Mateus 21

Yesu kanguyingila ku Yelusalemu kwa Chekwa

1 Yesu na ahundwa bhake pabhaheghelelite kuhika ku Yelusalemu, bhakihika ku Betifage mukitumbi kya Miseituni, apo kakialaghila ahundwa bhake abhili, 2 kakiaghombela, "Nng’ende mbaka ku kijiji kiibheghite muulongolo ghwenu, maammona kaputa kabhopwa, na mwana ywake kabhopwa pambwegha, muabhopole na mubhayeghe kwa nenga. 3 Handa mundu pakabhakonya kiyaha niki munguatola, munnyange, ‘Bambo kanguapala,’ kamu, kataabhuyiha."

4 Nnando aghu ghukitendekwa ngati ghatwihilike ghala ghaalongelitwe na mbuye,

5 "Mukighombele kitami kya Sayuni,

Nnole mutwa ywako kanguhika.

Ndo mpole na ywakahika katama unane mwa kaputa,

unane na mwa kaputa, mwana ywa kaputa."

6 Habhu, bhala ahundwa bhakighenda kutenda handa paalaghilitwe na Yesu. 7 Bhakinnyegha yula kaputa na mwana ywake, bhakiyalila ngubho hyabhe mu mighongo yabhe na Yesu kakitama kunani mwabhe. 8 Lumati lukulu lwa bhandu lukiyalila ngubho hyabhe munjila, na bhandu bhangi bhakidumula hiputila gha mikongo na kuhiyalila munjila. 9 Lumati lwa bhandu hiilongohanite na bhala bhaantughilite bhakikweha malobhe, "Katikilwe Mwana ywa Daudi. Yunakunemelwa ndo aywo ywakuhika kwa lihina lya Bambo. Tiko kwa Chapanga kunani."

10 Yesu pakayingilite ku Yelusalemu, kitami kyoha kikibhegha na mbilingembilinge, bhandu bhakibhegha bhangukonya "Ayu ndo ghani?"

11 Bhandu mulula lumati bhakilongela, "Ayu ndo Yesu, mbuye kuhuma ku Nasaleti kitami kya Galilaya."