1 Andoo a mɛ̃ adzii, obɔ otsɛn bɛn, byɛ bɛn mɛ̃ nzii bam k’emwɛn bvool, byɛ b’eli esɛ e mɛ̃ bvool eli dzuun e mɛ̃, etɛɛn ye mpɛn onse bvoo a bia-byɛ ye Mfam.

2 Mɛ̃ ewa Ebvodi ye Sɛ̃ntiswe luo li akal ãtsam ngãmɔ̃ onse bvoo a bia-byɛ ye Mfam. 3 Yɛ hɛ̃ wu ndoo a mɛ̃ wa taa-taa wu ɔ̃sal, mɛ̃ nsɔɔ ola yɛ k’awuaal a akaal obɔ. Bɔ b’adzwaan mboo mɔ̃ ye mɛ̃ me ndɔɔ a Nsia yi Ngesɛ, emfa ngemɔ̃ onge Kelemã y’andoo a mɛ̃ b’ɔ̃sal bakyɛ, bɛn ãkuũ ãli onse ɔ̃nkaan wu elaã. 4 Esia mpaa onse bvoo a bia-byɛ ye Mfam lio lueel. Mɛ̃ bvool ngyɛɛn wɛn esia mpaa! 5 Yɔɔl kwɛn baal bueel ayɛɛ ɔ̃kwal a byɛ wu efyɛ! Mfam oyii tsotsoo. 6 Ebee nguo okɛɛ me ndɔɔ mbi pyɛ, kɛn a m’ãndɔɔ mbueel, ewa ãkɔɔ ã byɛ ola Nziã, m’ãbuɛɛn, m’oluɔɔn y’obveel b’ãtuɛɛn. 7 Obobɔ, opi o Nziã b’onduru ãyal mbueel, òkiaal ɛ̃kwal ɛ̃ byɛ y’ãtsam ã byɛ onse bvoo a bia-byɛ ye Yeso Mãsia. 8 Andoo, k’osɛɛl, yɔɔl kwɛn ãtsam ã byɛ ãkal nkal ãndɔɔ mbueel mã taa-taa, ãndɔɔ mbueel m’ãwa dzuun, ãndɔɔ mbueel mã dzu, ãndɔɔ mbueel m’ãywɛn a mbiin, ãndɔɔ mbueel m’edzii baal, ãndɔɔ mbueel m’ekiool baal, m’ãbvɛ-ãbvɛ bvool ye m’etuɛɛn baal. 9 Ãndɔɔ m’éyio byɛ, m’ébɔɔ byɛ, m’éyoo byɛ ye m’émwɛn byɛ ola mɛ̃, esa mɔ̃. Obobɔ, Nziã-nga-opi àkal ye byɛ.

10 Mɛ̃ ensia-mpaa ngamfɛn onse bvoo a bia-byɛ ye Mfam, me ndɔɔ yɛn byɛ bvool esuo mɛ̃ wɛn byɛ ebetsam me mɛ̃. Ãtsam omɔ̃, byɛ éli ye mɔ̃, kɛn a byɛ éywɛn a mpwee yi esuo mɛ̃ mɔ̃. 11 Mɛ̃ k’eyɛɛn obobɔ me ndɔɔ yɛn mɛ̃ nkaan ke m’emã wɛ. Ke ngwel wɛ, mɛ̃ ndyam éyio k’ebekal y’esɛ me ki ndi a mɛ̃. 12 Mɛ̃ ngyɛɛ k’ebekal onse okaan, mɛ̃ hɛ̃ ngyɛɛ k’ebekal onse obɔɔ bibi. Onse ãndɔɔ mbueel bvool k’ãmboo mbueel, mɛ̃ éyio k’ebekal onse yool wuo k’ebekwa a nzal, k’ebekal onse obɔɔ wuo k’ebekal onse okaan. 13 Mɛ̃ nkoo ãndɔɔ omɔ̃ mbueel me ndɛ wu abewa mɛ̃ mpɛn. 14 Kɛn a byɛ esi ngesɛ ŋ’ewueel a byɛ mɛ̃ onse ãwua ã mɛ̃. 15 Afi-Filipese, byam eyɛɛ kwɛn ŋ’ébɛɛn mɛ̃ Nsia yi Ngesɛ otee me lio li émbal mɛ̃ nsie yi Maseduaan, Ebvɔɔn si ngemɔ̃ li éwueel a mɛ̃ k’éli wɛ, b’áwueel a mɛ̃ m’ãkab m’akewa mɛ̃ ye m’ekewa mɛ̃ baal, kɛn a byɛ. 16 Ke ngwel wɛ, ŋ’éli mɛ̃ ke bviil li Tesalonik, byɛ éyuɔɔl mɛ̃ bvi éli mɛ̃ ye kɔɔ e bvɛ nsa yuaal. 17 Ke me ndɔɔ yɛn wɛn mɛ̃ ebii ãkab wɛ, ki ebii mɛ̃ kyɛn byɛ ebɔɔ bvel li bibi. 18 Mɛ̃ eyɔɔ eluɔ bvieel, mɛ̃ ndi y’obɔɔ bibi. Mɛ̃ nduul m’esɛ ŋe ngyɔɔ mɛ̃ eluɔ bvi eyi y’Epafolodite, bvi efi ola byɛ. Bvɛ eli onge ãnasi mã nswel ngesɛ, kab li ekiool Nziã, bvool li ewa ndɛ esɛ. 19 Nziã a mɛ̃ àwa byɛ eluɔ bvieel bvi eli byɛ ye kɔɔ e bvɛ, m’emfa ki opfel o lweel e ndɛ onse bvoo a bia-byɛ ye Yeso Mãsia. 20 Yɔɔl kwɛn alweel Nziã wu Tal a bia-byɛ ɔ̃bu nzal ɔ̃bu! Amɛn!

21 Ebio ba ngel bueel onse bvoo a bia-byɛ ye Yeso Mãsia. Andoo b’ali ye mɛ̃ kwɛn abio byɛ. 22 Ba ngel bueel abio byɛ, bvel-bvel b’ali ke nzɔ a Tsedzaal. 23 Yɔɔl kwɛn nyiĩ a Mfam Yeso Mãsia ekal y’ɛ̃fel ɛ̃ byɛ!