1 Mbole Yesu kakilongohwa na Nhuki ghwa Chapanga mbaka kukibhala ngati kakang'ehwe na Nchipila. 2 Kakilikunga manjubha alobaini pamuhi na pakilo, kuuhiko yikimmina muno njala. 3 Mbole, Nchipila kakinhikila na kunng'ombela, "Handa ghwenga ndo Mwana ghwa Chapanga, ghughakwilikihe malibho agha ghabheghe mangate."

4 Peni Yesu kakinnyanga, "Yityekwa mu Matyeko gha Chapanga, ‘Mundu katatama ng'obhe kwa kulyegha lingate ghweka, ngati kwa kila lilagho liikambukwa kwa nngulo ya Chapanga.’ "

5 Mbole Nchipila kakintola Yesu mbaka Kuyelusalemu, Kitami kiibhaghulitwe kwakya Chapanga, na kakimmika kunani kunnala ghwa Kitutubhi kya Chapanga, 6 na kakinng'ombela, "Handa ghwenga Mwana ghwa Chapanga, ghuliponehe pahi, kiyaha yityekwa mumatyeko,

‘Chapanga kataakwilikiha Mahoka bhake,

na bhombe bhaakukingama mu mabhoko ghabhe,

ghukotoke kuponekela mu liganga.’ "

7 Yesu kakinnyanga, "Matyeko mang'anyimo ghangulongela, ‘Ghukotoke kunng'eha Bambo Chapanga ghwako.’ "

8 Mbole Nchipila kakintola Yesu mbaka kukinemba kya kitumbi kitandamaho na kakinnaha ghubhutwa ghwoha ghwa nnima na ukulu ghwake. 9 Kakinng'ombela Yesu, "Ahi hyoha ndaghupegha handa ghwanjutamila mayughwa na kundundamila."

10 Peni Yesu kakinnyanga, "Ghubhuke muulongolo ghwangu, ghwenga Nchipila. Kiyaha Matyeko ghangulongela, ‘Ghuntundamile Bambo Chapanga ghwako, na ghuntumikile ywombe ghweka.’ " 11 Basi, Nchipila kakinleka, nabho mahoka bha Chapanga bhakihika kuntumikila.

12 Yesu pakayihwite kukita Yohane Yunakubatisa kahwindwa ku kibhopo, ywombe kakighenda akwo ku Galilaya. 13 Kakibhuka Nasaleti, kakighenda kutama ku Kapelinaumu kitami kiibheghiti mbwegha ya lihibha lya Galilaya, mu mbakilo ya kitami kya Sabuloni na Nafutali. 14 Ghakitulukila habhu ili lilagho lyakalongelite mbuye Isaya litwihilike kukita,

15 "Milima ya Sabuloni na ghwa Nafutali,

milima yiibheghite mumbwegha ya njila yiighenda kulihibha kumwambo ya lukemba Yoludani,

Galilaya, nnima ya bhandu bhangabhegha Ayahudi.

16 Bhandu bhala bhaatamite mulubhindu

Bhalubhona lubhwelu lukulu.

Nabho bhaatamiteghe mu nnima ghwa lubhindu na bhwaghalili ghwa kuhwegha

lubhwelo lubhang'aliha."

17 Kutandila apo, Yesu kakiyanda kulandamiha pakalongela, "Mulipetule, kiyaha Ghubhutwa ghwa Chapanga ghuheghelela."

18 Yesu pakabheghite mukutyanga mumbwegha ya lihibha lya Galilaya, kakiabhona alongo abhili aghomeha homba, Simoni ywakakemwa Petili na Andelea ywakabheghite nnongo ghwake, paaghomeha homba kwa njaho. 19 Ndo Yesu kakiaghombela, "Mundughile, na nenga ndabhatenda munyeghele bhandu handa aghomeha pabhayegha homba mulubhagha lwabhe." 20 Kamu bhakihileka njaho hyabhe na bhakintughila.

21 Pabhaghendite paulogolo kya mandina, kakiabhona alongo bhangi abhili, Yakobu na Yohane, bhana bha Sebedayo. Abha bhakibhegha mubhwato papamo na tati ghwabhe Sebedayo, paatandambuha njaho hyabhe. Ndo Yesu kakiakema, 22 kamu bhakighuleka bhwato papamu na tate ghwabhe, bhakintughila Yesu.

23 Yesu kakighenda muhitami hyoha hya Kugalilaya, kakihunda muhitutubhi hya kukonganila Akaayahudi na kulandamiha Nhalo ghwa Maha ya kya ghubhutwa ghwa Chapanga, kakilamiha mihehemela nhanganganiko na matamwa ghaabheghite nagho bhandu. 24 Mihalo yake yikikwila mbande hyoha hya ku Silia, na atamwa bhoha bhaabheghite na matamwa nhanganganiko, na bhala bhaabheghite na himbamanda nhanganganiko, bhaakwelitwe na mandilu, bhaabheghite na kihilika na alelebhaho, bhakigheghwa kwa Yesu, naywo kakialamiha bhoha. 25 Himati hitangalo hya bhandu bhakintughila, kuhuma ku Galilaya na Dekapoli na Yelusalemu na Yudea na kumwambo ya lukemba Yoludani.