Ɛ̃SAL 11

Ke Yelusalem, Piɛɛl owi otsɛn o ndɔɔ yi ési ndɛ

1 Antam y’andoo b’áli ke Yude ayoo nsia ndiri baal bɛn k’Ayuda wɛ ayɔɔ Endɔɔ e Nziã. 2 Me lio li ebvool Piɛɛl Yelusalem, akiool b’áli Ayuda awi ndɛ mbyel. 3 Bɔ alieel ndɛ bubu: «Yɛ ye sam ola baal bɛn k’átsiil wɛ, bvool dzi ye bɔ!» 4 Obobɔ, Piɛɛl obvi bɔ ãndɔɔ m’ãbwel oyɛɛn m’ɔ̃mɔ̃-ɔ̃mɔ̃, m’emfa ki: 5 «Mɛ̃ eli ke bviil li Dzope. Me lio li ekebuɛɛn mɛ̃, mɛ̃ Ɔ̃fel osiin, bu mbɔɔ emwɛn li: Mɛ̃ mwɛn eluɔ ngemɔ̃ onge ekɔ ki enɛn ki asiin m’ãnswɛ ãnge-ãnã esool fa ywel tiil ola mɛ̃. 6 Ŋe ntal mɛ̃ ngesɛ, onse mwiĩ a eluɔ okyɛ, eli y’anyam b’emfa bwɛn emfa b’edzwa ye b’ola, ye b’adzuu me bal-a-bal, y’anywɛn. 7 Mɛ̃ ngyoo nkii ngamɔ̃ elieel mɛ̃ bubu: "Piɛɛl, tɛɛn, bam bvool dza!" 8 Mɛ̃ mveel wɛn: "Hɛɛ̃-hɛ̃, Mfam! Lɔɔ-okal, mɛ̃ kɛn a nzi eluɔ ki eluo ngel a Ayuda, ki ye mbiin wɛ." 9 Nkii eyɛɛn mɛ̃ fa ywel nsa yi yuaal ndiri: "Eluɔ ki elieel Nziã ndiri eli tsɛtsɛ, oyɛɛ ke wal kyɛ onge ki ye mbiin wɛ." 10 Esi obobɔ nsa tyel. Ke mbee oŋɔ̃, andɛɛl eluɔ okyɛ eyɛn ywel. 11 Kɛn a me lio olɔ, abɔɔl atyel atɔ ke nzɔ yi éli bee. Bɔ áfi Sedzale, bvool átam bɔ ola mɛ̃. 12 Ɔ̃fel a Nziã olieel mɛ̃ ndiri mɛ̃ ngyi ye bɔ, mbee ãnkɛn osa. Andoo ange-asɛɛn ba, ayesuul mɛ̃, bee esam onse nzɔ a Kooneye. 13 Ndɛ olieel bee emfa ki emwɛn ndɛ ãnzwel ãpal ola ndɛ, bu ãyɛɛn ndɛ ndiri: "Tam Simɔ̃ wu abeta me Piɛɛl mbel ota ke Dzope. 14 Ndɛ mbuul wu ayɛɛn yɛ ãndɔɔ m’ãbvuul yɛ ye baal a nzɔ a yɛ bam bueel." 15 Ŋe mvi mɛ̃ oyɛɛn, Ɔ̃fel wu Ɔ̃nsensal osool nkal a bɔ, kɛn a m’emfa ki ésool ndɛ nkal a bia-byɛ k’obɛɛn. 16 Obobɔ, mɛ̃ ngyeel ndɔɔ yi éyɛɛn Mfam bia-byɛ ndiri: "Dzaã áwi baal opongo b’ãdza, kɛn a byɛ, byɛ èwal opongo b’Ɔ̃fel wu Ɔ̃nsensal✝11.16 Ɛ̃sa 1.5." 17 M’emfa okyɛ, okɛɛn Nziã owi bɔ ekab lili li éwi ndɛ bia-byɛ hɛ̃ ŋ’ékiool bia-byɛ Mfam Yeso Mãsia, bɛn mɛ̃ ndyam nã ndi wu ekeeluo Nziã k’asa b’edzii ndɛ?» 18 Ke mbee a ŋ’eyoo bɔ ãndɔɔ omɔ̃, bɔ aweel pi, bvool bu abvi Nziã olweel, ndiri: «Taa-taa bam, Nziã hɛ̃ osuo baal bɛn k’Ayuda wɛ nkuul yi akaal ɛ̃kwal, me ndɔɔ yɛn bɔ abɔɔ elaã li ɔ̃bu nkal ɔ̃bu!»

Ebvɔɔn li Antioswe

19 Ãmpal m’áketuaal akiool me lio li ábam Etyɛn, ãsi kwɛn bɔ atsɔɔn m’ãmboo m’ãmboo. Bɔ ayɛn tiil ke Fenisi, ye Swipele k’Antioswe. Bɔ áketee Endɔɔ e Nziã kɛn ol’Ayuda. 20 Ŋ’esa oŋɔ̃, akiool bakyɛ onse bɔ b’áli Afi-Swipele ye Silɛn, ayɛn Antioswe, ayeyɛɛn hɛ̃ ye baal bɛn k’Ayuda wɛ, bvool ayetsal bɔ Nsia yi Ngesɛ yi Mfam Yeso. 21 Waan e Mfam éli ye bɔ. Obobɔ, baal bibi akaal ɛ̃kwal, bu ayii akiool a Mfam. 22 Nsia a bɔ ebvi m’ãtswi m’akiool b’Ebvɔɔn li Yelusalem. Bɔ bu ayuɔɔl Balanabas k’Antioswe. 23 Ŋ’etɔ ndɛ bvool omwɛn emfa ki esal nyiĩ a Nziã yi enɛn onse bɔ, esi ndɛ esɛ. Ndɛ owi bɔ bam bueel mpɛn yi akuru nzuru me Mfam ɔ̃kwal ngɔmɔ̃. 24 Ke ngwel wɛ, Balanabas áli mbuul wa ngesɛ, wu áluul m’Ɔ̃fel wu Ɔ̃nsensal y’okiool. M’emfa okyɛ, baal bibi akuru nzuru me Mfam.

25 Ke mbee oŋɔ̃, Balanabas oyebii Sol ke Taase. 26 Ŋ’emwɛn Balanabas Sol, ndɛ oyi ye ndɛ k’Antioswe. Bɔ asi mvel ɔ̃tsiin onse Ebvɔɔn m’ɔ̃sal y’oyiool o baal bam bibi. K’Antioswe okɔ ku áti ayio nsa yi ɛ̃kwel m’akilisito. 27 M’ãtsoo omɔ̃, aliaal-ɛ̃kiɛɛn a Nziã afi Yelusalem ayɛn Antioswe. 28 Ngɔmɔ̃ onse bɔ wɛn nkuũ Agabus, otɛɛn bu alieel m’Ɔ̃fel ndiri ɔ̃lɔɔ àyesam m’ɔ̃kiri a nsie ndyam wueel. Ɔ̃lɔɔ ondɛ áyi me lio li éli Kolode ɔ̃kwɛn wu ɔ̃nɛn wa Lom. 29 Obobɔ, ayio k’Antioswe akuru kwɛn mbuul bwɛn a mbuul, m’emfa ki obɔɔ o ndɛ, ayuɔɔl wuaal ol’andoo ba Yude. 30 Bɔ asi obobɔ. Bɔ ayuɔɔl wuaal olɔ ol’akuul-kuul b’Ebvɔɔn, me mviɔɔl ɛ̃ Balanabas ye Sol.