1 Me lio li éli Apolos ke Kolinte, Pool otsiil ãnkio mã Ngalati ye Filidzi, bu atɔ Efedze. Ndɛ oyebɔɔ ayio ke kwɛ oŋɔ̃, 2 bvool ofuul bɔ bubu: «Ŋ'eyii byɛ akiool, byɛ éyɔɔ Ɔ̃fel wu Ɔ̃nsensal?» Bɔ abveel ndɛ ndiri: «Hɛɛ̃-hɛ̃, bee lɔɔ-okal kɛn eyoo k'ayɛɛn ndiri eli y'Ɔ̃fel wu Ɔ̃nsensal ngɔmɔ̃ bubu wɛ.» 3 Pool bu afuul bɔ ndiri: «K'opongo b'éwel byɛ, ale bɛn?» Bɔ abveel bubu: «Opongo o Dzaã.» 4 Pool olieel bɔ bubu: «Dzaã ákepongo baal b'ákekiool k'akaal ɛ̃kwal, bvool ndɛ ákeyɛɛn yam li Isalayel k'alɔ okiool me mbuul wu ákeya ke mbee a ndɛ, ŋ'ayɛɛn ndiri me Yeso.» 5 Ŋ'eyoo bɔ ãyɛɛn omɔ̃, bɔ awel opongo me nkuũ a Mfam Yeso. 6 Pool ondɔɔl bɔ mviɔɔl, Ɔ̃fel wu Ɔ̃nsensal bu asool nkal a bɔ. Obobɔ, bɔ abvi enywã ɛ̃kyam oyɛɛn, bvool abvi ãndɔɔ m'ãfi ola Nziã oyɛɛn. 7 Baal obɔ bueel áli onse abekuun ye buaal.

8 Pool ákeyi nzɔ a ãbuɛɛn, bvool ákewal oyɛɛn y'ãŋã. Onse nswii tyel, ndɛ ákeyɛɛn me ndɔɔ Okwɛn o Nziã, bvool ákesa mpɛn yi aswɛɛl ãtsam ã b'ákeyoo ndɛ. 9 Kɛn onge bɛn bakyɛ ákesa ɔ̃tswɛ mpɛn, ákebee k'akiool bvool ákesyob nkuul a Mfam ke nkwel a bvɔɔn, Pool osiil bɔ, obiri ayio me pyɛ. Ndɛ ákeyiool bɔ tsoo bwɛn a tsoo onse lekɔɔl e mbuul ngɔmɔ̃ wɛn nkuũ Tilanos. 10 Esi mvel yuaal, m'emfa okyɛ baal b'ákekal k'etswi e nsie ki Adzi, b'áli Ayuda ye bɛn k'Ayuda wɛ, ayoo Endɔɔ e Mfam.

11 Nziã ákesa emvieel bvi emwã me nkuul a Pool. 12 M'emfa okyɛ, ákewal ekɔ wuo ɛ̃suaal mi énywɛn a nzuru a Pool, ákendɔɔl myɛ̃ nkal anga-ãluu, bɔ ákebvuul, bvool ɛ̃fel mi ɛ̃bi-ɛ̃bi ɛ̃kepal onse bɔ.

13 Éli y'Ayuda ke kwɛ b'ákeyi m'ãmboo m'ãmboo m'otswɛɛl b'ɛ̃fel mi ɛ̃bi-ɛ̃bi. Bɔ akie k'atswɛɛl ɛ̃fel mi ɛ̃bi-ɛ̃bi onse baal, me nkuũ a Mfam Yeso. Bɔ ákeyɛɛn ɛ̃fel mi ɛ̃bi-ɛ̃bi bubu: «Me nkuũ a Yeso wu ebetee Pool, bee etam byɛ wɛn epal!» 14 B'ákesa ãndɔɔ omɔ̃, éli baan nsiaan ba mbuul ngɔmɔ̃ wɛn nkuũ Sebva, wu ngaa-a-Nziã wu ɔ̃nɛn wu Ɔ̃yuda. 15 Kɛn a tsoo ngelemɔ̃, ɔ̃fel wu ɔ̃bi-ɔ̃bi obveel bɔ bubu: «Yeso, mɛ̃ ngyɛɛ ndɛ ngesɛ, Pool hɛ̃, mɛ̃ ngyɛɛ ndɛ. Ke byɛ, byɛ anã eli?» 16 Mbuul wu áli y'ɔ̃fel wu ɔ̃bi-ɔ̃bi oyiool nkal a bɔ, bu abvel bɔ bueel mpɛn. Ndɛ otueel bɔ mpal m'emfa kyɛn bɔ apwɛɛn ke nzɔ oyɔ odzuũ y'ãbwɔɔ mbueel.

17 Baal bueel b'ákekal k'Efedze, Ayuda ye bɛn k'Ayuda wɛ, ayoo ndɔɔ oyɔ. Bɔ bam bueel buɔ obɔɔ, bvool ayii awal nkuũ a Mfam Yeso ye bvɛɛ bibi. 18 Bibi onse b'ál'ayii akiool ákeya bvool ákekiool ãbi ã bɔ ke nkwel a baal. 19 Baal bibi onse b'ákesa ãngaa, ákeya y'ɛ̃nkaan ɛ̃ bɔ mi ongaa bvool áketsoo myɛ̃ mbaa ke mviil ã baal bueel. Ŋ'asiɔɔl ɔ̃bvɛn wu abetiɔ ɛ̃nkaan omyɛ̃, amwɛn ndiri ol'esi nzi yi ãbvieel amiil ãku-ãtaan (50.000)*. 20 M'emfa okyɛ, me waan e Mfam, baal bam bibi ákeyoo Endɔɔ e Nziã bvool ákekiool lɔ.

21 Ke mbee oŋɔ̃, Pool okuru k'ayi Maseduaan ye Ngelek*, ye k'eyi ndɛ Yelusalem. Ndɛ oyɛɛn bubu: «Mɛ̃ èmbal okɔ, ebvaan kwɛn mɛ̃ eyi Lom hɛ̃.» 22 Ndɛ oyuɔɔl awuaal a ndɛ buaal, Timote y'Elasite, ke Maseduaan, kɛn a ndyam osiil ãlio ke kwɛ ke nsie yi Adzi.

23 Me lio olɔ, tsungaa wu ɔ̃nɛn obvi k'Efedze me ndɔɔ a nkuul a Mfam. 24 Mbuul ngɔmɔ̃ wɛn nkuũ Demetilihos, wu ákebuo eluɔ bvi ãbvieel, ákebuo etiɔ bvi nzɔ a nziã ngɔmɔ̃ wu ɔ̃kaal, wɛn nkuũ Aatemis, me bvieel li aadzã. M'ɔ̃sal ondɛ, bɔ ákebɔɔ nzi bibi, ndɛ y'asal a ndɛ. 25 Tsoo ngelemɔ̃, ndɛ obvool asal obɔ ye baal b'ákesa ɔ̃sal wɛn onge ondɛ. Ndɛ olieel bɔ bubu: «Andoo a mɛ̃, byɛ eyɛɛ wɛn opfel o bia-byɛ obeya m'ɔ̃sal wu. 26 Kɛn a byɛ ebemwɛn bvool ebeyoo m'ãbebwel: ɔ̃bvu-ayi Pool wu, amaasa mpɛn yi aswɛɛl ãtsam ã baal bibi, ke kɛn a k'Efedze ŋã wɛ, ekoo m'oyɛɛn wɛn onse nsie yi Adzi yueel. Ndɛ atɔ m'oyɛɛn ndiri anziã b'asi me mviɔɔl ɛ̃ baal k'ali anziã wɛ. 27 Ãndɔɔ omɔ̃ ãkoo k'ãsa kwɛn ɔ̃sal a bia-byɛ akal ngwel, bvool kwɛn nzɔ a nziã wu ɔ̃nɛn wu ɔ̃kaal wu Aatemis dzuun efa. Obobɔ, bvɛɛ e ndɛ ol'efi, ndɛ wu nziã wu ɔ̃kaal wu ebelweel baal bueel me nsie yi Adzi bvool onse ɔ̃kiri a nsie wueel!»

28 Ŋ'eyoo bɔ ãndɔɔ omɔ̃, bɔ mpuru eyi, bu abvi obiool ndiri: «Aatemis wu Efedze, nziã wu ɔ̃nɛn ali!» 29 Ekiin ebvi onse bviil lueel, baal bueel ayɛn tswa-a-tswa ke mboo yi abesa ɛ̃taan. Ŋ'ékebwel bɔ, bɔ asiin Gahios y'Alisitaak, Afi-Maseduaan b'áyɛn dzwɛ ye Pool. 30 Pool ákedzii k'apal ke nkwel embuul, kɛn ayio akii ndɛ. 31 Asal a nga-furu ba bvɛɛ ke kwɛ ba nsie yi Adzi b'áli andoo a ndɛ hɛ̃ ayuɔɔl ndɛ ɔ̃kiɛɛn me ndɔɔ yi alɛɛn ndɛ ndiri abee ke mboo yi abesa ɛ̃taan oyi.

32 Me lio olɔ, ɛ̃tswab ɛ̃́li onse embuul: Bɛn abiool nkyam, bɛn hɛ̃ abiool nkyam, bvool bibi onse bɔ k'áyɛɛ otsɛn b'ébvɔɔn bɔ wɛ. 33 Onse embuul, baal ke kwɛ alieel mbuul ngɔmɔ̃ wɛn nkuũ Alekesandele otsɛn o m'ãbwel. Mbuul ondɛ wɛn Ayuda áketsɛɛn ke nkwel. Obobɔ, ndɛ ondɛɛl kuɔɔl, me ndɔɔ yɛn ndɛ ákedzii k'ayɛɛn y'embuul. 34 Kɛn a ŋ'eyeyɛɛ bɔ kwɛn ndɛ áli Ɔ̃yuda, bɔ bueel abvi obiool tiil nku-a-nku ãlio mbuaal bubu: «Aatemis wu Efedze nziã wu ɔ̃nɛn ali!»

35 Kɛn ɔ̃swɛn-ɛ̃nkaan wa bviil osi kwɛn embuul ebvi ɔ̃lii, ndɛ oyɛɛn bubu: «Afi-Efedze, baal bueel ayɛɛ kwɛn bviil li Efedze eli ɔ̃nkiaal a nzɔ a nziã wu ɔ̃nɛn wu ɔ̃kaal wu Aatemis ye wu etiɔ e ndɛ, ki etswel fa ywel. 36 Mbuul wu abee yɔ k'ali wɛ, oŋɔ̃ ebvaan kwɛn byɛ ewuun pi, bvool ebee ndɔɔ si ngamɔ̃ osa me nkaã. 37 Ke ngwel wɛ, baal b'ebiri byɛ ŋã ba k'asi ndɔɔ yi mbi me nzɔ a nziã wɛ, bɔ hɛ̃ k'asiaan nziã a bia-byɛ wɛ. 38 Okɛɛn Demetilihos y'andoo a ndɛ b'ɔ̃sal ali y'esal bwɛn a mbuul, ãmbal ãli y'antwel, okɔ mboo yi abva mbal! 39 Bvool okɛɛn byɛ eli ye ndɔɔ nkyam yi esuo, atal yɔ ke bvɔɔn li ebetsiil ãndɔɔ m'emfa ki etam ãngel. 40 Ke ngwel wɛ, okɛɛn afɛn bia-byɛ ndiri bia-byɛ elɔ tsungaa me m'ãbwel nonɔ̃, ɔ̃dzoo wu ewa me ndɔɔ obvɔɔn ba k'ali wɛ.» 41 Ke mbee a ŋ'eyɛɛn ɔ̃swɛn-ɛ̃nkaan obobɔ, ndɛ otsal obvɔɔn.