1 Mfam Tehofile, onse ɔ̃nkaan a mɛ̃ wu ɛ̃kwel mɛ̃ éti ɔ̃sam wu ãndɔɔ m'ébɛɛn Yeso osa ye m'éyiool ndɛ, 2 tiil tsoo li éyɛn ndɛ ywel. Ye k'eyi ndɛ okɔ, me mpɛn a Ɔ̃fel wu Ɔ̃nsensal, ndɛ olieel antam b'ésueel ndɛ ãndɔɔ m'àsa. 3 Ke mbee epfu e ndɛ, ndɛ opal ola bɔ m'omwiĩ, bu asuo bɔ m'emfa bibi kwɛn ndɛ osiool. Ndɛ opal ola bɔ ãtsoo ãku-ãnã, olieel bɔ ãndɔɔ m'Okwɛn o Nziã. 4 Tsoo ngelemɔ̃, ŋ'ébvɔɔn ndɛ ye bɔ, ndɛ owi bɔ ngel yi: «Ebee ombal ke Yelusalem, kɛn a byɛ èkiaal tiil ye k'ewa Taal kab li éwi ndɛ lɔɔ, onge b'élieel mɛ̃ byɛ. 5 Ke ngwel wɛ, Dzaã áwi baal opongo b'ãdza, kɛn a byɛ, ke mbee ãtsoo ke kwɛ, byɛ èwal opongo b'Ɔ̃fel wu Ɔ̃nsensal.»

6 Baal b'ábvɔɔn afuul Yeso bubu: «Mfam, li lio li èbveel yɛ okwɛn me mviɔɔl ɛ̃ baal b'Isalayel?»

7 Ndɛ obveel bɔ bubu: «K'awi byɛ nkuul yi eyɛɛ ãlio y'ãtal m'éwɛɛ Taal ãndɔɔ osa m'okwɛn o ndyam wɛ. 8 Kɛn a ŋ'ekieel esool Ɔ̃fel wu Ɔ̃nsensal nkal a byɛ, byɛ èbɔɔ mpɛn, obobɔ byɛ èyɛɛn me ndɔɔ a mɛ̃ ke Yelusalem, ke nsie yueel yi Yude, ke Samali, tiil ke ntɔ a ɔ̃kiri.»

9 Ke mbee ãyɛɛn omɔ̃, andɛɛl Yeso oyɛn ywel me lio li éketal bɔ ndɛ, epɛn efoo ndɛ ke mviil ã bɔ. 10 Bɔ áketal ywel kɛn yuul, me lio li ékeyi ndɛ. Pfa, abɔɔl buaal apal tsotsoo ye bɔ m'ekɔ bvi afuu-fuu. 11 Baal obɔ alieel bubu: «Afi-Ngalile, ki ekɛɛn byɛ oŋɔ̃ ebetal ywel yuul emã? Yeso wu abiri ywel ke mviil ã byɛ wu, akieel ayebvool kɛn a m'emfa kiki ki emwɛn byɛ ndɛ oyɛn ywel.»

12 Antam bu ambal nkio yi ata me nkio a ɛ̃ti mi Olibve, bu abvool Yelusalem. Nkio oyɔ eli tsotsoo ye Yelusalem, nku-a-nku a kilometele ngɔmɔ̃. 13 Ŋ'ekɔɔl bɔ, bɔ anɔɔn k'etswi e nzɔ ki ke ywel, ke mboo yi ékekal bɔ tsɔɔn. Ãnkuũ ã bɔ ã́li mã: Piɛɛl, Dzaã, Dzak, Andele, Filipe, Toma, Baatelemi, Matie, Dzak wu muaan a Alefe, Simɔ̃ wu áketa hɛ̃ me Dzelot*, ye Yuda wu muaan a Dzak. 14 Ãtsoo mbueel, bɔ ákebvɔɔn m'obuɛɛn, y'akaal ke kwɛ, ye Mali wu ngoo a Yeso, ye baan-ngoo a Yeso.

15 M'ãtsoo omɔ̃, akiool onse ab'ɔ̃nkam y'ãku-mbuaal (120) abvɔɔn. Piɛɛl ayetɛɛn onse bɔ, obvi oyɛɛn bubu: 16 «Baan-ngoo a mɛ̃, ebvaan kwɛn asa ãndɔɔ m'élieel Ɔ̃fel wu Ɔ̃nsensal onse Ɔ̃nkaan a Nziã m'ɔ̃nywã a David, me ndɔɔ a Yuda. Ndɛ wu Yuda áli mbiri a b'asiin Yeso. 17 Ndɛ áli ngɔmɔ̃ onse bia-byɛ, bvool áli y'ɔ̃sal wu áwi ndɛ osa onge bia-byɛ. 18 – Me nzi yi afuru ndɛ m'obi b'esi ndɛ, ndɛ osuun nsie. Ndɛ obvi ɔ̃tswɛ ke nsie oŋɔ̃, ɔ̃la obɔɔl, ɛ̃la ɛ̃ mwiĩ mvieel bu ɛ̃tsɔɔn me nsie. 19 Baal a Yelusalem bueel ayɛɛ ndɔɔ oyɔ. Obobɔ, bɔ aloo nsie oyɔ m'ɔ̃nywã a bɔ m'Hakeledama, ŋ'ayɛɛn ndiri "nsie a ãkel"*.– 20 Ŋ'esa oŋɔ̃, ákel onse ɔ̃nkaan wu Ãnziĩ ndiri:

"Yɔɔl kwɛn mboo a ndɛ ekal ndii,

mbuul si ngɔmɔ̃ abee ke yɔ okal",

Bvool ndiri

"Yɔɔl kwɛn mbuul ɔ̃kyam awal ɔ̃sal a ndɛ✝."

21 Obobɔ, ebvaan kwɛn bia-byɛ esuaal mbuul ngɔmɔ̃ onse baal b'ákedzuu ye bia-byɛ, me lio lueel li ékebiri Mfam Yeso bia-byɛ m'ɔ̃kiri wueel, 22 bɛɛn ŋ'éwi Dzaã ndɛ opongo, tiil ŋ'ábiri ndɛ ke ywel. M'emfa okyɛ, mbuul ondɛ àyɛɛn me ndɔɔ osiool o Yeso ye bia-byɛ.»

23 Bɔ asuo baal ange-buaal ba: Dzedzef wu ata hɛ̃ me Balasabas, wu aloo me Dzusitus, ye Matias. 24 Bɔ abuɛɛn bubu: «Mfam, yɛ wu yɛɛ ɛ̃kwal ɛ̃ baal bueel, suo bee wu esueel yɛ onse baal ba ange-buaal, 25 kwɛn onse ɔ̃sal wu ontam wu, ndɛ akiri mboo a Yuda yi esiil ndɛ me ndɔɔ yi ayi ke mboo yi ebvaan me ndɛ.» 26 Bɔ ati ebie, lɔ ebvi me Matias. Bɔ bu alɔ ndɛ onse nkel a antam kuun y'ɔ̃mɔ̃.