1 Baal ke kwɛ afi Yude, ayi Antioswe. Bɔ abvi andoo a dzii otee bubu: «Okɛɛn k'atsiil byɛ onge b'etam ãngel ã Moyize wɛ, byɛ k'ekoo m'obvuul wɛ.» 2 Pool ye Balanabas abveel ndiri k'obobɔ wɛ, ɛ̃tsuun mi kokɔ ɛ̃bvi kal-a-kal a bɔ. Obobɔ, baal akuru kwɛn Pool ye Balanabas ye baal k'Antioswe bakyɛ ayi Yelusalem, me ndɔɔ yi ayetal ndɔɔ oyɔ y'antam y'akuul-kuul b'Ebvɔɔn. 3 Ebvɔɔn li Antioswe ewi bɔ eluɔ bvieel me ndɔɔ a dzwɛ olɔ. Bɔ atsiil Fenisi ye Samali, ayɛɛn emfa ki ekaal baal bɛn k'Ayuda wɛ ɛ̃kwal ayi ola Nziã. Nsia oyɔ ékesa akiool bueel esɛ bibi.

4 Ŋ'etɔ bɔ Yelusalem, Ebvɔɔn y'antam, y'akuul-kuul ayɔɔ bɔ. Pool ye Balanabas alieel bɔ mam mbueel m'esi Nziã me nkuul a bɔ. 5 Kɛn a baal ke kwɛ ba nkel a Afalisaye, b'ayii akiool, atɛɛn me ndɔɔ yi ayɛɛn ndiri: «Obvie atsiil akiool bɛn k'Ayuda wɛ, bvool atam bɔ k'akiaal ãngel ã Moyize.»

6 Antam y'akuul-kuul bu abvɔɔn m'otal o ndɔɔ oyɔ. 7 Ke mbee a ŋ'emeetsuun emeetsuun bɔ, Piɛɛl otɛɛn bvool olieel bɔ bubu: «Andoo a mɛ̃, byɛ eyɛɛ kwɛn bɛɛn etel-nziil, Nziã asueel mɛ̃ onse byɛ, me ndɔɔ yɛn mɛ̃ nsal Nsia yi Ngesɛ ola baal bɛn k'Ayuda wɛ, kwɛn bɔ ayoo yɔ bvool akiool. 8 Nziã wu oyɛɛ ɛ̃kwal ɛ̃ baal, osuo kwɛn ndɛ oyɔɔ bɔ ŋ'ewi ndɛ bɔ Ɔ̃fel wu Ɔ̃nsensal onge b'ési ndɛ me bia-byɛ. 9 Ndɛ k'asi ɔ̃bɛɛ mpɛ̃-a-mpɛ̃ bɔ ye bia-byɛ wɛ. Ndɛ osuɔɔl ɛ̃kwal ɛ̃ bɔ, me ndɔɔ yi ekiool bɔ Yeso. 10 Meba ŋã, ndɔɔ mã yi epwee byɛ Nziã, ŋ'eywɛɛn byɛ ayio pfuũ lɛn, ekal ankiɔɔn a bia-byɛ, ekal bia-byam, k'ekoo m'obiri o lɔ wɛ? 11 Bia-byɛ mpii ebekiool wɛn bia-byɛ ebvuul me nyiĩ a Mfam Yeso yi nɛn, emfa ngemɔ̃ onge bɔ!»

12 Baal bueel b'ábvɔɔn abvi ɔ̃lii, me ndɔɔ yi ayoo k'eyɛɛn Balanabas ye Pool emwã y'emvieel bvam bvieel bvi ési Nziã me nkuul a bɔ ola baal bɛn k'Ayuda wɛ. 13 Ŋ'eman bɔ oyɛɛn, Dzak abvuru oyɛɛn, olieel bubu: «Andoo a dzii, emeeyoo mɛ̃! 14 Simɔ̃ olieel bia-byɛ emfa kyɛn fa obɛɛn, Nziã ndyam ákuru k'asuaal onse bɛn k'Ayuda wɛ baal b'àkal yam e ndɛ. 15 Ãndɔɔ omɔ̃ ãyi nkuul ngamɔ̃ y'ãyɛɛn m'aliaal-ɛ̃kiɛɛn a Nziã, ke ngwel wɛ ákel bubu:

16 "Mfam oyɛɛn ndiri: Ke mbee oŋɔ̃ mɛ̃ èyebvool,

me ndɔɔ yi efaal nzɔ a David yi étsɔɔn.

Mɛ̃ èfaal nzɔ a ndɛ yi átsal,

bvool mɛ̃ ètɛɛl yɔ tɛ.

17 Obobɔ, baal bueel b'asiil àbii Mfam,

ngwanyã, ãyam omɔ̃ mbueel m'éti mɛ̃ mbel k'ãkal mã mɛ̃.

Omɔ̃ m'eyɛɛn Mfam, wu asa ãndɔɔ omɔ̃,

18 ndɛ wu asuo ãtsam ã ndɛ bɛɛn etel-nziil.✝"»

19 Dzak olweel ndiri: «Obɔ otsɛn bɛn, mɛ̃ etsam wɛn, baal bɛn k'Ayuda wɛ b'akiool Nziã, ebee bɔ dzool ota. 20 Kɛn a bia-byɛ ekel bɔ bubu: "Ebee anyam ba mbiin b'awi ãkab ol'etiɔ odza. Ebee ntal obvool ye mbuul wɛn byɛ kɛn ebaal bakyɛ wɛ, ebee anyam b'akwa etsɔɔn odza, ebee ãkel hɛ̃ odza." 21 Ke ngwel wɛ, bɛɛn etel-nziil onse bviil bwɛn a bviil, baal abetee ãngel ã Moyize, nzal-a-ŋɛn abetsiɔ mɔ̃ onse ãnzɔ m'ãbuɛɛn asaba bueel.»

22 Obobɔ, antam y'akuul-kuul y'Ebvɔɔn lam lueel akuru k'asuaal baal ke kwɛ onse bɔ b'èyuɔɔl bɔ Antioswe bwɛn a Pool ye Balanabas. Bɔ asueel Yuda wu abeta hɛ̃ me Balasabas, ye Silas, b'ékewal baal ye dzuun onse andoo. 23 Bɔ awi bɔ ɔ̃nkaan wu áswɛn bubu:

«Bee b'antam y'akuul-kuul, b'andoo a byɛ a dzii, bee ebio byɛ b'andoo bɛn k'Ayuda wɛ, b'eli k'Antioswe, b'eli ke Sili ye b'eli ke Silisi. 24 Bee eyoo ndiri baal b'afi ola bee alɔ ɛ̃tswab onse byɛ bvool abiil ɛ̃kwal ɛ̃ byɛ m'ãyɛɛn ã bɔ. Bee k'etam bɔ ndɔɔ si ngamɔ̃ osa wɛ. 25 Obɔ otsɛn bɛn bee bueel ɔ̃dzoo ɔ̃mɔ̃, esueel baal me ndɔɔ yi eyuɔɔl bɔ ola byɛ. Bɔ àyesuul andoo a bia-byɛ Balanabas ye Pool, 26 b'awi bwel me ndɔɔ ɔ̃sal a Mfam a bia-byɛ Yeso Mãsia. 27 Obobɔ bee eyuɔɔl Yuda ye Silas, bɔ baal b'àyɛɛn byɛ ãndɔɔ amãmã m'ɔ̃nywã a bam. 28 Ke ngwel wɛ, Ɔ̃fel wu Ɔ̃nsensal ye bee myam, ekuru kwɛn bee ebee byɛ bvool ãngel ãkyam oywɛɛn. Kɛn a byɛ ebvaan ekiaal ãngel mã nkiin mã: 29 Ebee anyam b'awi ãkab ol'etiɔ odza, ebee ãkel odza, ebee anyam b'akwa etsɔɔn odza, ebee ntal obvool ye mbuul wɛn byɛ kɛn ebaal bakyɛ wɛ. Ŋɛn byɛ ebee ãndɔɔ omɔ̃ osa, byɛ ol'esi ngesɛ. Ekal obɔ!»

30 Pool, ye Balanabas, ye Yuda, ye Silas ayelɛɛl Ebvɔɔn, ayɛn Antioswe. Okɔ, bɔ abvool nkel a akiool, bu awi bɔ ɔ̃nkaan. 31 Ŋ'atsiɔ ɔ̃nkaan ondɛ, bɔ bueel aluul m'esɛ m'ãyɛɛn ã ndɛ m'ã́kewa bɔ mpɛn. 32 Yuda ye Silas b'áli bam hɛ̃ aliaal-ɛ̃kiɛɛn a Nziã, ayɛɛn akiool ãndɔɔ bibi m'ãwa bɔ mpɛn bvool ãwɛɛl bɔ onse okiool. 33 Ke mbee a ŋ'ekal bɔ muaan-lio k'Antioswe, akiool alɛɛl bɔ ndiri abvool ngesɛ ola b'átam bɔ. [ 34 Kɛn a Silas okuru k'asiil oŋɔ̃, Yuda bu abvool Yelusalem ndyam.*] 35 Me b'otal Pool ye Balanabas, bɔ asiil k'Antioswe. Bɔ ákeyiool bvool áketsal Nsia yi Ngesɛ yi Mfam, ye bakyɛ bibi.

36 Ke mbee ãlio ke kwɛ, Pool oyɛɛn Balanabas bubu: «Ekɔɔl eyetal andoo a dzii onse ãbviil mam mbueel m'étee bia-byɛ Endɔɔ e Mfam, me ndɔɔ yi etal emfa ki eyii bɔ.» 37 Balanabas ákedzii kwɛn Dzaã-Maak ayi ye bɔ, 38 kɛn a Pool áketsam ndiri k'eli ngesɛ wɛ kwɛn bɔ awal mbuul wu áyiri bɔ ke Pamfili bvool k'áyesa ɔ̃sal ye bɔ wɛ. 39 Ɛ̃tsuun ɛ̃yenduru, bɔ atsɔɔn. Balanabas owel Dzaã-Maak, bu asam ãsua ayɛn Swipele. 40 Me b'otal Pool, ndɛ osueel Silas. Akiool asɔɔ nyiĩ a Mfam me ndɔɔ a ndɛ wu Pool, ndɛ bu ayɛn. 41 Ndɛ otsiil Sili ye Silisi, awa Ãbvɔɔn mpɛn.