1 Bapalisai ko na ndambo e balehi ba mobeko badonga ta Yelusalɛmɛ, baputoana ta esika edaka Yesu. 2 Baɛnɛ ndambo e batingami ba nde bayaka mia na mɔmɔ ma pita, epalakadea bobala bo: pɛpɛ bososa mɔmɔ bobwana na bokɔkɔ bo bobo. 3 Modjɔ mo ta bokimana mibeko mi bokɔkɔ bo bobo, Bapalisai na Bayudha basusu babwaniti boyaka leka pɛpɛ bososa mɔmɔ*, 4 ko ta ndelo ehuli bo ta djaando, baiyaka mia boso bo bosasɛnodja na madiba. Ko edii pongono na mibeko mikina misumaka ibo, ondingo mondumba mopele mo bososa kɔbɔ, teni, masasu ma bibende ko na bisambe. 5 Na tina emina Bapalisai na balehi ba mobeko bawadja Yesu bo: «Tina ndani batingami ba wɛ bakayake mia na mɔmɔ ma pita ta polo e bo basume mibeko milokinea bokɔkɔ?» 6 Yesu abasɔmbedja bo: «Isaya alonga ndelo etɛlɛ iyo ta tina e bino! Odiini bato ba ndango e mongi, modjɔ mo ekomama bo:

"Bato ibibi bakasumeni oto na poso dji monɔkɔ,

endelo milema mi bobo midii bohali na mbi.

7 Malako ma bobo madii ibo bokwea tina e mbi madii oto ma ngasa,

bileho bi bobo bikalehe ibo bidii oto bi mibeko mi bato*."

8 Okinini mobeko mo Ndjakomba ko osumini bokɔkɔ bo bato.»

9 «Sooti mɛɛnɛ odumbini, mobeko mo Ndjakomba tina bobanea bokɔkɔ bo bino! 10 Modjɔ mo Mose abala bo: "Suma sangwao na ngwao", ko naikina "moto iyona obwani bobala bobe tina e sango kaoko na nango atungi bamowoe*." 11 Ekahia ino okaleheni ibo ekadaa na moto omɔti akabala na sango isa nango bo: "Eka ebwanaki na mbi naopɛ edii Koloba*", etingodjakadea bo "ibondja tina e Ndjakomba", 12 ino opini mwana ndjea adae pɛpɛ bokɔ bopele ta dii sango kaoko ta dii nango. 13 Ino odongedjini mobalo mo Ndjakomba tina bokɔkɔ ibubu boinedjakadea ino. Ko okɔkɔɔdeani mɛko mikina minɛnɛ mi mondumba momina momɔti.»

14 Ngɔngɔ djimina, Yesu abea naikina emumu e bato, abala na bu bo: «Hokamedjanini ino basusu ko sipoani bopele bo: 15 Eka ebwani bokwea ta tei e moto ebwaniti bomobedja, endelo eka iyeye ekadonge ta molema mo moto, edii bomoimedja djɛti. [ 16 Hokamedjani bopele, okadaani na matoi ma booka*!]» 17 Ehole ekina Yesu emumu e bato ko aso ayana ta ndako, batingami ba nde bamowadja tina e ekuanedji emina. 18 Ko abala na bu bo: «Ino pongono, odiitini na bowɛi? Odjebakadeani bo pɛpɛ nongo eka emɔti ebwani bokwea ta tei e moto ko ebwani bomoimedja djɛti, 19 modjɔ mo leka lomina te lokweake ta molema mo nde, endelo ta sɔpɔ dji nde, boso bo bokɛɛ ta ndima?» Ta kɔpi emina, iboa Yesu abalaka bo leka losusu loboyaka lodii losɛnɔke*. 20 Abalaka naikina bo: «Eka ekaimane ta tei e moto edii iyena ekamoimedje djɛti. 21 Modjɔ mo ta tei e molema mo moto malɛno mabe makaimane: pite, iba, boowa, 22 bɔɔli, boimboa eka e moto, bobila, bowɛi bobe, ndukeli, posa ebe, bobala bobe na minɔ, bosakumedja, bodaa elole. 23 Bobe bosusu ibua bokaimane otei bokaimedje moto djɛti.»

24 Yesu adonga ena, akɛɛ ta telitoile e Tile. Akwea ta ndako emɔti ko aipalaka nongo bo moto omɔti amodjebe, nongo iboa aihɔnɔ bobolama. 25 Modjɔ mo, mwali omɔti mwana o nde o mwali atungeamaka na mwembo mo pita aoka iyo gala e nde ko aso adoa akwa ta mako ma nde. 26 Mwali omina aidaka Moyudha, abotama ta Penesi e Silia. Angɔnɔkɔ Yesu abengane mwembo mobe ta dii mwana o nde mwali. 27 Endelo, Yesu abalaka na nde bo: «Pete kina boso bana bagole mia ma bobo; modjɔ mo, ediiti bopele botomba mia ma bana bɛngi osabee bana ba mbwa.» 28 Mwali omina amosɔmbedja bo: «Kumu, nongo iboa, bana ba mbwa bakayake oko kua ikadumbe bana ta nase i mesa.» 29 Iboa Yesu abala na nde bo: «Ta tina e mɛko misabala wɛ, kɛ, mwembo mobe moimani ta tei e mwana o wɛ o mwali.» 30 Asɔmbɔ iyo ta ndako e nde atanea mwana asambi ta esambe, mwembo mobe mosia boimana na nde.

31 Ngɔngɔ djimina Yesu akina telitoile e Tile ko anɔɔ ta Sidona, asɔmbɔ ta ibeke di Galileya abokatisa telitoale e Dekapole. 32 Bamolwɛ moto omɔti o bohoka ko emimi bamoangɔnɔ bɛngi amobake mabɔ. 33 Yesu amotomba, asasua na nde moo bohali na emumu, amoisa sapi ta matoi, amotswea masɔi ko abanda yeemi e nde na masɔi ma nde. 34 Ngɔngɔ djimina, aangɔdjɔ miso ta busa, amohuea mohuli ko abala na nde bo: «Epata*!» etingodji bo: «Dipwama!» 35 Na mbala emɔti matoi ma nde madipwama, Yeemi e nde etatoama ko aimea bobala bopele. 36 Yesu abasia bo adae pɛpɛ botondea moto omɔti, endelo nongo ko abasiaka iyo, batɔndɔkɔ oko gala e nde. 37 Bato bakamwaka bobuke mɛnɛ ko babalaka bo: «Mɛko misusu mikɔkɔ iyo midii oko mipele! Bato babohoka baokakadea ko bimimi babalakadea!»