1 Yesu pakahibhonite himati hya bhandu, kakikwela kukitumbi na kakitama, na ahundwa bhake bhaking'endela, 2 na ywombe kakiyanda kuahunda.

3 "Bhanonelwa bhoha bhaamanya kukita bhangumpala muno Chapanga mumihuki yabhe,

kiyaha Ghubhutwa ghwa kunani kwa Chapanga ndo ghwabhe.

4 Bhanonelwa bhaakukulika,

kiyaha bhaayonjokehwa mwoyo.

5 Bhanonelwa bhaabheghite apole

kiyaha bhaapeghwa nnima ghwakaalaghite Chapanga.

6 Bhanonelwa bhaabhegha na njala na kilyakalyaka kya kughayitikila malaghilo gha Chapanga

kiyaha bhombe bhaayukutihwa.

7 Bhanonelwa bhaabheghite na lipyanda

kiyaha bhaamokola lipyanda.

8 Bhanonelwa bhaabhegha na myoyo ya nyanyi,

kiyaha bhombe bhatammona Chapanga.

9 Bhanonelwa bhala bhaalinganiha malobhe bhandu,

mana bhaakemwa bhana bha Chapanga.

10 Bhanonelwa bhaapungwa kwa kughayitikila malaghilo gha chapanga,

kiyaha Ghubhutwa ghwa Kunani kwa Chapanga ndo ghwabhe."

11 Yesu kakighendelela kulongela, "Maanonelwa mwenga pala bhandu paabhakokela na kuakambukila uhakata ghwohele kwakya nenga. 12 Nnyelelwe kwa hilulu, kiyaha lilumbo lyenu ndo likulu kunani kwa Chapanga. Mana ndo ubhwabhu abhu ndo bhakiapamanda ambuye bha Chapanga bhaabheghite pakali ya mwenga."

13 "Mwenga ndo handa mwinyu ghwa nnima. Peni handa mwinyu ghwahobheha unogho ghwake ghwahotola bhuli kubhuyila kangi unogho ghwake? Ghungunogha kangi ng'obhe kwa kyohele, ngati ghwaataghwa panje ghulibhatwe na bhandu."

14 "Mwenga ndo lubhwelu lwa nnima. Kitami kiichengwite mu kitumbi kinguhotola ng'obhe kuhihika. 15 Ebu bhandu bhanguyakiha ng'obhe limbamba na kuligubika na kipumbulu ebu nkambo, ngati bhangulubhika pakinyuta, ngati lubhang'alihe bhandu bhoha bhaabheghite unyumba. 16 Ubhwabhu abhu lubhwelu lwenu lung'alihe mu ulongolo ghwa bhandu, ngati amokole kughabhona mandendelo ghenu gha maha na bhantike Tate ghwenu ywakabheghite kunani."

17 "Nkotoke kuhwacha kukita hika kughabhuha malaghilo gha Musa na mahundo gha ambuye, hika ng'obhe kughabhuha ngati kughatengeleha. 18 Kulyaghila nunguaghombela, mbaka nnima na kunani payipala kupita, peni kahone hata kipalamande kichoko kya malaghilo gha Musa kiipala kubhuhwa, mbaka ghoha ghatwihilike. 19 Basi, ywohele ywakakiluka yimu mu ngwiliho njoko kupitingana kwa hyoha, na kuahunda bhandu bhakatende habhu, kaabhegha nndokwa mu Ghubhutwa ghwa kunani kwa Chapanga, peni mundu ywakaghatenda malaghilo na kuahunda ayake, aywo kaabhegha nkulu mu Ghubhutwa ghwa kunani kwa Chapanga. 20 Ndo mana nunguaghombela yinguakwiliha mughayitikile Malaghilo gha Chapanga kwa kuchweha gumaha muno kupitingana ghula ghwa ahunda bha Malaghilo na Akaafalisayo. Hela bhubho maayingila ng'obhe mu Ghubhutwa ghwa kunani kwa Chapanga."

21 Yesu kakighendelela kulongela, "Nnyihwa kukita bhandu bha makachu paaghombelwa, ‘Ghukotoke kukoma mundu, na mundu ywohele ywakakoma mundu katanoghwa katoswe.’ 22 Peni nenga ninguaghombela kukita, mundu ywohele ywakannyaghabhalila nnongo ghwake, katanoghwa katoswe. Ywakannyuyuha nnongo ghwake katayeghwa ku libalasa. Na ywohela ywakanng'ombela nnongo ghwake ‘Ghwenga mmughabhugha ghukotolwe.’ Katanoghwa toso ya kutaghwa mu mwoto ghwa kumambe. 23 Basi, paghuyegha hupo hyako kulikuta na kunu paghukulungwa kukita nnongo ghwako kabhegha na nnando na ghwenga, 24 ghuleke hupo hyako apo paulongolo ghwa likuta, ghughende huti ghukalingane malobhe na nnongo ghwako, mbole ghubhuye na ghutule matulo ghako."

25 Kangi kakilongela, "Ghulingane malobhe nkokela ghwako kya kuyumbatika paghubhegha naywo munjila kughenda kulibalasa, ngati nkokela ghwako kakotoke kukukamuha mumabhoko gha nndumula nongwa, naywo nndumula nongwa katakukamuha mumabhoko gha anjolinjoli, na ghwenga ghwaabhopwa mukibhopo. 26 Kulyaghila nungukughombela, ghwaabhuka kata amwo, mbaka paghukamuha ligwala lya uhiko."

27 Yesu kakighendelela kulongela, "Nnyihwa kukita bhandu bhakighombelwa, ‘Nkotoke kubhegha atyahe.’ 28 Peni nenga nunguaghombela kukita, mundu ywohele ywakannolekeha nndala kwa uhongo ghwa kutyaha naywo, aywo katyaha kala mumwoyo ghwake. 29 Liho lyako lya kibhoko kya nnilo palighutenda ghutende ulemwa, mbaha ghulikolopole, kuliko mmili ghwoha kutaghwa mumwoto ghwa kumambe. 30 Handa kibhoko kyako kya nnilo pakighutenda ghutende ulemwa, mbaha ghukidumule, kuliko mmili ghwako ghwoha kutaghwa mu mwoto ghwa kumambe."

31 "Bhubho yikikambukwa kukita, ‘Mundu ywohele ywakanneka nhumbu ghwake yingukwiliha kanpeghe lihamba lya kulekana.’ 32 Peni nenga nunguaghombela, mundu kangunoghwa ng'obhe kunneka nhumbu ywake kwa uhokelo ghwohele, pangi kwa kutenda utyahe, na mundu ywakanneka nhumbu ghwake kwa uhokelo ghwohele ghula, kanguntenda kabheghe ntyahe. Na yula ywakantolela nndala ywakalekitwe, kangutenda utyahe."

33 "Kangi nnyihwa kukita bhandu bha makachu bhakighombelwa, ‘Ghukotoke kulaghila kulapa kwa uhwangi, ngati ghutwihilihe kilagho kyako kwa kighunnapilite Bambo.’ 34 Peni nenga nunguaghombela, kabhone kulapa, hangi kwa kunani kwa Chapanga, kiyaha ndo kiteho kya ghubhutwa ghwa Chapanga, 35 hangi nkotoke kuulapila nnima, kiyaha nnima ndo pahala pamwene pakuyeghemela maghulu ghake, ebu kwa lihina lya Yelusalemu, kiyaha ndo kitami kya Mutwa nkulu. 36 Nkotoke kulapa kwa mitwe yenu, kiyaha ghwahotola ng'obhe kutenda luhwili lumu lubheghe lwambulete ebu lupili. 37 Paghulongela ‘Ena’ Yibheghe ‘Ena’ Na paghulongela ‘Ng'obhe’ Yibheghe ‘Ng'obhe’ Kiyaha ghohele kuchweha kwa agha ghanguhuma kwa yula nhakata."

38 "Nnyihwa kukita yikikambukwa, ‘Mundu pakalikuchumbula liho lyako na ghwenga ghunkuchumbule, na mundu pakaghutupula lino lyako na ghwenga ghuntupule lino lyake.’ 39 Peni nenga nunguaghombela, nkotoke kummuyihila kibhuyiho kwa mundu nhakata. Mundu pakakubhakula kulikanja lyako lya nnilo, ghumghalambuhile na lingi. 40 Handa mundu ywakapala kukutosa ngati katole lighwanda lyako, ghumpeghe na likoti bhubho. 41 Mundu pakaghulemelela ghupape nhigho ghwake mwanja ghwa maili yimu, ghuupape maili mbili. 42 Ghunpeghe ywakakuyupa, hangi ghukotoke kumdumbila kihogho ywakapala kukuyahika kilibhi."

43 "Nnyihwa kukita yikikambukwa, ‘Ghunpale ghanja ywako na ghunkalale myanja ywako.’ 44 Peni nenga nunguaghombela, muapale amyanja bhenu na mubhayupile bhala bhaabhakalalila, 45 ngati mmokole kubhegha bhana bha Tate ywenu ywakabheghite kunani. Kiyaha ywombe kanguang'aliha luchubha lwake bhandu ahokela na bhandu bha maha, naywo kanguakomela hula bhandu bhanakutenda ghanakunnoghela Chapanga na bhangali kutenda ghangali kunnoghela Chapanga. 46 Pamuapala bhala bhanakuapala ghweka, maapata hupo yoki? Bhuli asumula sumu bhangutenda ng'obhe habhu? 47 Na handa munguatendela gha maha alongo bhenu ghweka, Bhuli mungutenda kyoki kupitingana kwa bhangi? Hata bhandu bhangali kummanya Chapanga bhangutenda ubhwabhu abhu. 48 Kya habhu mwenga mmeghe atwihiliko handa Tate ywenu ywa kunani pakabhegha ntwihiliko."