Mateus 18

Obi y’odzeel o bakyɛ

15 «Okɛɛn muaan-ngoo a yɛ osi yɛ obi, yi y’asuo ndɛ obi b’esi ndɛ, byam ange-buaal. Okɛɛn ndɛ oyoo yɛ, yɛ ŋe bveel ondoo o byɛ. 16 Kɛn okɛɛn ndɛ k’ayoo yɛ wɛ, kɔɔl yi y’atal ndɛ ye mbuul ngɔmɔ̃ wuo baal buaal, onge b’ákel ndiri "ndɔɔ yueel asoo yɔ ke mbee a ɔ̃tsweel wu etsweel amwɛn buaal wuo atyel✝18.16 Det 19.15." 17 Okɛɛn ndɛ obee k’ayoo bɔ, yɛɛn ndɔɔ oyɔ ol’Ebvɔɔn. Okɛɛn ndɛ obee k’ayoo Ebvɔɔn hɛ̃, oŋɔ̃ wal ndɛ onge mbuul wɛn k’ayɛɛ Nziã wɛ, wuo onge ɔ̃twal mpal. 18 Taa-taa bam, mɛ̃ eyɛɛn byɛ wɛn, ndɔɔ yueel yi èkuru byɛ me nsie, àkuru yɔ hɛ̃ ke ywel. Ndɔɔ yueel yi ènyiɔɔn byɛ me nsie, ànyiɔɔn yɔ hɛ̃ ke ywel. 19 Taa-taa bam, mɛ̃ bvool eyɛɛn byɛ wɛn, okɛɛn baal buaal onse byɛ abvool ãtsam me nsie me ndɔɔ yi asɔɔ eluɔ k’emã, Tal a mɛ̃ wa ke ywel àwa bɔ kyɛ. 20 Ke ngwel wɛ, mboo yi ebvɔɔn baal buaal wuo atyel me nkuũ a mɛ̃, mɛ̃ ndi onse bɔ.»