1 Obobɔ, Sol áli ngɔmɔ̃ onse b'ákiool kwɛn abam Etyɛn.

Bɛɛn tsoo olɔ, abootuaal Ebvɔɔn li éli ke Yelusalem mpal yam bibi. Ayio bueel atsɔɔn me nsie yi Yude ye yi Samali, antam k'átsɔɔn ye bɔ wɛ.

2 Baal b'ákuru nzuru me Nziã adziool Etyɛn, bɔ alel ndɛ bibi.

3 Me b'otal Sol, ndɛ áketsal Ebvɔɔn. Ndɛ ákesam onse ãnzɔ, ákebvuru akaal y'abɔɔl, ákelɔ me bwal.

4 Akiool b'átsal-átsal, k'ãmboo m'ékebwel bɔ, áketsal Nsia yi Ngesɛ. 5 M'emfa okyɛ, Filipe wu áyɛn onse bviil li Samali, otee Nsia a Mãsia. 6 Baal bueel ákeyoo ãndɔɔ ngesɛ-ngesɛ m'ékeyɛɛn Filipe, ŋ'eyoo bɔ bvool amwɛn emwã bvi ékesa ndɛ. 7 Ke ngwel wɛ, ɛ̃fel mi ɛ̃bi-ɛ̃bi ɛ̃́kepal onse baal bibi, ɛ̃kuaal ɛ̃sɔɔl. Ekal bibi ye b'áli y'elyam abvuul. 8 M'emfa okyɛ, esɛ ngamfɛn éli onse bviil olɔ.

9 Ŋ'esa oŋɔ̃, mbuul ngɔmɔ̃ wɛn nkuũ Simɔ̃ ál'ayii abekal onse bviil olɔ. Ndɛ ákesa ongaa, bvool ákesuul baal a Samali onse ɛ̃kam. Ndɛ ákeyɛɛn ndiri ndɛ oli mbuul wu ɔ̃nɛn. 10 Obobɔ, baal bam bueel, bɛɛn m'akiɔɔl tiil akuul, ákeyoo ndɛ ngesɛ-ngesɛ, bvool ákeyɛɛn ndiri: «Mbuul wu, wu abeta me "waan e Nziã li nɛn."» 11 Bɔ ákeyoo ndɛ ngesɛ-ngesɛ, me ndɔɔ yɛn etel-nziil, ndɛ ákesuul bɔ onse ɛ̃kam m'ɛ̃sal ɛ̃ ndɛ mi ongaa. 12 Kɛn a ŋ'ekiool bɔ Nsia yi Ngesɛ yi éketsal Filipe bɔ me ndɔɔ Okwɛn o Nziã ye nkuũ a Yeso Mãsia, bɔ awel opongo, akaal y'abɔɔl. 13 Simɔ̃ ndyam hɛ̃ oyii ɔ̃kiool, ndɛ owel opongo, ndɛ k'ákesiil Filipe wɛ. Ndɛ áli y'ɛ̃kam bibi ŋ'ékemwɛn ndɛ emwã y'emvieel bvi enɛn bvi ákesa.

14 Ŋ'eyoo antam b'áli ke Yelusalem ndiri baal a Samali akiool Endɔɔ e Nziã, bɔ ayuɔɔl bɔ Piɛɛl bwɛn a Dzaã. 15 Ŋ'etɔ antam ange-buaal ola bɔ, bɔ abuɛɛn me ndɔɔ yɛn Ɔ̃fel wu Ɔ̃nsensal aya nkal akiool. 16 Ke ngwel wɛ, Ɔ̃fel wu Ɔ̃nsensal ale kɛn asool nkal a mbuul si ngɔmɔ̃ onse bɔ wɛ. Bɔ awel opongo kɛn a me nkuũ a Mfam Yeso. 17 Obobɔ, Piɛɛl ye Dzaã andɔɔl bɔ mviɔɔl, bɔ bu ayɔɔ Ɔ̃fel wu Ɔ̃nsensal.

18 Ŋ'emwɛn Simɔ̃ kwɛn baal ákeyɔɔ Ɔ̃fel wu Ɔ̃nsensal ŋ'ékendɔɔl antam bɔ mviɔɔl, ndɛ oyebuun bɔ nzi, bu ayɛɛn ndiri: 19 «Ewa mɛ̃ hɛ̃ waan li, me ndɔɔ yɛn baal b'endɔɔl mɛ̃ mviɔɔl ayɔɔ Ɔ̃fel wu Ɔ̃nsensal.»

20 Kɛn a Piɛɛl obveel ndɛ bubu: «Onge b'etsam yɛ wɛn yɛ olɔ suun kab e Nziã me nzi, yɔɔl kwɛn yɛ kwa ye nzi e yɛ! 21 Yɛ onse ndɔɔ yi, ke li ye ki abɔɔ kyam wɛ, ke ngwel wɛ ɔ̃kwal a yɛ k'ali dzu ke mviil ã Nziã wɛ! 22 Pal onse ãtsam ã yɛ m'ãbi-ãbi, buɛɛn Mfam, owɛɛl ndɛ odzeel yɛ m'ãtsam m'ebɔɔ yɛ omɔ̃. 23 Ke ngwel wɛ, mɛ̃ emwɛn kwɛn ɔ̃kwal a yɛ oluul me nsɔɔ, yɛ hɛ̃ li ɔ̃nkyal a obi.» 24 Simɔ̃ bu abveel bubu: «Yɔɔl kwɛn byam ebuɛɛn Mfam me ndɔɔ a mɛ̃, kwɛn ndɔɔ si ngamɔ̃ onse m'eyɛɛn byɛ ebee me mɛ̃ otɔ.»

25 Antam ange-buaal ayɛɛn me ndɔɔ a Mfam Yeso, atee Endɔɔ e ndɛ. Ke mbee oŋɔ̃, bɔ akɔɔl Yelusalem. Me nkuul a nkuul, bɔ áketsal Nsia yi Ngesɛ onse ãla bibi mã Samali.

26 Ãnzwel ã Mfam ãlieel Filipe bubu: «Tɛɛn, yi me li etswi ki nsɛn, me nkuul yi efa Yelusalem eyi Gadza, me li ɔ̃baan wa kɛɛ-kɛɛ.» 27 Filipe otɛɛn oyɛn. Me nkuul, ndɛ omwɛn mbuul ngɔmɔ̃ wu ɔ̃fi-Etiopi. Ndɛ áli ɔ̃sal wu ɔ̃nɛn wu áketal opfel bam bueel b'ɔ̃kwɛn wu ɔ̃kaal wu Etiopi. Ámbaal ndɛ obɔɔl*. Ndɛ áyi Yelusalem me ndɔɔ yi alweel Nziã, 28 bu ayii abvool ola. Ndɛ áli me nsɛn onse swaal a ndɛ, bvool áketsiɔ ɔ̃nkaan wu ɔ̃liaal-ɛ̃kiɛɛn a Nziã Edzayi.

29 Ɔ̃fel olieel Filipe ndiri: «Syal tsotsoo a swaal wu!» 30 Filipe oyɛn me ntiin, bu ayoo ɔ̃fi-Etiopi abetsiɔ ɔ̃nkaan wu ɔ̃liaal-ɛ̃kiɛɛn a Nziã Edzayi. Ndɛ ofuul ndɛ ndiri: «Yɛ ŋ'abebɔɔ ãndɔɔ m'ebetsiɔ yɛ otsɛn?» 31 Ɔ̃fi-Etiopi obveel bubu: «Mɛ̃ mɔ̃ otsɛn bwɛn a bwɛn ebɔɔ, okɛɛn mbuul wu abɛɛl mɛ̃ mɔ̃ pyɛ?» Obobɔ, ndɛ olieel Filipe ndiri asam onse swaal, m'obva o nsɛn tsotsoo a ndɛ. 32 Ãndɔɔ m'ákel m'éketsiɔ ndɛ ã́li mɔ̃ mã:

«Ábiri ndɛ onge emɛmɛɛ̃ ke mboo yi abam anyam,

bvool onge muaan-emɛmɛɛ̃ wɛn yi ayɛɛn pyɛ ke nkwel a wu akuul ndɛ mfu,

ndɛ k'adzweel ɔ̃nywã wɛ.

33 Ásiaan ndɛ, ɔ̃dzoo a ndɛ ábam,

wu akieel ayɛɛn me ndɔɔ a yam e ndɛ nã?

Ke ngwel wɛ, ámbaal omwiĩ o ndɛ me nsie.*»

34 Ɔ̃fi-Etiopi ofuul Filipe bubu: «Mɛ̃ nduɔɔn yɛ, meyɛɛn mɛ̃, ɔ̃liaal-ɛ̃kiɛɛn a Nziã ãndɔɔ omɔ̃ me nã aliaal? Me ndyam wuo me mbuul ɔ̃kyam?» 35 Filipe ayebvuru oyɛɛn, obɛɛn m'ɔ̃luo wu éketsiɔ ndɛ ondɛ, bu atee ndɛ Nsia yi Ngesɛ yi etal Yeso.

36 Ŋ'ebenɔɔn bɔ nkuul a bɔ, bɔ atɔ ke mboo yi eli ãdza. Obobɔ, ɔ̃fi-Etiopi olieel Filipe ndiri: «Ãdza mɔ̃ bu, ki eluo mɛ̃ opongo owal emã?» [ 37 Filipe olieel ndɛ bubu: «Ŋɛn yɛ kiool m'ɔ̃kwal a ye ndyam wueel, yɛ koo k'awal opongo.» Ndɛ obveel ndiri: «Taa-taa, mɛ̃ nkiool wɛn Yeso Mãsia oli Muaan a Nziã*.»] 38 Ndɛ bu atam ndiri atɛɛl swaal. Bɔ ange-buaal asool onse ãdza, Filipe bu awi ndɛ opongo.

39 Ŋ'epal bɔ onse ãdza, Ɔ̃fel a Mfam ombaal Filipe. Ɔ̃fi-Etiopi k'abemwɛn ndɛ wɛ, kɛn a ndɛ onɔɔn nkuul a ndɛ y'esɛ kyam kieel. 40 Me b'otal Filipe, ndɛ oyetɔɔn k'Adzote, ndɛ áketsal Nsia yi Ngesɛ onse ãbviil mam mbueel m'ékebwel ndɛ tiil ŋ'etɔ ndɛ Sedzale.