1 Bia-byɛ b’emeewam onse okiool, ebvaan bia-byɛ ekuru ɔ̃kwal ke nkwel okwal o bɛn kɛn awam onse okiool wɛ. Ebee b’edzii bia-byam osa. 2 Yɔɔl kwɛn mbuul bwɛn a mbuul asa b’edzii ngaburu-mbuul, me ndɔɔ obvɛ o ndɛ, kwɛn ndɛ akwel onse okiool. 3 Ke ngwel wɛ, Mãsia k’ábii b’edzii ndyam wɛ. Kɛn ákel ndiri: «Ɛ̃tswɛ mi etoo baal yɛ ɛ̃bvi nkal a mɛ̃✝.» 4 Ke ngwel wɛ, Ɛ̃nkaan mvieel mi ngel mi ákel tsɔɔn, ákel myɛ̃ me ndɔɔ yi awa bia-byɛ ãyal, kwɛn bia-byɛ ekal ye kaã, m’osɛ-mwiĩ y’owɛɛl b’ewa ãndɔɔ ã Nziã. 5 Yɔɔl kwɛn Nziã wu awa osɛ-mwiĩ bvool awɛɛl baal asa kwɛn byɛ ekal y’ɔ̃dzi, m’emfa ki Yeso Mãsia. 6 M’emfa okyɛ, onse ɔ̃dzi bvool ɔ̃nywã ngɔmɔ̃, byɛ elweel Nziã wu Tal a Mfam a bia-byɛ Yeso Mãsia.

7 Obobɔ, eyɔɔ bakyɛ onge b’eyɔɔ Mãsia ndyam byɛ, me ndɔɔ a lweel e Nziã. 8 Ke ngwel wɛ, mɛ̃ eyɛɛn byɛ wɛn, Mãsia oyii ɔ̃sal a Ayuda, me ndɔɔ yi asuo otaa-taa o Nziã, ŋ’esi ndɛ m’éyɛɛn Nziã ol’ankiɔɔn a bɔ ndiri ndɛ asa. 9 Me b’otal baal bɛn k’Ayuda wɛ, bɔ alweel Nziã me ndɔɔ obvɛ o ndɛ, onge b’eyɛɛn Ɔ̃nkaan a Nziã ndiri:

«Obɔ otsɛn bɛn mɛ̃ èlweel yɛ onse baal b’ɛ̃kiri ɛ̃ ɛ̃kyam,

mɛ̃ èyam me ndɔɔ a lweel e nkuũ a yɛ✝.»

10 Ɔ̃nkaan a Nziã bvool oyɛɛn ndiri:

«Byɛ bɛn k’Ayuda wɛ, esia mpaa ye yam e ndɛ✝!»

11 Ndɛ bvool olieel ndiri:

«Byɛ bueel bɛn k’Ayuda wɛ, elweel Mfam,

byɛ b’ãyam mbueel, eyam me ndɔ a ndɛ✝!» 12 Edzayi hɛ̃ olieel bubu:

«Mbuul wa yam e Dzese akieel aya.

Ndɛ akieel atɛɛn me ndɔɔ yi akal y’okwɛn nkal ãyam ãkyam,

ãyam omɔ̃ ãkieel ata kaã me ndɛ✝.»

13 Yɔɔl kwɛn Nziã wu awa kaã aluul byɛ m’opi y’esɛ onse okiool o byɛ. M’emfa okyɛ, byɛ eluul me kaã me mpɛn a Ɔ̃fel wu Ɔ̃nsensal!

14 Andoo, me b’otal byɛ, myam nkiool bam wɛn, byɛ eluul m’ãtsam mã ngesɛ, eluul m’oyɛɛ bueel, bvool ekoo k’ewa bakyɛ ãluo. 15 Kɛn ãlio mãkyɛ, mɛ̃ ke mveel kuul mbee wɛ ŋe nkel mɛ̃ byɛ m’oyeel o byɛ m’eyio byɛ. Mɛ̃ nsi obobɔ, me ndɔɔ a nyiĩ yi esio Nziã mɛ̃. 16 Nyiĩ oyɔ esi kwɛn mɛ̃ nkal ɔ̃sal a Yeso Mãsia me ndɔɔ obvɛ o baal bɛn k’Ayuda wɛ. Mɛ̃ ŋ’ebesa ɔ̃sal wa ngel wu etee Nsia yi Ngesɛ, kwɛn bɛn k’Ayuda wɛ akal onge kab li ekiool Nziã, li esuul Ɔ̃fel wu Ɔ̃nsensal eyii li ngel. 17 Obɔ otsɛn be ndi mɛ̃ y’esɛ onse Yeso Mãsia, m’ɔ̃sal wu ebesa mɛ̃ me ndɔɔ a Nziã. 18 Ke ngwel wɛ, okɛɛn mɛ̃ nkoo k’eyɛɛn ndɔɔ, mɛ̃ eyɛɛn kɛn a b’esi Mãsia me nkuul a mɛ̃, kwɛn bɛn k’Ayuda wɛ alweel Nziã. Ndɛ osi obobɔ m’ãyɛɛn y’ɛ̃sal, 19 m’emvieel y’emwã e waan, bvi me nkuul a waan li Ɔ̃fel a Nziã. Obobɔ, fa Yelusalem tiil nsie yi Ilili, mɛ̃ ntee Nsia yi Ngesɛ yi Mãsia ãmboo mbueel. 20 Mɛ̃ edzii bam k’etee Nsia yi Ngesɛ ke mboo yɛn kɛn atee Mãsia wɛ, kwɛn mɛ̃ mbee otuu nkal ãnkɔɔn ã wukyɛ. 21 Obobɔ, mɛ̃ nsi m’emfa ki eyɛɛn Ɔ̃nkaan a Nziã ndiri:

«Bɛn k’átee ndɛ ola bɔ wɛ akieel amwɛn,

bɛn k’áyoo baal ayɛɛn me ndɔɔ a ndɛ wɛ, akieel akwaal otsɛn✝.»

22 Oyɔ ndɔɔ yi esi kwɛn ãlio bibi akii mɛ̃ k’eyi ola byɛ. 23 Kɛn a meba, mɛ̃ emeeman ɔ̃sal a mɛ̃ onse etswi e nsie obvɛ. Fa mvel bibi, mɛ̃ bam nzii k’eya byɛ otal. 24 Ŋ’ekieel eyi mɛ̃ Esipanye, mɛ̃ ekieel ebwel me li byɛ, mɛ̃ etsam wɛn mɛ̃ olɔ kieel mbɔɔ ola byɛ bvi ndi mɛ̃ ye kɔɔ e bvɛ me ndɔɔ a dzwɛ. Oŋɔ̃ ke mbee esɛ ki nkal mɛ̃ ye byɛ ãtsoo ke kwɛ. 25 Kɛn a meba, mɛ̃ ŋ’eyi Yelusalem, m’owuaal o baal ba ngel b’ali okɔ. 26 Ke ngwel wɛ, akiool ba nsie yi Maseduaan ye yi Akayi adzii k’asa ɔ̃ta m’owuaal b’akiool b’aywal b’ali ke Yelusalem. 27 Ngwanyã, bɔ adzii k’awuaal a bɔ. Ndɔɔ oyɔ al’eyii onge ebiin. Ke ngwel wɛ, akiool b’Ayuda ákab opfel o bɔ b’ɔ̃fel ye bɛn k’Ayuda wɛ, obobɔ ebvaan kwɛn hɛ̃ bɛn k’Ayuda wɛ awa Ayuda opfel o bɔ b’eluɔ. 28 Ŋ’ekieel eman mɛ̃ ndɔɔ oyɔ osa, bvool ewa bɔ ɔ̃ta ondɛ ke nkwel a baal bueel, mɛ̃ ekieel eyi Esipanye me li byɛ. 29 Mɛ̃ ngyɛɛ wɛn ŋ’èya mɛ̃ byɛ otal, mɛ̃ èya y’ondɔɔl o kuɔɔl b’ɔ̃koo b’ofa ola Mãsia. 30 Andoo a dzii, me nkuũ a Mfam a bia-byɛ Yeso Mãsia, ye dzii li ewa Ɔ̃fel, mɛ̃ ngwi byɛ luo wɛn edzwaan mvel ye mɛ̃ ŋ’ebuɛɛn byɛ Nziã me ndɔɔ a mɛ̃. 31 M’emfa okyɛ, mɛ̃ èbvuul me mviɔɔl ɛ̃ baal a Yude bɛn k’akiool Mãsia wɛ, bvool baal ba ngel ba Yelusalem àyɔɔ ɔ̃ta wu ebiri mɛ̃ ɔ̃kwal ngɔmɔ̃. 32 Obobɔ, okɛɛn Nziã odzii, mɛ̃ èya byɛ otal y’esɛ, bvool mɛ̃ èwuun ye byɛ etsi-tsiri. 33 Yɔɔl kwɛn Nziã Nga-opi akal ye byɛ bueel! Amɛn!