yikialongoha, nabhombe bhakiyitughila mbaka payiyimite pakabheghite mwana. 10 Paayibhonite yila ndondwa yiyima bhakiyelelwa na kulumbilila kwa uyelelo. 11 Paayingilite unyumba bhakimmona mwana papamu na Malia mama ghwake, bhakichutama na bhakintundamila. Ndo bhakihughula lijamanda na bhakitola hupo hyabhe, bhakinpegha mahabha na ubanu na ntela ghwa bhana.

12 Mbole Chapanga kakiakinya mululoto bhakotoke kummuyila Helode, ndo bhakibhuya ukaya kwabhe kwa njila yingi.

13 Mbole ya bhala ahenja kubhuka, lihoka lya Bambo likinbwitukila Yosefu mumaloto, na kunng'ombela, "Ghuyumuke na ghuntole mwana papamu na mama ghwake na mmutukile ku Misili. Ntame akwo mbaka panukughombela, kiyaha Helode kangupala kunkoma mwana ayu."

14 Habhu, Yosefu kakibhuka pakilo kakintola mwana papamu na mama ghwake, na bhakighenda ku Misili. 15 Bhakitama akwo mbaka pakahweghite Helode. Nnando aghu ghukibwituka ili litulukila lilagho lyakalongilite Bambo kwa ngulu ya mbuye, pakalongela, "Nikinkema mwana ghwangu nenga Chapanga kuhuma Kumisili."

16 Helode pakang'amulite kukita bhala atendehi bha kumanya ndondwa bhantindila kya luhunga, kakikalala muno. Kakikwilikiha bhana alumi bhoha mu kitami kya Betelehemu na mumbwegha mbwegha yake akomwe, kutandila bhala bhana bhoha bhaabheghite na ngungwa mbili mbaka hing'enya. Kakitenda habhu kubhukana na manjubha kupita kutandila pakakonganite na bhala atendehi bha kumanya ndondwa.

17 Ndo paghatulukilite malagho ghala ghaakambukitwe na mbuye Yelemia

18 "Lilobhe liyihwanika akwo Lama,

Kililo na makukuliko matangalo.

Laheli kangualilila bhana bhake;

na kalema kuyonjokehwa mwoyo,

kiyaha bhoha bhahwegha."

19 Mbole ya kuhwegha Helode, lihoka lya Bambo likinbwitukila Yosefu mumaloto akwo Misili, 20 kakinng'ombela, "Ghuyumuke, ghuntole mwana papamu na mama ywake, ghubhuye kangi kunnima ghwa Isilaeli, kiyaha bhala bhaapalite kughubhuha ubhumi ghwa mwana ahwegha kala." 21 Basi, Yosefu kakiyimuka, kakintola mwana papamu na mama ywake, bhakibhuya mu nnima ghwa Isilaeli.

22 Peni Yosefu kakiyoghopa kughenda akwo Kuyudea pakayihwite kukita Alikelao kaghuhala utabhala ghwa tate ghwake Helode. Mbole ya kukinywa na lihoka lya Chapanga mumaloto, bhakighenda mbande ya Galilaya, 23 na kakighenda kutama kukitami kiikemitwe Nasaleti. Habhu ndo ghakitulukila malagho ghaakambukitwe na mambuye, "Katakemwa mundu ywa Kunasaleti."