1 Mɛ̃ wu Pool ye Timote b’asal a Yeso Mãsia, bee eyuɔɔl ɔ̃nkaan wu ola baal bueel ba ngel onse bvoo a bia-byɛ ye Yeso-Mãsia, b’ali ke Filipese. Bee eyuɔɔl ndɛ hɛ̃ ol’ambiri y’ankiaal b’Ebvɔɔn. 2 Yɔɔl kwɛn Nziã wu Tal a bia-byɛ ye Mfam Yeso Mãsia asio byɛ nyiĩ, awa byɛ opi!

3 Ãlio mbueel m’ebeteel mɛ̃ byɛ, mɛ̃ ebebveel Nziã a mɛ̃ ãtuɛɛn. 4 Ãlio mbueel m’ebebuɛɛn mɛ̃ me ndɔɔ a byɛ bueel, mɛ̃ ebebuɛɛn y’esɛ, 5 me ndɔɔ ɔ̃sal wu esi byɛ ye bee m’otsal o Nsia yi Ngesɛ, bɛɛn tsoo li ɛ̃kwel tiil nonɔ̃ ŋã. 6 Taa-taa, mɛ̃ nkiool bam wɛn, wu abɛɛn ɔ̃sal wa ngesɛ wu onse byɛ, anɔɔn a ndɛ tiil k’efa ndɛ me tsoo li oya o Yeso Mãsia. 7 Eli bam ngesɛ kwɛn mɛ̃ nkal y’ãtsam m’obobɔ me ndɔɔ a byɛ bueel. Ke ngwel wɛ, byɛ eli onse ɔ̃kwal a mɛ̃, nzal-a-ŋɛn, byɛ bueel ebɔɔ nyiĩ yi esio Nziã mɛ̃, ekal ŋe ndi mɛ̃ me bwal ŋã, ekal ŋ’etsuun mɛ̃ me ndɔɔ a Nsia yi Ngesɛ, wuo ekal ŋ’esuo mɛ̃ otaa-taa o yɔ. 8 Ke ngwel wɛ, Nziã ndyam oyɛɛ kwɛn, mɛ̃ ndi y’ɔ̃tio a byɛ bueel me dzii e Yeso Mãsia.

9 Ndɔɔ yi esɔɔ mɛ̃ onse ãbuɛɛn ã mɛ̃, yɛn, dzii e byɛ eyi nkwel onse oyɛɛ b’ãndɔɔ ngesɛ y’ãyal mbueel, 10 kwɛn byɛ ekoo k’ebwɛɛl ãndɔɔ mã y’ɔ̃bvɛn. M’emfa okyɛ, byɛ ekieel ekal tsɛ-tsɛ bvool eywɛn elyal me tsoo li oya o Mãsia. 11 Yeso Mãsia kieel asa kwɛn omwiĩ o byɛ oluul m’ãndɔɔ mã dzu, m’ãwa Nziã dzuun ye lweel.

12 Andoo a mɛ̃, mɛ̃ nzii kwɛn byɛ eyɛɛ wɛn ãndɔɔ m’ãyi me mɛ̃ ãsi kwɛn Nsia yi Ngesɛ eyi nkwel. 13 Ke ngwel wɛ, baal a nzɔ a ɔ̃kwɛn ye b’asiil bueel ayɛɛ wɛn mɛ̃ ndi me bwal me ndɔɔ ɔ̃sal a Mãsia. 14 Bvool okuru b’akuru mɛ̃ me bwal owi andoo bibi mpɛn onse Mfam, me ndɔɔ yi atee Endɔɔ e Nziã y’ãŋã, buɔ pyɛ. 15 Taa-taa, baal bakyɛ abetee Mãsia me nzal a obɔɔ ye nzal a obel, kɛn a bakyɛ abetee ndɛ m’ãtsam mã ngesɛ. 16 Baal b’abetee m’ãtsam mã ngesɛ obɔ, b’asal me dzii. Bɔ ayɛɛ wɛn mɛ̃ ndi ŋã onse bwal me ndɔɔ yi etsweel Nsia yi Ngesɛ. 17 Kɛn a baal bakyɛ abetee Mãsia me nzal a obel, ãtsam ã bɔ k’ãli dzu wɛ. Bɔ adzii k’akool fool e mɛ̃ li mbuul a bwal.

18 Ãtsam ã bɔ ãkal mã mfy-mfya wuo mã taa-taa, ndɔɔ pyɛ! Ki nguo kyɛn, abetee Mãsia. Mɛ̃ esia mpaa me ndɔɔ oyɔ. Mɛ̃ bvool ekieel esia mpaa. 19 Ke ngwel wɛ, mɛ̃ ngyɛɛ wɛn, ãndɔɔ omɔ̃ mbueel ã̀siɛɛn k’obvuul o mɛ̃, m’ãbuɛɛn ã byɛ y’owuaal b’ewuaal Ɔ̃fel a Yeso Mãsia. 20 Ke ngwel wɛ, mɛ̃ ebekiaal ãmfuru-mva bvool ndi ye kaã wɛn, mɛ̃ k’èbɔɔ opfuru me ndɔɔ si ngamɔ̃ wɛ. Kɛn a meba, wuo ãlio mbueel, mɛ̃ ndi ye kaã lam wɛn, lweel e Mãsia èmɔɔn me mɛ̃, ekal m’omwiĩ, ekal m’epfu e mɛ̃. 21 Ke ngwel wɛ, me b’otal mɛ̃, elaã eli Mãsia, epfu eli bvel. 22 Kɛn a ŋɛn mɛ̃ nkoo k’ekal mwiĩ me nsie ŋã, mɛ̃ nkoo k’esa kwɛn ɔ̃sal a mɛ̃ aburu nsia. Kɛn onse oŋɔ̃, mɛ̃ ke ngyɛɛ ki esuaal mɛ̃ wɛ. 23 Adzuru mɛ̃ ngwel-a-ngwel: Mɛ̃ nzii k’esiil ɔ̃kiri bvool eyekal ye Mãsia, ke ngwel wɛ oyɔ ndɔɔ yi enduru obvie! 24 Kɛn a me ndɔɔ a byɛ, ndɔɔ yi enduru ɔ̃bvɛn yi ekal mɛ̃ kɛn me nsie ŋã! 25 Mɛ̃ ndi ye kaã olɔ, mɛ̃ ngyɛɛ wɛn mɛ̃ kɛn èkal mwiĩ bvool èkal ye byɛ bueel, kwɛn byɛ ekwel bvool ekal y’esɛ onse okiool. 26 Obobɔ, ŋ’ekieel eyebvool mɛ̃ ola byɛ, byɛ ekal y’obɛɛl o ntwel me ndɔɔ a mɛ̃ onse bvoo a byɛ ye Yeso Mãsia.

27 Oŋɔ̃ edzuu m’emfa ki etam Nsia yi Ngesɛ yi Mãsia. Obobɔ, okɛɛn mɛ̃ ngyi byɛ otal, wuo ŋɛn mɛ̃ ke ndi ye byɛ wɛ, mɛ̃ ngyoo ndiri byɛ esɛn ãnã m’ãtsam ngãmɔ̃, bvool ebedzwaan bvoo onse ɔ̃fel ngɔmɔ̃ me ndɔɔ a Nsia yi Ngesɛ yi ékiool byɛ. 28 Ebee ataal a byɛ obal si ekal me ndɔɔ yam ke mã. Me ndɔɔ a bɔ, okyɛ eli eliĩ ki odziɔɔn o bɔ. Kɛn a me ndɔɔ a byɛ, okyɛ eli eliĩ ki obvuul o byɛ, b’ofi ola Nziã. 29 Ke ngwel wɛ, me b’otal Mãsia, Nziã k’asio byɛ nyiĩ kɛn a me ndɔɔ yi ekiool ndɛ wɛ, eli hɛ̃ me ndɔɔ yi emwɛn fool me ndɔɔ a ndɛ. 30 Meba ŋã, byɛ ebedzwaan mvel yiyi yi émwɛn byɛ ola mɛ̃, yɛn meba ŋã, byɛ ebeyoo ndiri mɛ̃ kɛn ebedzwaan yɔ.