Ɛ̃SAL 25

Pool osɔɔ kwɛn abiri ndɔɔ a ndɛ ola Sedzaal

1 Ãtsoo ãtyel ke mbee a ŋ’ewel Fesitus omfam, ndɛ ombal Sedzale, oyɛn Yelusalem. 2 Okɔ, amfam b’angaa-a-Nziã y’amfam b’Ayuda ayebva Pool mbal ola ndɛ. Bɔ asi ɔ̃tɛɛ̃, 3 m’obesɔɔ kwɛn ndɛ asio bɔ nyiĩ yi ayɔɔl Pool aya Yelusalem. Bɔ ákekuru k’abva ndɛ edzel, kwɛn abam ndɛ me nkuul. 4 Kɛn a Fesitus obveel bɔ ndiri Pool oli me bwal ke Sedzale, bvool ndiri ndyam hɛ̃ ŋ’asa akɔɔl okɔ. 5 Ndɛ olweel bubu: «Yɔɔl kwɛn amfam a byɛ ayi Sedzale ye mɛ̃, kwɛn okɛɛn mbuul wu asi ndɔɔ yi mbi, bɔ ayefɛn ndɛ.» 6 Fesitus k’asi ãtsoo ãnduru mpuɔ̃ wuo kuun ke Yelusalem wɛ, bu ayebvool Sedzale. Ela esiool, ndɛ obvi nsɛn ke mbal, bu atam Pool owal. 7 Ŋ’etɔ ndɛ, Ayuda b’áfi Yelusalem adzii ndɛ, bu abvi ãbuu oliaal ndiri ndɛ opwee etsob bibi, kɛn a bɔ k’ákekoo k’asuo otaa-taa b’ãndɔɔ omɔ̃ wɛ. 8 Kɛn a Pool olieel buu li ndɛ bubu: «Mɛ̃ ke nsi obi si omɔ̃ wɛ, ekal me ngel a Ayuda, ekal me Nzɔ a Nziã, ekal m’ɔ̃kwɛn wu ɔ̃nɛn Sedzaal.»

9 Onge bɛn Fesitus ákedzii k’asa Ayuda b’áli oŋɔ̃ esɛ, ndɛ ofuul Pool ndiri: «Yɛ dzii k’ayi Yelusalem kwɛn atsiil ndɔɔ a yɛ yi ke nkwel a mɛ̃?» 10 Pool obveel ndiri: «Mɛ̃ ŋã ndi ke mbal yi me nsie a Sedzaal, yi mboo yi atsiil ndɔɔ a mɛ̃. Onge b’eyɛɛ yam bam ngesɛ, mɛ̃ ke nsi Ayuda ndɔɔ yi mbi wɛ. 11 Okɛɛn mɛ̃ nsi obi, bvool okɛɛn mɛ̃ nsi ndɔɔ mbi pyɛ yɛn obvie abam mɛ̃, mɛ̃ ke mbee k’ekwa wɛ. Kɛn okɛɛn otaa-taa k’oli onse ãbuu m’elieel bɔ me mɛ̃ wɛ, ãngel ã Lom k’ãwa mbuul nkuul yi awa mɛ̃ me mviɔɔl ɛ̃ bɔ wɛ. Yɔɔl kwɛn ɔ̃kwɛn wu ɔ̃nɛn atal ndɔɔ a mɛ̃.» 12 Obobɔ, Fesitus ayekuru mfoo y’antwel a ndɛ, obveel Pool bubu: «Yɛ sɔɔ kwɛn abiri ndɔɔ a yɛ ola Sedzaal, yɛ ŋ’àyi ola ndɛ.»

Pool ke nkwel Agilipa ye Belenise

13 Ke mbee ãtsoo ke kwɛ, ɔ̃kwɛn Agilipa ye nkyel a ndɛ Belenise ayi Sedzale me ndɔɔ yi abio Fesitus. 14 Onge bɛn bɔ ákesa ãtsoo bibi oŋɔ̃, Fesitus olieel ɔ̃kwɛn ndɔɔ a Pool ndiri: «Ŋã eli ye mbuul wu ésiil Felikese onse bwal. 15 Ŋ’éyɛn mɛ̃ Yelusalem, amfam b’angaa-a-Nziã y’akuul-kuul b’Ayuda ábvi ndɛ mbal bvool ásɔɔ kwɛn mɛ̃ ngwa ndɛ etumbu. 16 Mɛ̃ ébveel bɔ wɛn ãngel m’Afi-Lom k’ãwa nkuul yi awa mbuul me mviɔɔl ɛ̃ b’abvi ndɛ mbal wɛ. Ŋ’ɛ̃kwel kɛn, ebvaan ndɛ ayoo buu e b’afɛn ndɛ ke mbal. Oŋɔ̃, ndɛ fi abetsuun ye bɔ. 17 Obobɔ, bɔ ayi ŋã ye mɛ̃. Onge bɛn mɛ̃ k’édzii k’esiaal ãndɔɔ lela wɛ, ela esiool, mɛ̃ mvi nsɛn ke mbal, bu ntam mbuul ondɛ owal. 18 Ŋ’éyi b’ábvi ndɛ mbal, bɔ k’ásuo ãndɔɔ m’ãbi m’éketsam mɛ̃ wɛn ndɛ owɛɛl ási wɛ. 19 Bɔ áketsuun kɛn a me ndɔɔ onziã o bam bvool me ndɔɔ a mbuul ngɔmɔ̃ wɛn nkuũ Yeso wu ákwi, kɛn a Pool abeyɛɛn ndiri ndɛ oli mwiĩ. 20 Me b’otal mɛ̃, mɛ̃ mbii ãyal m’etsiil ndɔɔ yi obobɔ okwɛɛn. Obɔ otsɛn bɛn mɛ̃ ngyɛɛn Pool ndiri ayi Yelusalem kwɛn atsiil ndɔɔ a ndɛ okɔ. 21 Kɛn a ndɛ ásɔɔ kwɛn ɔ̃kwɛn wu ɔ̃nɛn Sedzaal atsiil ndɔɔ a ndɛ. Mɛ̃ bu ntam kwɛn asuul ndɛ kɛn akal onse bwal me muaan-lio, ye k’eyuɔɔl mɛ̃ ndɛ ola Sedzaal.» 22 Agilipa olieel Fesitus bubu: «Mɛ̃ nzii k’eyoo mbuul ondɛ me myam.» Fesitus obveel ndɛ ndiri: «Ɔ̃suu yɛ àyoo ndɛ.»

23 Ela esiool, Agilipa ye Belenise ayi ye dzuun lueel, bvool asam onse mbal y’amfam b’ambwel-mbwel y’akuul-kuul a bviil. Ayi ye Pool, onge b’etam Fesitus osa. 24 Obobɔ, Fesitus oyɛɛn bubu: «Ɔ̃kwɛn Agilipa ye byɛ bueel b’eli ye bee ŋã, etal mbuul wu: Ayuda bueel, ekal ke Yelusalem, ekal ŋã, ayeyɛɛn buu me ndɔɔ a ndɛ ola mɛ̃ ndiri: "Ndɛ k’abvaan bvool m’okal mwiĩ wɛ." 25 Me b’otal mɛ̃, mɛ̃ ke mwɛn ndɔɔ yi esi ndɛ yɛn obvie awi ndɛ etumbu ki epfu wɛ. Kɛn onge bɛn ndyam osɔɔ kwɛn Sedzaal atsiil ndɔɔ a ndɛ, mɛ̃ nkuru k’eyuɔɔl ndɛ ola ndɛ ke Lom. 26 Mɛ̃ ke ndi ye ndɔɔ yi nkwa yɛn mɛ̃ olɔ nswɛn Sedzaal me ndɔɔ a ndɛ wɛ, obɔ otsɛn bɛn mɛ̃ ngyi ye ndɛ ke nkwel a byɛ, bvel-bvel ke nkwel a yɛ wu ɔ̃kwɛn Agilipa. Me fuul ndɛ buu, ke mbee a buu e ndɛ, mɛ̃ olɔ mbɔɔ ndɔɔ yi eswɛn. 27 Ke ngwel wɛ, k’eli ngesɛ wɛ kwɛn mɛ̃ ngyuɔɔl mbuul a bwal ke Lom, okɛɛn mɛ̃ ke ngyɛɛn ngesɛ-ngesɛ elyal ki alɔ ndɛ bwal wɛ.»