1 M'ãtsoo omɔ̃, onge bɛn ɔ̃bvɛn wu ayio ákelɔɔ kɛn olɔɔ, akiool b'Ayuda b'ákeyɛɛn ɔ̃nywã wa Ngelek abvi onyiin me ndɔɔ akiool b'Ayuda b'ákeyɛɛn onywã wu Ebel. Bɔ ákeyɛɛn ndiri tsoo bwɛn a tsoo li ákekab bvi-odza, ákedzɛɛn akaal a bɔ b'apfiil. 2 Obobɔ, antam ange-kuun ye buaal abvool ayio bam bueel, bu alieel bɔ bubu: «K'eli ngesɛ wɛ kwɛn bee eyɔɔl k'etee Endɔɔ e Nziã, me ndɔɔ okab o bvi-odza. 3 Andoo a dzii, obɔ otsɛn bɛn, esuaal baal nsiaan onse byɛ b'ebetuɛɛn baal, b'aluul m'Ɔ̃fel wu Ɔ̃nsensal y'ontwel. Obobɔ, bee èwa ɔ̃sal ondɛ me bɔ. 4 Me b'otal bee, bee ènɔɔn k'ebuɛɛn ye k'etee Endɔɔ e Nziã.»

5 Ebvɔɔn lueel ekiool ɔ̃dzoo ondɛ. Obobɔ, bɔ asueel Etyɛn, wu áluul m'okiool y'Ɔ̃fel wu Ɔ̃nsensal. Bɔ hɛ̃ asueel Filipe, ye Polokɔɔl, ye Nikanɔɔl, ye Timɔ̃, ye Paamenas, ye Nikolas wa bviil li Antioswe wɛn k'áli Ɔ̃yuda wu emburu-ngoo wɛ, kɛn a ndɛ ákekiool ãngel m'Ayuda. 6 Bɔ ayi ye bɔ ol'antam. Antam abuɛɛn me ndɔɔ a bɔ, andɔɔl bɔ mviɔɔl.

7 Endɔɔ e Nziã éketsɔɔn kɛn otsɔɔn, ɔ̃bvɛn wu ayio ákelɔɔ kɛn olɔɔ ke Yelusalem. Onkyam angaa-a-Nziã bibi akiool Yeso.

8 Etyɛn oluul me waan ye nyiĩ a Nziã. Obobɔ, ndɛ obvi ãndɔɔ m'ɛ̃kam ye m'emwã osa onse baal. 9 Kɛn a baal ke kwɛ ba nzɔ a ãbuɛɛn yi ata me «nzɔ a ãbuɛɛn yi ankyal b'apeel», y'Ayuda b'ola bo Silɛn, b'Alekesandele, ba Silisi ye b'Adzi, abvi otsuun ye ndɛ. 10 Kɛn a bɔ k'ákekoo k'abal ndɛ wɛ, me ndɔɔ ãyal m'oyɛɛn m'ékewa Ɔ̃fel ndɛ.

11 M'emfa okyɛ, bɔ afuru baal nzi, kwɛn baal obɔ ayɛɛn ndiri: «Bee eyoo Etyɛn asiaan Moyize ye Nziã!» 12 Obobɔ, bɔ asi ndɛ nsiɔɔl ol'Ayuda b'oŋɔ̃, y'akuul-kuul, y'ayiool b'ãngel. Bɔ asyel tsotsoo a ndɛ, asiin ndɛ, bu abiri ndɛ mbal yi nɛn yi Ayuda. 13 Oŋɔ̃, bɔ apaal baal a mfya b'ákeburu ndɛ ãndɔɔ ndiri: «Mbuul wu emwɛn byɛ wu, k'abewuun wɛ m'oyɛɛn obi-obi me Nzɔ a Nziã yi ɔ̃nsensal, ye ngel a Moyize! 14 Taa-taa bam, bee eyoo ndɛ ayɛɛn ndiri: "Yeso wa Nadzalet akieel atsal Nzɔ a Nziã yi, bvool akieel aswɛɛl onkɔɔ b'éwi Moyize bia-byɛ."» 15 Baal a mbal bam bueel alɔ Etyɛn etɔ, bɔ amwɛn kwɛn osu o ndɛ óli onge osu b'ãnzwel.