1 Na ihindihindi, banganga ba Ndjakomba banɛnɛnɛnɛ baputoana engbanga emɔti na basuku ko na balehi ba mobeko, edaka Ikita inɛnɛ. Ngɔngɔ dji bonanga Yesu mbɔti, bakɛɛ na nde ko bamokaba ta mabɔ ma Pilato. 2 Pilato amowadja bo: «Wɛ odii mokondji o Bayudha?» Yesu amosɔmbedja bo: «Omobali.»* 3 Banganga ba Ndjakomba banɛnɛnɛnɛ bapundaka Yesu na midjɔ minɛnɛ. 4 Pilato amowadja na ikina: «Wɛ obwaniti bosɔmbedja nongo eka emɔti ta midjɔ mibalakadea ibo na wɛ?» 5 Ekahia Yesu aisɔmbedja nongo eka emɔti , ko Pilato aso akamwa bobuke mɛnɛ.

6 Engi eyenga e tɛke e Pasika, Pilato adaaka na momɛsɛno mo boimedjaka moto omɔti ta bɔlɔkɔ, bobwana na posa e bato. 7 Enakoboa, ta ehole emina moto omɔti na kombe e Balabasi adaaka ta bɔlɔkɔ engbanga emɔti na bapundji ibia baowaka moto omɔti, ehole ekɔkɔ bo mongangale. 8 Emumu e bato bakɛɛ ta dii iyo ko bamowadja akɔe oko mondumba momɛsɛnɛkɛ iyo bokɔ. 9 Pilato abasɔmbedja bo: «Opalakadeani natingoeni mokondji o Bayudha?» 10 Modjɔ mo, Pilato adjebaka bo, banganga ba Ndjakomba banɛnɛnɛnɛ bamokaba ta dii iyo tina e ikuwa. 11 Endelo banganga ba Ndjakomba banɛnɛnɛnɛ balindedja emumu e bato bɛngi baimanedje Balabasi. 12 Pilato asɔmbɔ bobawadja naikina bo: «Epalakadea ino nakɔe na moto iyoyo okabee bo mokondji o Bayudha nde?» 13 bagama naikina bo: «Mobaka ta ekulusu!» 14 Pilato abawadjaka bo: «Bobe bokɔi iyo nda?» Ekahia bagama naikina na ngulu bo: «Mobaka ta ekulusu!» 15 Pilato bɛngi atitedje milema mi emumu e bato, abaimedja Balabasi, ngɔngɔ djimina abomedja Yesu ndii ko amopa ta mabɔ ma bobo bɛngi bakɛe amobaka ta ekulusu.

16 Basoda bakɛɛ na Yesu ta tei e opango bo gupɛlɛnɛlɛ ko bakɛɛ asabeyana engbanga e bobo esusu. 17 Balwadja Yesu mokoto mokpetu, bakɔɔ isuku di ndjumbɛ diiyoa ibo ko baibakea ta molo mo nde. 18 Ngɔngɔ djiimina babanga bomoisea bo: «Mokondji o Bayudha bwandae!» 19 Bamobomaka na mobalake mo mososongo ta molo, bamotwɛaka masɔi ta boso ko badaaka na magbunda ko bongulama ta boso bonde. 20 Ehole esidja ibo bomosɛkɛ bamoiwa mokoto mokpetu ko bamosɔmbedja bisendja bi nde. Ngɔngɔ djimina baimanaka na nde sokolu ko bakɛɛ amobaka ta ekulusu.

21 Moto omɔti o Silɛne, kombe e nde Simona, sange e Alekɛdjandɛlɛ na Lupusi, anɔɔkɔ na ndjea emina ta ihule di gbie. Basoda bamolomaka na ngulu bɛngi atombe ekulusu e Yesu. 22 Bakɛɛ na Yesu ta esika ekabee bo Gologota, iyeye etingodjakadea bo esika e «Engɔngɔlɔ e molo». 23 Bamopa vino eputoanake na mile, endelo Yesu alona boemwaka. 24 Ngɔngɔ djimina bamobaka ta ekulusu ko bakabana bisendja bi nde, baboma djeke bɛngi badjebe eka ebwani bodia moto na moto. 25 Edaka ta ngonga e ibua e ehuma ehole emobaka ibo ta ekulusu. 26 Bakomaka tina e modjɔ mogwa na nde ta epasa e ibaya bo: «Mokondji o Bayudha». 27 Basoda babaka pongono bapundji babae ta bikulusu engbanga emɔti na Yesu, omɔti ta ebɔ e nde e baami ko okina ta ebɔ e nde e bali. [ 28 Iyena edii bokokedjama bobala Makomi bo: «Iyo adaaka ta tei e bapundji.»] 29 Bato badaaka banɔ na ndjea bomosingaka ko bagbɔkeaka melo; babala na nde bo: «Ee! Wɛ te moto obalaka bo obukadea tepelo, ngɔngɔ dji masu masato ko obwani boetonga, 30 saheledja wɛ mɛnɛ, oko tita ta ekulusu!» 31 Banganga ba Ndjakomba banɛnɛnɛnɛ ko balehi ba mobeko basɛkɛkɛ Yesu oko mondumba momina ko basabaleanaka bo: «Aheledjaka bato bakina, iboa iyo mɛnɛ abwaniti bosaheledja! 32 Wɛ okadaa Masiya, mokondji o Isalɛlɛ, tita edɛdiyeye ta ekulusu! Lokaenɛdea na miso, iboa loso lodhime.» Bato babae ibia babakamaka ta ekulusu engbanga emɔti na nde bamosingaka, pongono.

33 Ta ndelo e midhi, modidi mokwa ta kpɔtɔ isusu tee mbunoko ta ngonga e basato e mɔkɔmɔkɔ. 34 Ta ngonga e basato ngɔngɔ dji midhi, Yesu agama na ngulu bo: «Eloi, Eloi, lamasabakatani?» Etingodji bo: «Ndjakomba o mbi, Ndjakomba o mbi, tina ndani okinini?» 35 Bato bakina ibia badaaka ena aoka bo abala iboa baso babalaka bo: «Okani, abeakadea Eliya!» 36 Moto omɔti ta tei e bobo apota ebango aisa imbusu ta vino e ngai ta sɔngɔ e mososongo, apa Yesu bɛngi amwake ko abala bo: «Loindje kaoko Eliya o nde adoadea amobakoa ta ekulusu!» 37 Ekahia Yesu agama na ngulu ko atsoea molema. 38 Esendja enɛnɛ edaaka ta ndanda e Esika Esɛnɔke na Esika enɔi Esɛnɔke ta tepelo ealea bipasa bibae bobanga o diko mbunoko nase. 39 Mokondji o basodha mokama iyoo oemaka ta boso bo Yesu aɛnɛ mondumba mogwa Yesu ko aso abala bo: «Sooti mɛnɛ, moto iyoo adaaka Mwana o Ndjakomba!» 40 Ndambo e bali badaaka baemi ena, ibo pongono, baɛnɛkɛ midjɔ mimina misusu na bohali. Ta tei e bobo, edaka Malia o ngando e Magadala, Malia, nange e Djake, iyoyo obeaka ibo mwana o ngɔngɔ na Djodje, ko na Salome, 41 Bali bamina badaaka bamokimana ko bomokɔmedjaka ehole edaaka iyo ta Galileya. Edaaka pongono na bakina bali banɛnɛ ibia baiweaka na nde ta Yelusalɛmɛ.

42 Busa boimeaka mɔkɔmɔkɔ, edaaka busa bo Mosɛlingo* mo sabata. 43 Yosepu moto o Alimatayo, adaaka ta engbanga e Ikita dinɛnɛ ko bamosumaka bobuke mɛnɛ, ambaka na ingbangba inɛnɛ Bokumu bo Ndjakomba. Akɛɛ na bosusu mɛnɛ awadja Pilato ebembe e Yesu. 44 Pilato akamwa ehole aoka iyo bo Yesu agwi. Iboa abea mokondji o basodha mokama ko amowadja bo: «Yesu agwaki ehele?» 45 Iyana amosɔmbedja mokondji o basodha bo Yesu agwi, Pilato apa Yosepu ndjea atombe ebembe e Yesu. 46 Yosepu asomba dala e lino, atitedja ebembe e Yesu ta ekulusu, aehua na esendja emina ko aepusea ta mombɔndɔ molongaka iyo ta tei e ibanga dinɛnɛ. Ngɔngɔ djimina adipa monɔkɔ mo mombɔndɔ momina na ibanga dikina dimɔti dinɛnɛ. 47 Malia o ngando e Magadala na Malia nange Djodje baindjaka esika emopuseaka ibo.