1 Obobɔ, bvel li akal Ɔ̃yuda emã, wuo otsɛn b’otsiil o nzuru omã? 2 Bvel eli boo-boo m’ãndɔɔ mbueel. Ke ngwel wɛ, bɔ baal bɛn áwi bɔ ãyɛɛn ã Nziã ŋ’ɛ̃kwel. 3 Obobɔ, okɛɛn baal bakyɛ onse bɔ akwɛɛn k’akuru nzuru me Nziã, ŋ’ekwɛɛn bɔ k’akuru nzuru me Nziã ol’osi kwɛn Nziã akwɛɛn k’asa b’élieel ndɛ ndiri àsa? 4 K’obobɔ bam wɛ! Yɔɔl kwɛn baal ayɛɛ kwɛn Nziã abeyɛɛn otaa-taa, baal ali anga-mfya, onge b’ákel ndiri:

«Ebvaan baal ayɛɛ kwɛn yɛ li dzu onse ãyɛɛn ã yɛ,

bvool yɛ abii ŋ’abva yɛ mbal✝.»

5 Kɛn okɛɛn obi b’esa bia-byɛ osuo kwɛn Nziã oli dzu, oŋɔ̃ bia-byɛ omã oyɛɛn? Ŋɛn Nziã k’ali dzu wɛ, ŋ’ebal ndɛ mpuru ye bia-byɛ? Ke yam, mɛ̃ ŋã eyɛɛn m’emfa ki eyɛɛn baal. 6 K’obobɔ bam wɛ! Ke ngwel wɛ, okɛɛn obobɔ, Nziã ãndɔɔ m’ɔ̃kiri kieel bwɛn-a-bwɛn atsiil mɔ̃? 7 Kɛn okɛɛn mfya a mbuul* esuo kwɛn Nziã bam ayɛɛn otaa-taa, me ndɔɔ a lweel e ndɛ, obobɔ otsɛn omã bvool b’awa mbuul etumbu onge nga-ãbi? 8 Al’ekoo m’oyɛɛn wɛn: «Bia-byɛ esa obi, kwɛn obvɛ opal onse oŋɔ̃!» Anga-kwee b’abeburu bia-byɛ ãndɔɔ omɔ̃. Anga-kwee obɔ abvaan abɔɔ etumbu.

9 Oŋɔ̃ omã eyɛɛn? Bee b’Ayuda, enduru bɛn k’Ayuda wɛ? K’obobɔ bam wɛ! Ke ngwel wɛ, bee emeesuo wɛn Ayuda ye bɛn k’Ayuda wɛ, bueel ali ke nsɛn okwɛn b’obi, 10 onge b’ákel ndiri:

«Mbuul wa dzu pyɛ, onkyam ngɔmɔ̃ pyɛ. 11 Nga-ãyal pyɛ, onkyam ngɔmɔ̃ wu abii Nziã k’ali wɛ.

12 Bɔ bueel adzɛɛn nkuul, ekuu emɔ̃ adziɔɔn,

ngɔmɔ̃ wu asa obvɛ pyɛ,

onkyam ngɔmɔ̃ ndyam pyɛ.

13 Ngwɔɔn-a-bwel a bɔ oli onge mpiɛɛn yi ekal,

elam e bɔ li abepfuru baal,

Ebwel e bɔ eli y’ɔ̃twɔɔ a mpel.

14 Ɔ̃nywã a bɔ oluul m’obwel o baal enkɛɛ ye nkaa.

15 Ntaã e bɔ eli yɛɛ m’oyetsal b’ãkel.

16 Bɔ abesiil obiil ye fool m’ãmboo mbueel m’ebwel bɔ.

17 Nkuul yi opi, bɔ k’ayɛɛ yɔ wɛ.

18 Obal o Nziã k’oli ke nkwel a bɔ wɛ✝.»

19 Ŋ’esa oŋɔ̃, bia-byɛ eyɛɛ wɛn mbueel m’eyɛɛn Ngel, yɔ eyɛɛn mɔ̃ me baal b’ali ke nsɛn a Ngel, kwɛn ɔ̃nywã wueel akal embob, bvool kwɛn ɔ̃kiri wueel abva m’ɔ̃dzoo ke mviil ã Nziã. 20 Ke ngwel wɛ, mbuul si ngɔmɔ̃ kieel k’akal dzu m’ɛ̃sal ɛ̃ Ngel wɛ, me ndɔɔ yɛn, ndɔɔ yi esa Ngel, kɛn a yɛn baal ayɛɛ obi.

21 Kɛn a meba, Nziã osuul bia-byɛ dzu, onge b’etsweel ɛ̃nkaan ɛ̃ Ngel ye mi aliaal-ɛ̃kiɛɛn a Nziã. Ndɛ k’abwel me Ngel wɛ. 22 Nziã osuul baal bueel dzu ŋ’elɔ bɔ okiool onse Yeso Mãsia. Ke ngwel wɛ okam k’oli onse baal wɛ. 23 Ke ngwel wɛ, baal bueel asi obi, bu asyel lala ye lweel e Nziã. 24 Kɛn a Nziã me nyiĩ a ndɛ osuul bɔ dzu ngwel, m’obvuul b’ebvuul ndɛ bɔ me nkuul a Yeso Mãsia. 25 Ndɛ wu éwi Nziã onge kab me ndɔɔ yi adzeel ãbi m’ãkel ã ndɛ, me nkuul a okiool. M’emfa okyɛ, Nziã osuo kwɛn ndɛ oli dzu, ke ngwel wɛ ndɛ k’áwi baal b’ási obi tsɔɔn-tsɔɔn etumbu wɛ, 26 m’osɛ-mwiĩ o ndɛ. Ndɛ ádzii k’asuo kwɛn ndɛ oli dzu me lio li, me ndɔɔ yi akal dzu, ŋ’esuul ndɛ mbuul wu olɔ okiool onse Yeso dzu.

27 Obobɔ, ndɔɔ yi abɛɛl ntwel me yɔ bvool eli? Hɛɛ̃-hɛ̃, ambaal yɔ! Ambaal yɔ me ngel yɛn? Me ngel yi ɛ̃sal? Hɛɛ̃-hɛ̃! Me ngel yi okiool. 28 Ke ngwel wɛ, bee emwɛn wɛn, mbuul akal dzu m’okiool o ndɛ, ke me ndɔɔ ɛ̃sal ɛ̃ Ngel wɛ. 29 Nziã oli kɛn a Nziã a Ayuda? Ndɛ k’ali hɛ̃ wa baal bɛn k’Ayuda wɛ wɛ? Ngwanyã, ndɛ oli hɛ̃ Nziã a baal b’ɛ̃kiri ɛ̃nkyam. 30 Onge bɛn Nziã oli kɛn a ngɔmɔ̃, ndɛ wu asuul baal b’átsiil dzu m’okiool o bɔ, bvool wu asuul bɛn k’átsiil wɛ dzu me nkuul okiool o bɔ hɛ̃. 31 Obobɔ, bia-byɛ ebam Ngel me nkuul a okiool? K’obobɔ bam wɛ! Bia-byɛ Ngel bvɛɛ ewa.