1 Ngwanyã, bee eyɛɛ wɛn okɛɛn nzɔ a bee yi me nsie ŋã yɛn onge sɛɛ etsɔɔn, bee eli ye nzɔ ke ywel yi etuu Nziã. Yɔ eli lɔɔ li ɔ̃bu lɛn k’ábuo me mviɔɔl ɛ̃ baal wɛ. 2 Obobɔ, bee ebeluɔɔl ŋ’eli bee onse sɛɛ ondɛ, bvool edzii bam k’eyekal ke lɔɔ e bee li ke ywel. 3 Ke ngwel wɛ, okɛɛn nzɔ oyɔ efoo bee, bee k’èbekal odzuũ wɛ. 4 Ngwanyã, ŋ’ekal bee onse sɛɛ wu, bee ebeluɔɔl, ɛ̃wuul ɛ̃mɛɛ̃fa. Taa-taa, ke me ndɔɔ yɛn bee edzii k’embaal nzuru yi wɛ, me ndɔɔ yɛn bee edzii k’elaal nzuru yi ywel, kwɛn elaã eswɛɛl emfa e nzuru yi ekieel ekwa. 5 Nziã ndyam oyɛɛl bee me ndɔɔ elaã olɔ. Ndɛ owi bee Ɔ̃fel wu Ɔ̃nsensal, wu oli onge boo li ɛ̃kwel li eluɔ bvi ekieel ewa ndɛ bee.

6 Obobɔ, bee eli bam y’ãŋã. Kɛn a bee eyɛɛ bam wɛn, ŋ’ebekal bee onse nzuru yi, bee eli lala ye Mfam. 7 Ke ngwel wɛ, bee edzuu m’okiool, ke me mviil m’ombuul wɛ. 8 Kɛn a bee eli bam y’ãŋã, bvool edzii bam k’esiil nzuru yi, m’oyekal ola Mfam. 9 Obɔ otsɛn bɛn, bee ebesa mpɛn yi esa ndɛ esɛ, ekal ŋ’eli bee onse nzuru yi, ekal ŋ’èmbal bee onse yɔ. 10 Ke ngwel wɛ, ebvaan bia-byɛ bueel eyetsuun ke mbal a Mãsia. M’emfa okyɛ, mbuul bwɛn a mbuul àbɔɔ ki ebvaan me ndɛ, m’emfa ki ési ndɛ ãndɔɔ m’omwiĩ o ndɛ me nsie: Ekal ãndɔɔ m’ãbvɛ, ekal m’ãbi.

11 Onge bɛn bee eyɛɛ otsɛn b’owa o Mfam bvɛɛ, bee ebesa mpɛn yam yi esa kwɛn baal akiool. Nziã oyɛɛ bee bam ngesɛ, mɛ̃ etsam wɛn, onse ɛ̃kwal ɛ̃ byɛ, byɛ hɛ̃ eyɛɛ bee bam ngesɛ. 12 Bee k’edzii bvool k’eyɛɛn me ndɔɔ a bee-myam ola byɛ wɛ, kɛn a bee edzii k’ewa byɛ mpwee yi ebɛɛl ntwel me ndɔɔ a bee. Obobɔ, byɛ èbɔɔ ɛ̃dzoo mi ebveel bɛn ke mboo a k’abɛɛl ntwel me m’ãli onse ɔ̃kwal, bɔ abebɛɛl ntwel me m’amwɛn me mviil. 13 Ke ngwel wɛ, okɛɛn ayii awal bee onge ewool, me ndɔɔ a Nziã. Kɛn okɛɛn ayii awal bee onge anga-ãyal, me ndɔɔ obvɛ o byɛ. 14 Ngwanyã, dzii e Mãsia eluul ɛ̃kwal ɛ̃ bee, ŋ’etsam bee ndɔɔ yi: Mbuul ngɔmɔ̃ okwi me ndɔɔ a bueel, obobɔ bueel hɛ̃ akwi ye ndɛ. 15 Ndɛ okwi me ndɔɔ a baal bueel, kwɛn baal b’amwiĩ-mwiĩ abee y’omwiĩ okal me ndɔɔ a bam, kɛn a bɔ akal y’omwiĩ me ndɔɔ a wu ákwi bvool ásiool me ndɔɔ a bɔ.

16 Obɔ otsɛn bɛn, bee k’ebewal mbuul si ɔ̃mɔ̃ m’emfa ki ombuul wɛ. Onkyam ŋɛn bee ékewal Mãsia m’emfa ki ombuul, meba ŋã, bee k’ebewal ndɛ m’emfa okyɛ wɛ. 17 Ŋɛn mbuul oli onse Mãsia, ndɛ ŋ’ayii mbuul wa alili wu ebuo Nziã: Ãndɔɔ m’ãtsɔɔn ãfi, m’alili ãwel mboo. 18 Ndɔɔ oyɔ efi ola Nziã, wu obveel ondoo o ndɛ ye bee me nkuul a Mãsia. Ndɛ bvool owi bee ɔ̃sal wu ebveel baal akyam m’ondoo ye ndɛ. 19 Ke ngwel wɛ, me nkuul a Mãsia, Nziã ákesal m’obveel b’ondoo o ndɛ ye baal b’ɔ̃kiri bueel, k’atal ãbi ã baal wɛ. Ndɛ otam bee k’etee Endɔɔ li obveel b’ondoo.

20 Bee eli antam b’etam Nziã me ndɔɔ yi eyɛɛn me ndɔɔ a Mãsia. M’emfa okyɛ, me nkuul a bee, Nziã ndyam abeta byɛ mbel: Me nkuũ a Mãsia, bee ebuɛɛn byɛ wɛn ebveel ondoo ye Nziã! 21 Mãsia wɛn k’ási obi wɛ, Nziã osuul ndɛ oyii obi, kwɛn me nkuul a ndɛ, Nziã asuul bia-byɛ dzu.