1 Indja mbangi e Bwɛndi Bopele bo Yesu Masiya, Mwana o Ndjakomba. 2 Ta buku e motɛli Isaya, ekomama bo:

«Indja, nalomakadea molomami o mbi ta boso bo wɛ,

bɛngi aobɔngedje ndjea.

3 Edii kɔpi e moto omɔti agamakadea ta etengelenge bo:

Bɔngedjani ndjea e Kumu,

dongedjani mabaku bɛngi ndjea dji kɛkɛkɛkɛ djiemae bodju!»

4 Yoane Mobatisi aimana ta etengelenge. Adumbeaka bo: «Hombedjani milema, batisamani bɛngi odieni ekutubanedji e pekato dji bino.» 5 Bato basusu ba Yudha ko bato ba Yelusalɛmɛ bakɛɛ ta dii iyo; ko bahuodjaka pekato dji bobo ko ba batisama ta Yɔlɔdane. 6 Yoane alwaka esendja e yobo e tito okabee ibo kamela na mosenge mo yobo e tito ta bongo;* ayakaka katangenge na mosua mo pɔki. 7 Atɔndeaka bo: «Moto omɔti aduadea ngɔngɔ dji mbi anɔi mbi na ngulu; ko nabwaniti, bosunama tina e bolodja mikpulu mi sapato dji nde. 8 Mbi, naobatisani na madiba, endelo iyo aobatisadeani na Mwembo Mosɛnɔke.» 9 Iboa, ta masu mamina, Yesu ahula ta Nadjalɛtɛ e Galileya, ko Yoane amobatisa ta Yɔlɔdane. 10 Ta ehole eimanaka Yesu ta madiba, aenɛ diko didipoami ko Mwembo Mosɛnɔke botita diko di nde ondingo embenga. 11 Kɔpi emɔti edonga ta busa bo: «Odii Mwana o mbi o epaeli, nasepi na wɛ bobuke mɛnɛ*.» 12 Na mbala emɔti, Mwembo Mosɛnɔke motomba Yesu ta edhu. 13 Akɔɔ masu tuku inɛi, iho ta edhu, amekama na Satana. Adaaka engbanga na tito ba esika ko babwɛndi bamosaleaka.

14 Ngɔngɔ dji boisa Yoane ta bɔlɔkɔ, Yesu akɛɛ ta Galileya; atɔndeaka Bwɛndi Bopele bo Ndjakomba. 15 Ko abalaka bo: «Ehole eimei, ko Bokumu bo Ndjakomba boimei mbuti, hombedjani milema mi bino ko dhimeani Bwɛndi Bopele.» 16 Yesu anɔɔkɔ ta mokula mo ibeke di Galileya; aɛnɛ Simona na Andele, mwange Simona, badumbaka modjanga ta ibeke; modjɔ mo ibo badaaka baoweli baswi. 17 Yesu abala na bu ibo: «Kimananini, naoimedjadeani bahombeli ba bato.» 18 Na mbala emɔti bakina midjanga mi bobo, ko baso bakimana Yesu. 19 Anɔɔ iyo moo bohali, aɛnɛ Djake, mwana o Djebede ko Yoane mwana o nango, ibo pongono badaaka ta bwato bo bobo, babɔngedjaka midjanga mi bobo. 20 Na mbala emɔti, Yesu ababea; iboa Bakina sangwabu Djebede, na basali ta bwato, bamokimana.

21 Baimea ta Kapalanaume. Ta busa bo sabata, Yesu akwea ta ndako e miɔngɔnɔ mi Bayudha, ko alehaka. 22 Eleho e nde ekamodja bato basusu ba mohokamedjaka; modjɔ mo abalehaka ondingo moto odii na kpati botikoana na balehi ba mobeko. 23 Oko ta ehole emina ta ndako e miɔngɔnɔ moto omɔti adaaka na mwembo mo pita; agama bo: 24 «Modjɔ mo biso na wɛ nda Yesu o Nadjalɛtɛ? Odoi bɛngi o lowoe? Nadjebakadea bopele mɛnɛ bo: Odii Mosɛnɔke o Ndjakomba!» 25 Yesu agamea membo mibe ko amipa enɔi: «Dipa monɔkɔ mo wɛ ko imana ta dii iyo.» 26 Mwembo mo pita momokumanedja ko mogama na ngulu ko moimana na nde. 27 Bato basusu, bakamoa ko basawadjaka bo: «Imu modjɔ nda? Indjani eleho e yeene ko na kpati esusu! Apakadea nongo membo mi pita mitindo ko mimosumakadea.» 28 Na mbala emɔti gala e nde enangana ta Galileya mobimba.

29 Yesu aimana ta ndako e miɔngɔnɔ, na Djake ko na Yoane bakɛɛ ta dii Simona ko na Andele. 30 Bokiyo bo Simona o mwali adaaka asambi na pɛpɛlɛ; na mbala emɔti baso bamotɔndea gala e nde. 31 Abatama, ko amopea ta ebɔ, amoangɔdjɔ. Pɛpɛlɛ esia ko abanga bobakɔmedja.

32 Ndelo e mɔkɔmɔkɔ, abosama bo modaakabusa, balwɛkɛ Yesu bato ba bego basusu, na ibia badaaka na membo mibe. 33 Emumu e bato basusu ba ngando enɛnɛ baputoanaka ta modipe mo ndako. 34 Yesu aheledja bato ba bego mindumba mi misusu, ko abengana pongono membo mibe minɛnɛ, ko aipalaka membo mibale modjɔ mo midjebaka eka edii iyo.

35 Amaka ya busa na ihindihindi Yesu angɔɔ, ko aimana, ko akɛɛ ta etengelenge, iho, aɔngɔnɔkɔ. 36 Simona na binande bakɛɛ ahombe Yesu. 37 ko bamotanea, bamotɔndea bo: «Bato basusu baohombakadea.» 38 Endelo Yesu obala na bu bo: «Lokɛeni ta pamba ikina ta ngando dji mbuti, tina e botɔndea Bwɛndi Bopele iho pongono, modjɔ mo nadoa oko na tina imina.» 39 Ko akɛɛ ta Galileya mosusu; atɔndeaka Bwɛndi Bopele ta ndako dji miɔngɔnɔ dji Bayudha ko abenganaka membo mibe.

40 Moto o mabha omɔti adoa ta dii Yesu; akwa na magbunda ko amoɔngɔnɔ, amotɔndea bo: «Okapala, sɛnodjani.» 41 Yesu amokea ndjokwa, aninodja ebɔ ko amobɛndjɛ. Amotɔndea bo: «Napalakadea modjɔ momina, sɛnɔɔ.» 42 Na mbala emɔti mabha ma nde masia ko aso asɛnɔ. 43 Ngɔngɔ dji mina, Yesu amotingea endɛndɛ ta itoi, ko na mbala emɔti amoyanedja. 44 Ko abala na nde bo: «Keba, pɛpɛ botɔndea moto eka emɔti. Endelo kɛɛ asainedje ta dii nganga o Ndjakomba, ko pa mabondja maboinedja bo osɛnɔi, mondumba moloma Mose, ko edaadea tati ta dii ibo*.» 45 Endelo moomi omina akɛɛ atɔndoe pamba djisusu ko ta dii moto mosusu eka esusu enɔmɔ. Na tina emina Yesu aimanaka naikina ta ngando enɛnɛ, adikamaka oko ta bitengelenge. Ko bato badongaka pamba na pamba bamokimanaka.