1 Mumanjubha ghala Yohane yunakubatisa kakihika pakalandamiha mu kibhala kya Yudea, na kulongela, 2 "Mulipetule ulemwa ghwenu, kiyaha ghubhutwa ghwa kunani kwa Chapanga ghuheghelela." 3 Ayu ndo Yohane ywene ndo mbuye Isaya kakilondola ya kya ywombe pakalongela,

"Lilobhe la mundu lingukema kukibhala,

‘Munntendekehele Bambo njila yake,

nng'ololehe ndyangilo yake.’"

4 Yohane kakihwala mapinda ghaatendekehitwe kwa mayuni gha nnyama ywaakemitwe ngamia, na nkungi ghwa liyula mu kibhuno kyake. Hilyo hyaki hikibhegha mapalala na bhuchi. 5 Bhandu bhakinng'endela kuhuma ku Yelusalemu, na mbande hyoha ya Yudea na mumilima ya mbwegha mbwegha ya lukemba lwa Yoludani.

6 Nabho bhakilipetula ulemwa ghwabhe, na kakiabatisa mulukemba lwa Yoludani.

7 Peni pakaabhonite Akaafalisayo na Akasadukayo bhangung'endela ngati abatiswe, kakiaghombela, "Mwenga bhandu ahakata handa liyoka. Ndo ghani ywakaakinyite kukihepetuka kiyaghabhu kiipala kuhika? 8 Basi, mulilahe kwa mandendelo kukita mulipetula, 9 na kangi nkotoke kuhwacha na kulongela, ‘Tati ywetu Ibulahimu.’ Ninguaghombela hoto, Chapanga kaahotola kutendekeha kibheleko kya Ibulahimu kuhuma mu malibho agha. 10 Hata naha, libhaghu libhikwa kala mu ngigha hya nkongo. Nkongo ghwohele ghwangali kupambika mapambiko gha maha, ghwaadumulwa na kutaghwa mu mwoto. 11 Nenga nunguabatisa kwa machi kubhoneha kukita mulipetula. Peni ywakapala kuhika mbole ya nenga kabhegha na makakala kupitingana nenga, na yingunnogha ng'obhe hata kuyegha makobasi ghake. Mwene kataabatisa kwa Nhuki ywa Chapanga na kwa mwoto. 12 Ywombe kakamula mumabhoko ghake kipalo kya kupetela mbunje hyake, na katakilima muno kibhanja kya kukubhatila, ngati kakungane ngano hyaki mu luhanja, na mayeyele kaghayoche kwa mwoto ghwangahimika."Mundu kangupeta

13 Mumanjubha agho Yesu kakihuma ku Galilaya na kakihika mu lukemba lwa Yoludani, ngati kabatiswe na Yohane. 14 Peni Yohane kakiyigha kunkanikiha pakanng'ombela, "Nenga ningupala kubatiswa na ghwenga, na ghwenga ghunguhika kubatiswa na nenga!"

15 Peni Yesu kakinnyanga, "Ghuleke yitulukile habhu kwa hinu. Mana habhu yingutunogha kughayitikila malaghilo gha Chapanga." Habhu Yohane kakinnyitikila.

16 Naywo Yesu pakabatisitwe kala, kamu pakahumite mu machi, pindulu kunane kwa Chapanga kukihughuka, kakimmona Nhuki ghwa Chapanga pakahuluka handa ngunda na kutula unani mwake. 17 Mbole lilobhe kuhuma kunane kwa Chapanga likilongela, "Ayu ndo Mwana ghwangu mpalo, yunyelelwa naywo."