1 Ŋ'ekoo tsoo li pfuun li Pantekot*, akiool bueel abvɔɔn mboo ngamɔ̃. 2 Enseel oŋɔ̃, nkyal yɛn onge mfel wa kokɔ yi efi ywel, ekɔɔn me nzɔ yueel yi éli bɔ me nsɛn. 3 Obobɔ, eluɔ onge ndam e mbaa epal, ekab nzuru, ebvi nkal ngɔmɔ̃-ngɔmɔ̃ onse bɔ. 4 Bɔ bueel aluul m'Ɔ̃fel wu Ɔ̃nsensal, bu abvi ɛ̃nywã ɛ̃kyam oyɛɛn, m'emfa ki éketam Ɔ̃fel bɔ oyɛɛn.

5 Onkyel ŋ'esa oŋɔ̃, Ayuda b'ákuru nzuru me Nziã, b'áfi m'ɛ̃kiri ɛ̃ nsie mvieel, ákekal ke Yelusalem. 6 Ŋ'eyoo bɔ nkyal oyɔ, ekiin ebvi onse bɔ, bɔ akam bibi, ke ngwel wɛ mbuul mbwɛn a mbuul ákeyoo ŋ'ékeyɛɛn bɔ ɔ̃nywã a ndɛ wu ola. 7 Ebangɛɛ y'ɛ̃kam ɛ̃si bɔ. Bɔ bu ayɛɛn bam-a-bam ndiri: «Baal b'ayɛɛn ba k'Afi-Ngalile wɛ? 8 Ndɔɔ mã yɛn mbuul bwɛn a mbuul onse bia-byɛ ayoo k'eyɛɛn bɔ ɔ̃nywã a ndyam wu ola? 9 Bia-byɛ eli Afi-Palat, Afi-Mede, Afi-Elam, bia-byɛ ekal ke nsie yi Medzopotame, yi Yude, yi Kapados, yi Ponte, y'Adzi, 10 yi Filidzi, yi Pamfili, yi Edzipito, yi Libi yi eli tsotsoo a Silɛn, y'Afi-Lom. 11 Bia-byɛ bueel ŋã, bɛn Ayuda b'emburu-ngoo, bɛn b'ɛ̃kiri ɛ̃kyam b'akiool onkɔɔ b'Ayuda, bɛn Afi-Kelet, bɛn Afi-Alabi, kwɛn ŋɛn mbuul bwɛn a mbuul onse bia-byɛ ayoo k'eyɛɛn bɔ ãndɔɔ m'ɛ̃kam m'esi Nziã, onse ɔ̃nywã a ndɛ wu ola!» 12 Bɔ bueel aluul m'ɛ̃kam bvool ãyal ãfi. Bɔ ákeyɛɛn bam-a-bam ndiri: «Otsɛn o ndɔɔ yi omã?» 13 Kɛn a baal bakyɛ ákesɔɔl akiool ndiri: «Bɔ oŋɔ̃ mbal ãbɔɔ bɔ mam!»

14 Obobɔ, Piɛɛl otɛɛn y'antam kuun y'ɔ̃mɔ̃, ondɛɛl nkii, bu alieel baal bubu: «Byɛ b'Afi-Yude ye byɛ bueel b'ekal ke Yelusalem, epio ãtswi, eyoo ãyɛɛn ã mɛ̃, bvool ekwaal otsɛn o m'ãbwel! 15 Baal ba mbal k'ãbɔɔ onge b'etsam byɛ wɛ, ke ngwel wɛ bia-byɛ ŋã kɛn eli me lio li bva li epal. 16 Kɛn a ŋã, ŋ'asi ãndɔɔ m'élieel Dzowel wu ɔ̃liaal-ɛ̃kiɛɛn a Nziã, ndiri:

17 Nziã oyɛɛn bubu: "M'ãtsoo ã tɔ,

mɛ̃ ekieel esa kwɛn Ɔ̃fel a mɛ̃ akɔɔn me baal bueel,

baan a byɛ b'abɔɔl ye b'akaal akieel ayɛɛn ãndɔɔ m'ãfa ola mɛ̃,

ãnsanga ã byɛ ãkieel ãkal y'emwɛn,

ekukwel e byɛ ekieel eluaal ãnduaal.

18 Taa-taa bam, m'ãtsoo omɔ̃, mɛ̃ ekieel esa kwɛn Ɔ̃fel a mɛ̃ akɔɔn m'asal a mɛ̃, ekal b'abɔɔl, ekal b'akaal,

bɔ akieel ayɛɛn ãndɔɔ m'ãfa ola mɛ̃.

19 Mɛ̃ ekieel esa ãndɔɔ m'ɛ̃kam ke ywel,

mɛ̃ hɛ̃ ekieel esa eliĩ me nsie.

Ekieel ekal y'ãkel, ye mbaa, ye yoo.

20 Tal ekieel ekɔɔl empeel,

nswii akieel akɔɔl ãkel,

tiil ye k'ekoo tsoo e Mfam, tsoo e ndɛ li enɛn, tsoo e ndɛ li omfam.

21 M'emfa okyɛ, mbuul ndyam wueel wu akieel ata Mfam mbel akieel abvuul."

22 Byɛ baal b'Isalayel, eyoo ãyɛɛn mã: Byɛ eyɛɛ ngesɛ wɛn Yeso wa Nadzalet oli mbuul wɛn me nkuul a ndɛ, Nziã osi emvieel, y'emwã y'eliĩ onse byɛ. Ãndɔɔ omɔ̃ ãsuo byɛ kwɛn Yeso ofi ola Nziã. 23 Mbuul ondɛ, átiɔ byɛ ndɛ. Nziã áyɛɛ ndɔɔ oyɔ bam ŋ'ɛ̃kwel, bvool áwɛɛ yɔ. Byɛ embaal ndɛ m'ɔ̃kiri ŋ'ebɛɛl byɛ ndɛ m'enkulusu me nkuul a baal bɛn k'ayɛɛ Nziã wɛ. 24 Kɛn a Nziã oseel ndɛ, bu apaal ndɛ onse mpal a epfu, ke ngwel wɛ epfu ale k'ekoo m'obvel ndɛ mpɛn wɛ. 25 Nzal-a-ŋɛn David áyɛɛn me ndɔɔ a Yeso bubu:

"Mɛ̃ ékemwɛn Mfam Nziã ãlio mbueel ke nkwel a mɛ̃,

ke ngwel wɛ ndɛ oli me kuɔɔl e mɛ̃ ki elam, kwɛn mɛ̃ mbee otiɔɔl.

26 Obɔ otsɛn bɛn ɔ̃kwal a mɛ̃ oluul m'esɛ,

ãyɛɛn ã mɛ̃ ãli m'osia mpaa.

Nzuru a mɛ̃ ekieel ewuun onse kaã.

27 Ke ngwel wɛ, yɛ kieel k'ayiri mɛ̃ k'ola o b'ákwi-ákwi wɛ,

yɛ kieel k'asuul kwɛn mɛ̃ wu nkuru nzuru me yɛ mbwal onse mpiɛɛn wɛ.

28 Yɛ suo mɛ̃ ãnkuul m'elaã,

Yɛ akieel aluul mɛ̃ m'esɛ ke nkwel a yɛ."

29 Baan-ngoo a mɛ̃, emeeyɔɔl mɛ̃ mengyɛɛn byɛ bam kal-a-kal bubu: Nkiɔɔn a bia-byɛ David ákwi, ádziool ndɛ, mpiɛɛn a ndɛ eli kɛn ola bia-byɛ tiil nonɔ̃ ŋã. 30 Onge bɛn ndɛ áli ɔ̃liaal-ɛ̃kiɛɛn a Nziã, ndɛ áyɛɛ kwɛn Nziã álab ndɛ ɔ̃kyel wɛn ndɛ akieel amviaal ngɔmɔ̃ onse atiɔɔl a ndɛ nsɛn nkal a kiri e ndɛ li okwɛn. 31 David ŋ'ámwɛn ŋ'ɛ̃kwel osiool o Mãsia, ndɛ bu ayɛɛn me ndɔɔ a ndɛ ndiri k'áyiri ndɛ k'ola o b'ákwi-ákwi wɛ, nzuru a ndɛ k'ébwel onse mpiɛɛn wɛ.

32 Yeso ondɛ, Nziã aseel ndɛ, bia-byɛ bueel emwɛn ndɔɔ oyɔ. 33 Andɛɛl ndɛ me ndɔɔ yi akal me kuɔɔl e Nziã ki elam. Me ba ŋã, ndɛ oyɔɔ Ɔ̃fel wu Ɔ̃nsensal wu éwi Taal lɔɔ, ndɛ bu asi kwɛn ndɛ okɔɔn me bee, onge b'emwɛn byɛ, onge b'eyoo byɛ. 34 Ke ngwel wɛ, k'eli David mbuul wu oyɛn ywel wɛ, kɛn a ndyam oyɛɛn bubu:

"Mfam Nziã olieel Mfam a mɛ̃ bubu:

Bva nsɛn me kuɔɔl e mɛ̃ ki elam,

35 tiil ye k'esa mɛ̃ kwɛn yɛ dziaal ataal a yɛ m'odziaal."

36 Yɔɔl kwɛn yam li Isalayel lueel eyɛɛ ngesɛ bubu: Yeso wu ébɛɛl byɛ m'enkulusu ondɛ, Nziã osuul ndɛ Mfam, bvool osuul ndɛ Mãsia!»

37 Ŋ'eyoo baal ãndɔɔ omɔ̃, bɔ ɛ̃kwal ɛ̃dzueel, bɔ bu afuul Piɛɛl y'antam bakyɛ bubu: «Baan-ngoo, bee eyii bwɛn esa?» 38 Piɛɛl obveel bɔ bubu: «Ekaal ɛ̃kwal ɛ̃ byɛ, bvool yɔɔl kwɛn mbuul bwɛn a mbuul onse byɛ awal opongo me nkuũ a Yeso Mãsia. M'emfa okyɛ, Nziã àdzeel ãbi ã byɛ, bvool àwa byɛ Ɔ̃fel wu Ɔ̃nsensal. 39 Ke ngwel wɛ, lɔɔ eli li byɛ, li baan a byɛ, li atiɔɔl a byɛ, ye baal bueel b'ali lela, b'ekieel eta Mfam wu Nziã a bia-byɛ mbel.»

40 Piɛɛl bvool olieel ãndɔɔ ãkyam bibi, me ndɔɔ yi awa bɔ mpɛn, bvool yi asa kwɛn bɔ akiool. Ndɛ olieel bɔ bubu: «Epal onse baal b'abi-abi ba nonɔ̃ ba.» 41 Baal b'akiool m'eyɛɛn Piɛɛl awel opongo. Tsoo olɔ, baal nku-a-nku amiil atyel (3.000) akool onse akiool ba tsɔɔn.

42 Akiool k'ákeywɛn k'anɔɔn ãndɔɔ m'ékeyiool antam wɛ, k'ákeywɛn k'akal mboo mɔ̃ me dzii e Nziã wɛ, k'ákeywɛn k'adza ɔ̃laan a Mfam mboo mɔ̃ wɛ, k'ákeywɛn k'abuɛɛn mboo mɔ̃ wɛ. 43 Antam ákesa ãndɔɔ m'ɛ̃kam y'emvieel bibi, obobɔ baal áli ye buɔ bibi. 44 Akiool bueel áli mboo mɔ̃, eluɔ bvieel bvi éli a bɔ éli bvoo. 45 Bɔ áketiɔ ãnsie ã bɔ, y'eluɔ bvi éli a bɔ. Bɔ bueel ákekab nzi yi ékebɔɔ bɔ, ákewa mbuul bwɛn a mbuul m'emfa e kɔɔ e ndɛ. 46 Tsoo bwɛn a tsoo, bɔ ákemwɛɛn kɛn omwɛɛn ke Nzɔ a Nziã ãtsam ngãmɔ̃, bɔ ákedza ɔ̃laan a Mfam mboo mɔ̃, bvool ákedza mboo mɔ̃ k'ãnzɔ ã bɔ y'esɛ, ondɛɛl o nzuru pyɛ. 47 Bɔ ákelweel Nziã, baal bueel ákedzii bɔ. Obobɔ, tsoo bwɛn a tsoo Mfam ákelweel nkel a bɔ akiool.