1 Ngnɔgɔ dji busa bo sabata, Malia o ngando e Magadala, Malia nange Djake, ko na Salome basomba malasi ma so epele bɛngi bakɛe asopea ebembe e Yesu ekakane edae pɛpɛ bopɔ. 2 Nahindihindi ta isu di boso di eyenga, ta eyeli e busa, ibo baso bakɛɛ aindja ikila. 3 Basawadjaka ta tei e bobo bo: «Moto ndani olohilingoanedjadea ibanga ibakea bo ta monɔkɔ mo mombɔndɔ mo ikila?» 4 Ekahia ndelo edumba bo miso, baɛnɛ bo basi bohilingoanedja ibanga ehele, tina ebo ibanga dimina idaaka inɛnɛ mɛnɛ. 5 Bali baso bakwea ta ikila; baɛnɛ ena mwenga omɔti, adii na mobondo ta ebɔ e baami, alwaka mokoto mopu, ko bali bamina baso babanga. 6 Ekahia mwenga abatɔndea bo: «Pɛpɛ bobangani oko; ohombakadeani Yesu o Nadjalɛtɛ, iyo obakakabi bo ta ekulusu; asisoi ta bogwa, aditi iyaya. Indjani polo e mosambeakibo ibo iyo iyeye. 7 Kɛɛni edɛdiyeye adjebedja batingami ba nde, na Petelo pongono bo: "Akɛi aombani ta Galileya; omoɛnɛdeani iho, oko mondumba motɔndeakani iyo mɛnɛ." » 8 Bali baimana ta ikila, ko bayana apote mbango bakɛkɛ angongome na bɔɔ. Ko baitɔndea nongo moto omɔti, modjɔ mo badaaka na bɔɔ.

[ 9 Ta ehuma e busa bo eyenga ngɔngɔ dji Yesu bosisoa ta bogwa, Asaenɛmedja boso mɛnɛ na Malia o ngando e Magadala, iyona oheledjaka iyo na bomobenganea membo mibe sambo. 10 Akɛɛ atondea Bwɛndi ta dii batingami ibia badaaka na nde. Iboa ibo badaaka na ndjokwa ko bayeaka. 11 Baoka Malia abalaka bo: «Yesu adii na bomɔ, aimaneini!», baimodhimea.

12 Ngɔngɔ djimina, Yesu asaɛnɛmedja na mondumba mokina na batingami babae ibia badaaka na ndjea bɛngi bakɛe ta diako. 13 Ibo pongono basɔmbɔ ko badjebedja bina bu, baibadhimea pɛpɛ nongo mweka.

14 Ta mbala e suka, Yesu asainedja na batingami doomi na omɔti ehole eyakaka bo ta mesa; abadosa na taka e bobo e edhimeli ko na milema mipipo mi pɛpɛ bodhima midjɔ mibatɔndeaka bato ibibi badaaka bamoɛnɛ ta bosisoa bo nde ta bogwa. 15 Ngɔngɔ djimina abala na bu bo: «Kɛɛni ta ngondo esusu, lehani Bwɛndi Bopele ta dii bato basusu. 16 Moto odhimadea atombe batisimo, moto omina iyona ahelabi; ko moto iyona odaabi pɛpɛ bodhima akwabi na ikambo. 17 Indjani bimbete bikɔmɔbi ta dii bato ibia badhimeabini: Na kombe e mbi babenganabi membo mibe; babalabi kɔpi dji yeene; 18 nongo bakapea ndjɔ na mabɔ kaoko bakamwa moselo, eka emɔti ebe ebwaniti bobakɔɔ; babakeabi mɔmɔ diko di bato ba bego, ko babolodjabi mohelo.»

19 Ngɔngɔ dji Kumu Yesu bobala na bu, angɔdjɔmɔ ta busa ko akɛɛ adaa ta ebɔ e baami e Ndjakomba. 20 Batingami bakɛɛ aleha Bwɛndi Bopele ta bisika bisusu. Kumu adaaka asala na bu ko abapa bokumu bo bokɔɔ midjɔ mi bokamoa minɛnɛ tina e bopa ngulu ta mobalo mo nde.]