Mateus 25

Nhwano ghwa akabhali kumi

1 Yesu kakighendelela kulongela, "Manjubha agho, Gubhutwa ghwa Kunani kwa Chapanga ghwabhegha handa akabhali kumi bhaatoliti mambamba ghabhe na kughenda kunkingama bambo yunakutolela. 2 Nhano mu bhombe bhakibhegha ahila mahala, na nhano bhakibhegha na mahala. 3 Bhala ahila mahala bhakitola mambamba ghabhe peni bhakitola ng’obhe na mahuta gha kuyonjokeha mu mambamba, 4 peni bhala bhaabheghite na mahala bhakitola mambamba ghabhe na mahuta ghangi mu kyupa. 5 Yula bambo yunakutolela pakakabhalililte kuhika bhala akabhali bhoha bhakitopelwa ng’ono na bhakighonja."

6 "Kuuhiko, pakilo totolo pakibhegha na kyobho, ‘Nnole, bambo yunakutolela kanguhika, nng’ende panje mukankingame.’ 7 Ndo bhala akabhali bhoha bhakiyumuka na kughatendekeha mambamba ghabhe. 8 Bhala ahila mahala bhakiaghombela bhala bhaabheghite na mahala, ‘Mutupeghe mahuta ghenu kichoko, mambamba ghetu ghanguhimika.’ 9 Peni bhala bhaabheghite na mahala bhakiayanga, ‘Kata, kiyaha ghangutukwila ng’obhe twenga na mwenga. Mbaha nng’ende kwa bhanakuhemengana mukahemele mahuta ghenu.’ 10 Bhala akamwali abhughabhugha paabheghite bhangughenda kuhemela mahuta, bambo yunakutolela kakihika. Bhala akabhali bhaabheghite kala, bhakiyingila unyumba papamu naywo mu chekwa ya kutolela na nlyango ghukitatwa."

11 "Mbole, bhala akabhali babhughabhugha nabho bhakihika, na bhakikema, ‘Bambo, Bambo, ghutuhughulile nlyango.’ 12 Peni Bambo yunakutolela kakiayanga, ‘Kulyaghila nunguaghombela, nunguamanya ng’obhe.’ "

13 Yesu kakiyomola pakalongela, "Hinu mulindakile, kiyaha mungumanya ng’obhe linjubha ebu lisaa."