Mateus 25

Mboo a ãnsam m’akaal kuun

1 «Obobɔ, Okwɛn o ywel òkal m’emfa ki: Ãnsam m’akaal kuun áwel ambunda a bɔ me ndɔɔ yi ayemwɛɛn y’ɔ̃baal. 2 Onse bɔ, ataan áli ewool, ataan áli anga-ãyal. 3 B’ewool awel ambunda a bɔ, k’ayɛɛl mbaal wɛ. 4 Kɛn anga-ãyal awel ambunda, ye mbaal mãkyɛ m’ɛ̃langa*25.4 Ɛ̃langa mi bɔ, mi ábuo m’ɔ̃bwɛɛ.. 5 Onge bɛn ɔ̃baal ákeyiil m’oya, ãnsam m’akaal omɔ̃ mbueel twal epuo, bu ayiool me twal. 6 Nkal a kuku, abiool ndiri: "Ɔ̃baal oyi, epal eyeyɔɔ ndɛ!" 7 Obobɔ, ãnsam m’akaal omɔ̃ mbueel ãsiool me twal, bu ãbvi ambunda a bɔ ofaal. 8 B’ewool asɔɔ ol’anga-ãyal ndiri: "Emeewa bee mbaal ã byɛ ãkyɛ, ke ngwel wɛ bee ambunda ayii adzam!" 9 Anga-ãyal abveel bɔ ndiri: "Hɛɛ̃-hɛ̃, k’obobɔ wɛ! Ke ngwel wɛ, mbaal olɔ k’ãkoo me bee ye byɛ wɛ. Eyi ola b’atiɔ mɔ̃, eyesuun mã byam." 10 Kɛn a ŋ’eyii eyi ewool mbaal osuun, ɔ̃baal otɔ. B’áli ye mbaal ã bɔ asam onse mboo yi asa bal, edzoo e nzɔ, bu awɔɔl. 11 Ke mbee oŋɔ̃, ãnsam m’akaal mãkyɛ omɔ̃ ãtɔ hɛ̃, bu ãbiool ndiri: "Mfam, Mfam dzweel bee nzɔ!" 12 Kɛn ɔ̃baal obveel bɔ ndiri: "Taa-taa bam, mɛ̃ eyɛɛn byɛ wɛn, mɛ̃ ke ngyɛɛ byɛ wɛ."» 13 Yeso bu alweel ndiri: «Oŋɔ̃, ekal angɔ-mwiĩ! Ke ngwel wɛ, byɛ k’eyɛɛ tsoo wɛ, k’eyɛɛ lio hɛ̃ wɛ.»